الاثنين، أبريل 21، 2008

what goes around comes around



فتحت على نفسى باب من العذاب لما صدقت الدكتور محمد نجيب اللى كان بيحاضرنا فى الجامعة الامريكية عن اهمية الوقت وازاى نقدر نستفيد من كل دقيقة فى اليوم وكانت محاضراته ضمن برنامج ادارة المشروعات فى مركز عبد اللطيف جميل ( مع تعطيش الجيم )

و الدكتور نجيب من ظرفاء العصر وابن بلد وابن نكته و بالطريقة دى دخل قلبى وخلانى اصدق كلامه موش بس لان الاستفادة من الوقت بقى علم اساسى فى الادارة الناجحة ولكن لانى كمان حسيت انه مؤمن بالكلام اللى بيقوله فى المحاضرات

وبعد كام محاضرة لقيت نفسى اشتريت نوته مكتوب عليها Things to do
بدات اسجل فيها الصبحية قائمة المهمات اليومية وارتبها حسب الاهمية و احدد الوقت المطلوب للبدء فى المهمة والوقت المناسب علشان تخلص

وبقيت لما اقابل اصحابى وقرايبى ابص فى الساعة فى بداية اللقاء وبعد شوية استاذن بحجة انى موش فاضى الاجندة مزدحمة واجرى علشان الحق اللى ورايا وادوس على الكلاكس بعصبية وفى الشغل بقيت اقول للمدير بص يا افندم الحاجات اللى سعادتك بتطلبها وبتكون مستعجل عليها لازم نتفق الاول عليها هى مهمة ولا مستعجلة علشان اقدر اوضب الاجندة لان الحاجات المهمة وموش مستعجلة بتعمل انتربشن ( interruption ) لجدول المهام فالراجل يبص لى بشك وارتياب ويهز راسه ويسكت او ينفجر ويزعق فاعرف ان المطلوب موش بس مهم لا مستعجل كمان واضطر اعدل الجدول بتاع اليوم

وطبعا يطير من عينى النوم لو فى مهمة ما اتعملتش واقعد اضرب اخماس فى اسداس ازاى ح اقدر احشرها فى اجندة المهام بتاعة تانى يوم

وتطور الموضوع الى انى حطيت برنامج البريمافيرا ( اللى ما يعرفوش مايشغلش نفسه ) و اصبحت ماشى باللاب توب على طول فى النادى وفى عيادات الدكاترة وفى الحمام ، عمال انظم فى وقتى وفى حياتى وفجاة نورت فى مخى فكرة ، طيب يا واد ماتنظم ميزانية البيت بالمرة وما كدبتش خبر وحطيت سوفت وير للميزانيات وبقيت اسجل ربع جنيه للمنادى و واتنين جنيه عيش فينو وثمن الخضار والفاكهة واراجع مع المدام والاولاد كل مليم بينصرف فى البيت واتخانق وازعق بكام المصاصة والشيبسى موش كان بنص جنيه ايه اللى غلاه يا غجر فين الفواتير ، وهكذا شوية شوية بقيت زى العلماء المجانين اللى بيطلعوا فى الافلام شعرهم منكوش ودقنهم طويله وف حالة ذهول مستمر وسرحان وعكننه و امساك وكوابيس

وفجأة وبدون مقدمات ضربت الويندوcrashed وقعدت ابص على الشاشة الزرقا وانا موش مصدق انى نسيت اعمل backup وحسيت بعرق غزير فى شعرى ونزل العرق على قفاى وظهرى

مستسلما ارحت ظهرى على الكرسى ومديت رجليه وغمضت عنيا شوية ثم شميت ريحة الاكل طالعه من المطبخ فشعرت بالجوع الشديد وقمت على مهلى على السفرة فإذا بالاكل فى طبق جديد وكنت على وشك سؤال المدام عن ثمن الاطباق الجديدة ومنين اشترتهم ، لكن ترددت قليلا ثم غيرت رايى وبدأت امضغ الاكل على مهلى خالص وعلى شاشة التلفزيون كان فريد الاطرش بيغنى الحياة حلوة بس نفهمها فسرحت ونظرت مرة اخرى فإذا بصورة فريد الاطرش تتبدل ويطل الدكتور محمد نجيب من الشاشة مبتسما وعينه بتغمز

