السبت، أكتوبر 13، 2007

الشحاتين






المتسولين بيشتغلوا جامد فى اواخر رمضان وبالذات فى ليلة العيد وقد ابتكروا افكارا كثيرة لاثارة العطف عليهم واخرها ايجار مقشة رز الخاصة بكنس الشوارع ولبس اوفرول اخضر على برتقالى وطاقية لزوم الشحاتة وفى شارع واحد امس قبل الافطار كان فى اكتر من ثلاثين واحد وواحدة بالينيفورم المذكور انفا ، كلهم صحة وعافية وداخلين سبق ماراثون مع السيارات اللى تقف للعطف عليهم ودفع اللى فيه القسمة والنصيب ، تقف السيارة من دول فى مكان معين مثلا فى اول الشارع للتصدق على واحد الباقى المنتشرين على طول الشارع يجروا باقصى سرعة فى اتجاهها وبعدين يجروا الناحية التانية لغاية اخر الشارع كل ده والمقشات مرفوعه مثل الاسلحة المشرعة والطواقى تطير من على الرؤوس










والحقيقة فقد انقسم الناس فى مواجهة هذة الظاهرة الى مذهبين ، المذهب الاول هو العطف عليهم وانهم غلابة وفقراء يجب العطف عليهم والمذهب الثانى وانا من انصارة انهم محترفين وانهم فى صحة وعافية تكفى لهدم الجبال ، ويجب التأنى والتدقيق فى البحث عن الفقراء والمساكين الحقيقيين الذين لا يسالوا الناس الحافا ، طبعا انتم عارفين الشغالات بياخدوا كام فى تنظيف البيوت ؟ اربعين جنيه هذا بخلاف الاكل والشرب والمواصلات والدلع والذى منه وعليهم طلب جامد ونحصل عليهم عن طريق الموبايلات بالعافية ، عارفين العامل العادى الذى يساعد مثلا معلم المحارة او يرفع الرمل او الاسمنت للمبانى تحت الانشاء بياخد اكثر من 25 جنيه فى مدة 6 ساعات وغير متوفرين بسهولة ويضطر المقاولين لاستيرادهم من الفيوم وفيها ارخص عمال
فما رايكم فى هذة القضية؟؟؟؟؟


هناك 14 تعليقًا:

loumi يقول...

بصراحه
الموضوع محّير شويه
وإن كنت من أنصار عدم إعطاء الصدقات إلا عن طريق جمعيات وأناس مشهود لهم بالثقه والامانه لتوزيعها لمن يستحقها
التسول أصبح لبعض الناس حرفه
وهي اسهل من العمل ألف مرة
على سبيل المثال لا الحصر
المسحراتي
خبط امبارح علينا اتنين
مع إن اللي بيعدي واحد
تقدر ما تديهوش؟
للأسف لأ لأنك ما تعرفش مين منهم الصادق
وفي الأخر أهو كله مساعده
والواحد بيدعي إنها تكون بتروح لناس محتاجين فعلا
تحياتي

ra7eel يقول...

انا بصراحه اسلوبهم بستفزنى جدا لما بيعترضوا طريقى واجبارى بقى لازم ياخده والمشكله فعلا ان صحتهم كويسه يعنى ممكن يشتغلوا
بس هما
خلاص اتعودوا
لما تيجى تكلم حد عشان يشتغل
يقولك الف حجه
بصراحه اسلوبهم المستفز بيخلينى مش بثق انى ادى لحد فيهم اى حاجه بالشكل ده

Ragi يقول...

العزيزة لمى
انا متفق معاكى ان الصدقات يجب ان يقوم عليها هيئة او جمعية نثق فيها وتقوم بجمع الصدقات وتوزيعها على الفقراء
كل عيد وانتى طيبة

Ragi يقول...

العزيزة رحيل
متفقين 100% ولكن يجب ان نمتنع عن الخضوع للابتزاز
تحياتى وكل سنة وانتى بخير

الباحث عن الحقيقة يقول...

