الثلاثاء، أبريل 24، 2012

اليك

كان سهل جدا الوقوع فى الخطأ المشهور وهو النظر لاحداث الحياة على انها دائما منطقية حتى وهى تتغير 
وكنت اراك دائما من المسلمات التى تشبه العقائد الدينية ثابتة ومتسقة مع العقل والمنطق ، ولكنى كنت على خطأ 
تغيرت و تبدلت الى طور اخر خارج الحسابات ويمكن خارج حساباتك انت ايضا وحتى الان لا اعرف على وجه اليقين سبب تغيرك فى الوقت الذى ظننت انك لن تتغير وستواصل الصعود
وقد اكون قد فشلت فى رؤيتى وفى توقعاتى من البدء وانك فى الحقيقة لم تتغير بل كنت على نفس الدرب الى النضوج والحرية من ربقة تحكمنا فى حياتك وفى تحركاتك كما اخبرتنى فى مفاجأة من مفاجأتك المتعددة 
على اى حال انا سعيد باجتهاداتك ومحاولاتك لانك اعتبرت كما اخبرتنى انك نجحت فيما حاولت ان تكون عليه بغض النظر عن اتفاقنا او اختلافنا  
يكفينى ذلك ان اكون راضيا 

الأربعاء، أبريل 18، 2012

اليك

كريم انت فى كل حال وفى كل وقت ،عرفت كيف تتخطى ذاتك لتسعد الاخرين ربما اكثر من المتوقع بحث تصيبهم بالدهشة ولكن ما ابحث عنه عندك اكثر من اى شيء هو التسامح وقد يكون التسامح باب من ابواب الكرم والخير وانت جدير بهما معا ولكنى ابحث عن اشارة او امارة فهل ذلك فى الحيز المتاح ؟

الجمعة، أبريل 13، 2012

اليك

فكرة غريبة بتراودنى وليه لأ ممكن يحصل ويمكن زى الاحلام او الرؤى حد فينا يقدر يعبر ويعدى ويحدث لقاء بصورة او باخرى 
النفوس كلها تقبض ثم بعضها يعود والاخرى تبقى ، هل فى مكان ما ولا ياترى فى زمان ما ولا فى وعاء له ملامح الزمان والمكان معا لست ادرى ولكن حيث ان هذا الوعاء اكيد مخلوق ويتسع لنا فلا حرج من المحاولة 
انت كمان حاول من عندك يمكن ننجح ولو للحظات 

الخميس، أبريل 12، 2012

اليك

كل مرة فى المسجد اى مسجد افتكرك  و يمكن العلاقة تكون واضحة وباينة لكن الحاجة اللى بتخلينى ابتسم  لما كنا بنصلى فى نادى الجولف فى الاسماعيلية وانت صغير ولما اديتنى جزمتى وقلت لى اتفضل دعى  واحد من المصلين لك وقال فضلك الله 
ارجو ان يكون دعاء قد استجاب الله له  

الثلاثاء، أبريل 10، 2012

اليك

انا سعيد انك بتيجى تشوفنى ، باشعر بانفاسك وكمان ممكن اشم ريحتك دايما معايا و بادور الحكاية فى راسى وموش قادر اتكلم عنك مع حد مع ان كتير لسة بعد المدة الطويلة دى بيجيبوا سيرتك ويعلقوا على صورك ومع ان ده بيسبب لى بعض الحزن لكنه حزن له طعم خاص 
ومش قادر استوعب وكمان موش قادر ارفض لانى موش شايف كل حاجة وخايف اعترض على المشيئة يمكن ما نجتمعش مع بعض مرة تانية ومين انا علشان اعترض ومين يقدر 
انا بس عاوز اتاكد ان زعلك منى كان ظاهرى موش ف قلبك وصاحبك اكد لى كده لكن يمكن ما فهمش كلامك كويس 
مشتاق لحضنك الكبير يوم ما رجعت فاكر فى المطار لما ضمتنى وبكيت بعد فراق سنة كاملة دلوقتى ممكن من فضلك حتى اتخيل اللحظة دى تانى ؟