الأربعاء، أبريل 16، 2008

للنساء فقط


لو قعدتى على كافيه فى وسط البلد فى اى مدينة مصرية وتفرغتى لملاحظة الناس والرجال منهم على وجه الخصوص سوف تلاحظى فى الغالب وليس طبعا فى كل الاحوال حيث التعميم هنا لا يصح ،حركة اليد المستمرة الى الفم اكلا او تدخينا او شفطا او مصا للاصابع

كمان حتلاحظى الميل الغريب للفت الانظار باطلاق الاصوات العاليه والهزار البايخ المصحوب بالمبالغه فى الحركات وكمان التباهى بالملابس ذات الخطوط الغريبة و الالوان الزاعقة واجهزة التليفون الجوال او شنط اللاب توب او السير مع الحسناوات الاجنبيات

وقد تلاحظين بعض الرجال يسيرون مطأطئين الرؤوس لا يرفعون اعينهم الى الناس يلبسون ملابس مغلقه ذات الوان داكنه

ويمكن تلاحظى تصنيف الرجال لانفسهم وانحيازهم الى مجموعات دينية او رياضية او ثقافية او سياسية او اقتصادية وذلك يكون واضح فى مظهرهم العام والكلمات المتداولة فى حديثهم او تعليقاتهم او الذقون المعفاه او العضلات المحشورة فى القمصان الضيقة او الينيفورم الخاص ببعض الشركات او الشارات المعلقة على السيارات والتى تفصح عن الانتماء الى الهيئات او النوادى ، ويمكن تلاحظى كمان حب بعض الشباب للون السيارات الاحمر القانى او الاصفر الفاقع الذى يميز السيارت الرياضية الغالية وقيادتها بتهور مع الضغط على الفرامل ليلتفت المارة الى مصدر الصوت الزاعق

يعنى ممكن تسألى نفسك ياترى ايه اللى بيدور فى عقل الرجاله وعاملين كده ليه وانا حاحاول من باب مساعدة النساء على فهم بنى جلدتى وارجو ان لا اتهم بالخيانة من جانب الرجال ، سوف احاول تفسير سلوك الرجال التلقائى فى الحياة واسبابه الكامنه والخفيه يمكن الستات يحاولوا يستفيدوا ويحصلوا على السعادة اللى بيدوروا عليها مع ازواجهم وموش عارفين هى فين

وطبعا انا اعترف انى متأثر بقراءة سيجموند فرويد فى هذا العرض الذى قد يكون مفرط فى الشطط مغرق فى الخيال وكذلك احب اوضح ان بعض الكلمات او المعانى قد تكون صادمة للانسات ذوات الاحساس المرهف فاعتذر عن ذلك مقدما

يولد الطفل الذكر مشتاقا الى اللذه باحثا عنها ويجدها ببساطة مع اول مرة يملأ فمه بحلمة ثدى امه ويتدفق اللبن الدافيء الى جوفه فيشعر بالسعادة
و يتكرر شعور السعادة مرة اخرى مع التبرز او التبول الذى يشعره بالسرور والوعى بجسده

وتكون صدمته الكبرى فى الحياة يوم فطامه وفقدانه لثدى امه فهو لاول مرة يواجه بالخيانه والرفض من مصدر اللذه الاول وتتكون فى نفسه اول عقدة نتيجة كبت الرغبة

وبمضى الوقت ومع النمو يكتشف الطفل ان هناك مصدر اخر جديد للذه يبعث فيه السعادة عندما يعبث بعضوه الذكرى وبالرغم من كلمات عيب وكخ التى تطلقها امه على سبيل الاستهجان يستقر فى وجدانه ان الحياة لا تساوى شيئا بدون اللذه و تتكون عنده عقدة كبت اخرى