يا عم ده مش تسول
دى تجارة ومهنة الناس دى بتمتهنها وبتحترفها
طب قاعد فى مكان تلاقى سبعين شحات عدى عليك ببقى عايز اقولهم حرام عليكم ده انتم بتكسبوا اكتر منى
المفروض انا اللى اقولكم حاجه لله

ما علينا خد انشر دى
Did you know enough about Prophet Mohammed ?
If you are interested in please visit this site
The first muslem, trustful information
History of Islam
http://www.islamway.com/mohammad/

Ragi يقول...

الباحث عن الحقيقة
اتفق معك فى رايك ، وانا لسة راجع من استراحة الكاشفة وسيبت لك الحساب لكل الزباين
اهلا بك وكل سنة وانت طيب

osama يقول...

معك حق والامر تطور... والحيرة في امرهم وارده فأنت بين ان تقول عملي بالنيه والله اعلم بهم... وبين الا تعطيهم ... لكن بالفعل يجب البحث عن المستحق الذي يحسبه الجاهل غني من التعفف والذي كما ذكرتم لا يسال الناس الحافا فهو اولى...
دمت بكل ود..
خالص تحياتي..

ملحوظة جانبيه الغلاء في مصر جعل الانسان يظن ان الجميع يستحق الصدقه..

Ragi يقول...

استاذ اسامة
اهلا بك وسعيد باتفاقنا

(green eyes) يقول...

والله انا من رأيي ان المتعففون اولى
وبصرف النظر عن ان الناس دي تستاهل ولا لا اكيد ربنا بيكتب الثواب
واخير فان اليد العليا خيرا من اليد السفلى

Ragi يقول...

green eyes

اولا شكرا على الزيارة لاول مرة
ثانيا : الاعمال بالنيات فاذا اعطينا بنية ابتغاء وجه الله فتقبل الصدقات
باذن الله
اخيرا اتمنى لكى السعادة مع فارس الاحلام ومنتظر الدعوة على حفل الزفاف

princess dodo يقول...

فعلا يا راجى عندك حق
ولسه كنت بتكلم مع واحدة صاحبتى
فى موضوع قريب من كده
وهو التسول داخل قطارات المترو
وكنت بقول لها انتى شايفه
اللى بيمدوا ايديهم دول
يقدرو يشتغلو
واحنا كده بنساعدهم على التسول

نفس الفكرة اللى انت بتتكلم فيها
وانا مع رأى لومى اوى
ان الصدقات دى
بتتوزع فى اماكنها المعروفة
لأن دى ناس خبيرة بمين
اللى بيستحقها ومين لأ

****

كل سنة وانت طيب يا جميل
عيد سعيد

على فكرة بموت فى فيروز
وخصوصا غنيت مكة


أحييك

Ragi يقول...

الاميرة دعاء الجميلة
كل سنة وانتى طيبة
وانا ايضا متفق معك ومع لومى حول الموضوع
وفيروز هدية العيد لكل اصدقائى فى المدونات الرائعة
ولكى السلام والتحية

عاليا حليم يقول...

انا راى اننا ما نشجعش التسول لاننا كده بنشجعهم على التواكل و ليس التوكل كما يحب المولى عز و جل

انا ممكن ادى حسنة لبياع مناديل او ترمس مثلا لان ده فكر يشتغل بدل ما يبقى عالة على الناس

Ragi يقول...

عاليا
مرحبا بك نورتى المدونة من جديد
الحقيقة بياعين المناديل الذين يلحون على الناس فى اشارات المرور او فى الشوارع او داخل المترو هم ايضا من المتسولين ولا يغرنك انهم يبيعون مناديل لكن فعلا البياعين الذين يفترشون الارض مثلا بخضرة او ليمون او شيء من هذا القبيل فهم فعلا بياعين ولا يقبلون الصدقة
اهلا بكى من جديد