ومع مرور الزمن يثور فى نفس الطفل حب الاستطلاع والرغبة فى اكتشاف سر الفرق الذى بينه وبين البنات فيبتكر لعبة ورينى وانا اوريك فيكتشف النقص الهائل الذى يميز جسد البنات مقارنة بالبروز الذى يتميز به جسده فيستقر شعور التفوق فى نفسه


وعند نقطة ما تبدأ علاقة الطفل الذكر بابيه فى التعقد كذلك حيث يشعر الطفل ان اباه ينافسه فى مصدر لذته الاولى ويتكون عنده شعور الغيرة والكراهية نحو ابيه ويضطر لكبت هذه المشاعر غير المفهومة لديه والتى لا تتسق مع العاطفة الابوية الحانية التى يبديها ابوه تجاهه

ومع اقتراب سن المراهقة يصاب الصبى بالدهشة من التغيرات التى تحدث لجسدة ويبدأ فى استطلاع الامر مع اقرانه من الاولاد ويكتشف انهم هم ايضا يمرون بنفس التغيرات البيولوجية وقد يتطور الامر الى عقد المقارنات بين حجم العضو الذكرى بين الاولاد وتكون الطامة الكبرى لو اكتشف ان عضوه صغير الحجم فيصبح محل سخرية من اصدقائه وتتكون فى نفسه عقدة جديدة ولكن خطيره تصاحبه طول عمره وتحدد علاقاته بالاخرين من الجنسين وقد تدفعه للتفوق او الفشل ، وصاحب هذه العقدة يتكون لديه هاجس انه لن يقدر على اسعاد زوجته ويبتعد عن المشاركة فى الالعاب الجماعية والمعسكرات والبعد عن السباحة خوفا من ارتداء المايوه فيظهر نقصه ويتعذب طبعا الى ان يرزقه الله بزوجه ذكيه تفك عقدته

اما صاحب العضو الكبير فيتكون عنده شعور التفوق ويباهى بنفسه عند كل فرصة وعادة يكون شخص مقتحم ويميل الى البذاءة فى الكلام ويشارك فى المنافسات من نوعية كازانوفا له تجارب جنسية مبكره ترسخ فى نفسه سوء الظن بالبنات معتقدا انهن فريسة سهلة المنال ، ويحاول النيل من البنات كلما امكنه ذلك ولو وجهت اليه صفعة على قفاه او شلوت فى مؤخرته ولم يستطيع اشباع شهواته يصاب بالكبت الجنسى

وقد يقدم الفتى على التدخين متذكرا اللذه والمتعة التى حصل عليها من ثدى امه فتصبح السيجارة مثل البزازة لا يستطيع الفكاك منها

ثم يمر بمرحلة التعامل مع الدين ( اى دين ) الذى يحض على الفضيلة فيحدث له صراع بين غرائزه وبين ضميره الدينى حديث التكوين

وهكذا يواجه الشاب الحياه وهو يحمل على ظهره كل العقد وفى نفسة كل انواع الكبت فكيف تتعاملين يا فتاتى مع هذا الرجل ؟ هل عندك الحكمة والكياسة التى تمكنك من سبر اغوار نفسه لتتمكنى من التعامل مع مثل هذا الكائن المعقد والمكبوت ؟

اقترح على كل بنت مقدمه على الزواج او عروسة او حتى سيدة أم لاطفال ان تقرأ قليلا حول الموضوع وان تنتهز اى فرصة يسترخى فيها زوج المستقبل او الزوج الحالى و تقوله فضفض يا حبيبى قول اللى فى نفسك احكى لى عن طفولتك متخبيش حاجه

هو ده مفتاح قلب وعقل الرجل والله اعلم




الخميس، أبريل 10، 2008

بلاها رجاله




الحقيقة انا لم اكن اخطط للكتابة فى موضوع المرأة والرجل ولكنى مفروس من بعض النساء اللى دايما عاملين مناحة ضد الرجالة وعمالين يقولوا الرجالة ظلمة والرجالة بيستعبدوا النساء والست شايلة الراجل وبتضحى علشانة الى اخر هذه الاسطوانة المملة وبعدين قريت بوست عند مدونة صديقة بتوصف حال الست المبهدلة فى هدومها والمفشكلة فى شكلها او اللى عندها انيميا و بتتصعب على ايام الاناقة والشياكة وايام لما كانت الست بهية الطلعة وبهية وياسين

فهل الست اللى شكلها كده مبهدلة ومفشكلة وريحتها لامؤاخذة فايحة عرق عاوزه راجل شيك واللسطة طيب على ايه يعنى ؟

والست اللى لسانها طويل ونكدية عاوزه راجل ألافرانكة يقول لها ميرسى مدام و ينحنى علشان يفتح لها باب العربية طيب ده يبقى كلام منطقى ؟

والست اللى عمرها ما قرت غير باب البخت و فضايح النجوم فى مجلات لبنان عاوزه راجل لبق يتحدث اللغات و يحاضر فى المؤتمرات ويخليها تقابل السفير البريطانى فى حفلات الكوكتيل دى تبقى ست بتفهم وعندها نظر؟

والبت المفعوصة اللى مقضياها مع الشباب على شط النيل فى انصاص الليالى وفى العربيات فى المقطم والتجمع الخامس فى الاماكن المظلمة وفى الكافيهات عاوزه بعد ما تعمل العملية اياها شاب بنكير بيشتغل فى الخليج يعيشها فى شقة على النيل ويتفضل يسافر هو يشوف شغله وهى تعيش حياتها مع حبايبها الروشين يبقى ده كلام يمشى تحت بند ايه بالذمة ؟

والبنت اللى ما تعرفش تسبك الاكل ولا تعمل ملوخية ولا محشى ورق عنب ولا تعرف تخلل زيتون او ليمون معصفر او تعمل مربى جزر او تخيط الزرار اللى وقع من القميص او تلفق الخرم فى الشراب و لا عمرها مسكت فرشة نظفت ارض الحمام ولمعت التواليت ولا خزنت بصل وتوم فى البلكونة ولا وقفت على الحوض اخدت لها فومين غسيل ومقضياها على الشات والفيس بووك وعاوزه تتجوز قبل ما تعدى الثلاثين دى تبقى واقعية ؟

والست اللى جوزها طافح الكوته ( موش عارف يعنى ايه كوته ) تمنتاشر ساعة فى اليوم لا بيشوف منى الشاذلى ولا مى الشربينى ولا هيفا وقاعد قدام الكمبيوتر بيشتغل اوتوكاد او بيسوق تاكسى باليل بعد شغلانة الصبح ويحاول يقرب ليها يعنى عاوز يحس شوية انه انسان ولسة عايش تقوم تديله ظهرها وتروح فى النوم عشان ورانا مدارس العيال الصبح وهو انت لسة فيك حيل يا عبده ؟ دى تبقى تتصنف من اى فصيلة ؟
والست اللى ولدت قيصرية من غير لازمة فى المستشفيات الاستثمارية الفندقية علشان حبة عين مامتها موش بتقدر على وجع الطلق والولادة الطبيعية و بترضع البيبى البان صناعية علشان لامؤاخذة صدرها يفضل على جماله وعندها babysitter فليبينية و butler انجليزى و chauffeur نوبى ( مع الاعتذار لاهل النوبة انظف ناس فيكى يا مصر ) ياخدها لاجتماعات ال inner wheel club علشان تقول كلام عن تضحية المرأة وتفانيها فى خدمة الاسرة و من طراطيف مناخيرها تتهم الرجل بالقسوة والسيطرة المادية على مقدرات الاسرة وعدم استقلال المرأة ماديا وازاى تاخد نص نصيب الراجل فى الميراث بس وازاى الراجل طايح يتجوز مثنى وثلاث ورباع والمجتمع سايبه على حل شعره الخ الخ من الكلام اللى حفظناه ، دى تبقى ست طبيعية؟

يا جماعة فوقوا بقى هما دول الرجالة المتوفرين فى السوق هما دول الرجالة اللى ربوهم امهات من جنسكم ستات زيكم والعملة الرديئة بتطرد العملة الجيدة من السوق والبنات موش لاقيه جواز وعنسوا والشباب لامؤاخذه هرموناته بتنقح عليه وموش عارف يتصرف
ونصيحتى ان الست اللى موش عاجبها جوزها تتطلق وتحصل على الحرية المنشودة بلاها رجاله والعيال حيتربوا حيتربوا بأى طريقة
والبنات تبطل احلام وترضى بالحاضر والموجود يعنى take it or leave it وشوفوا اللى بيحصل على ارض الواقع فى قرى الصعيد البنت بتتجوز عند البلوغ وبتشتغل جنب جوزها فى الغيط والاتنين شايلين بعض والعيال بلابيص عشان مافيش هناك بامبرز والارض عاوزة سماد واخر النهار يرجعوا بيت العيلة اللى عايشين فيه مع جدهم واعمامهم واخوالهم واخواتهم يقعدوا ياكلوا ع الطبلية ويشربوا الشاى وكل واحدة تاخد راجلها ويناموا ع الفرشة مرتاحين البال

الأحد، أبريل 06، 2008

حكمة العقل وضلاله


هل يستطيع العقل الانسانى تفسير الوجود تفسيرا ذاتيا دون مؤثر خارجى من فكر او خلق او عواطف او اخلاق؟
عملية التفكير تلك الطاقة المتولدة والمتجددة، اشبه بحبل يستلم العقل اوله و يحاول ادراك منتهاه ، هذا الحبل منسوج من محصلة نشاط العقل الانسانى الجمعى ، فماذا عن العقل الاول اى حبل استلم ما هى البذور التى ذرعت وانبتت فاتخذها العقل مطية وبراقا ؟
كيف يعمل الوحى فى العقل فبيستبعد الشك ويختار الايمان ؟
لقد كلم الله موسى تكليما ، ورأ ت مريم الملائكة فبشرتها بكلمة الله ، ونزل جبريل بالوحى على قلب محمد بن عبد الله صلى الله عليه وسلم ، فماذا عن باقى الانبياء والمرسلين كيف عرفوا انهم يوحى اليهم ؟ هل كانت لهم عقول ذات وضعية خاصة قابلة لاستقبال الوحى ام كانت لهم قلوب يبصرون بها ، فيحملهم الوحى على تحمل ما لا يطيقة البشر العادى لتغيير الناس ؟
كيف يفسر العقل الانسانى الظواهر الطبيعية ؟
هل الاكتشافات العلمية المعملية جهد عقلى محض؟
تشاهد الحواس تواتر ظواهر بعينها وتكرارها فتؤخذ تلك الظواهر الى المعمل لتعرض على المنهج العلمى فتفرض النظريات مقدما ثم تجرى التجارب لاثبات الفروض وجعلها حقيقة ويقين ، هل المنهج العلمى هذا يمكن نقضه و هدم قوانين الحركة والاستاتيكا والضوء والحرارة والكيمياء والذرة واعادة تفسير الكون على منهج مختلف يبدأ بتحليل الظواهر قبل افتراض الحقائق ؟
هل يخسر العقل الانسانى معركته فى حل لغز الموت ؟
هل يلعب الحدس دورا ؟
كيف يفتح الحدس ابواب مغلقة امام العقل ؟
هل الصدفة هى جائزة العقل عندما تعانده المادة ؟
هل العلماء مختارون مثل الانبياء ؟
هل النظريات العلمية معجزات اختص بها الله العلماء وهداهم الى الحكمة ؟
هل العقل الانسانى مستغنى بذاته عن هدى الله ؟
لماذا يضل العقل الانسانى وتكتنفه الهلاوس والاباطيل ؟
لقد عرف التاريخ عقول سوداوية شريرة تمجد الطواغيت والشياطين وتكره بنى البشر على ارتكاب المجازر تحت مسميات تنقية العنصر البشرى والتطهير العرقى اونشر الحضارة وتدفع لاتيان الفواحش والمنكرات و تستنكر انسانية النساء
كيف يقبل العقل الانسانى ان يكون الاله حجرا صنما او بشرا فانيا؟
اين يوجد العقل الانسانى ؟