الاثنين، أبريل 21، 2008

what goes around comes around



فتحت على نفسى باب من العذاب لما صدقت الدكتور محمد نجيب اللى كان بيحاضرنا فى الجامعة الامريكية عن اهمية الوقت وازاى نقدر نستفيد من كل دقيقة فى اليوم وكانت محاضراته ضمن برنامج ادارة المشروعات فى مركز عبد اللطيف جميل ( مع تعطيش الجيم )

و الدكتور نجيب من ظرفاء العصر وابن بلد وابن نكته و بالطريقة دى دخل قلبى وخلانى اصدق كلامه موش بس لان الاستفادة من الوقت بقى علم اساسى فى الادارة الناجحة ولكن لانى كمان حسيت انه مؤمن بالكلام اللى بيقوله فى المحاضرات

وبعد كام محاضرة لقيت نفسى اشتريت نوته مكتوب عليها Things to do
بدات اسجل فيها الصبحية قائمة المهمات اليومية وارتبها حسب الاهمية و احدد الوقت المطلوب للبدء فى المهمة والوقت المناسب علشان تخلص

وبقيت لما اقابل اصحابى وقرايبى ابص فى الساعة فى بداية اللقاء وبعد شوية استاذن بحجة انى موش فاضى الاجندة مزدحمة واجرى علشان الحق اللى ورايا وادوس على الكلاكس بعصبية وفى الشغل بقيت اقول للمدير بص يا افندم الحاجات اللى سعادتك بتطلبها وبتكون مستعجل عليها لازم نتفق الاول عليها هى مهمة ولا مستعجلة علشان اقدر اوضب الاجندة لان الحاجات المهمة وموش مستعجلة بتعمل انتربشن ( interruption ) لجدول المهام فالراجل يبص لى بشك وارتياب ويهز راسه ويسكت او ينفجر ويزعق فاعرف ان المطلوب موش بس مهم لا مستعجل كمان واضطر اعدل الجدول بتاع اليوم

وطبعا يطير من عينى النوم لو فى مهمة ما اتعملتش واقعد اضرب اخماس فى اسداس ازاى ح اقدر احشرها فى اجندة المهام بتاعة تانى يوم

وتطور الموضوع الى انى حطيت برنامج البريمافيرا ( اللى ما يعرفوش مايشغلش نفسه ) و اصبحت ماشى باللاب توب على طول فى النادى وفى عيادات الدكاترة وفى الحمام ، عمال انظم فى وقتى وفى حياتى وفجاة نورت فى مخى فكرة ، طيب يا واد ماتنظم ميزانية البيت بالمرة وما كدبتش خبر وحطيت سوفت وير للميزانيات وبقيت اسجل ربع جنيه للمنادى و واتنين جنيه عيش فينو وثمن الخضار والفاكهة واراجع مع المدام والاولاد كل مليم بينصرف فى البيت واتخانق وازعق بكام المصاصة والشيبسى موش كان بنص جنيه ايه اللى غلاه يا غجر فين الفواتير ، وهكذا شوية شوية بقيت زى العلماء المجانين اللى بيطلعوا فى الافلام شعرهم منكوش ودقنهم طويله وف حالة ذهول مستمر وسرحان وعكننه و امساك وكوابيس

وفجأة وبدون مقدمات ضربت الويندوcrashed وقعدت ابص على الشاشة الزرقا وانا موش مصدق انى نسيت اعمل backup وحسيت بعرق غزير فى شعرى ونزل العرق على قفاى وظهرى

مستسلما ارحت ظهرى على الكرسى ومديت رجليه وغمضت عنيا شوية ثم شميت ريحة الاكل طالعه من المطبخ فشعرت بالجوع الشديد وقمت على مهلى على السفرة فإذا بالاكل فى طبق جديد وكنت على وشك سؤال المدام عن ثمن الاطباق الجديدة ومنين اشترتهم ، لكن ترددت قليلا ثم غيرت رايى وبدأت امضغ الاكل على مهلى خالص وعلى شاشة التلفزيون كان فريد الاطرش بيغنى الحياة حلوة بس نفهمها فسرحت ونظرت مرة اخرى فإذا بصورة فريد الاطرش تتبدل ويطل الدكتور محمد نجيب من الشاشة مبتسما وعينه بتغمز

هناك 66 تعليقًا:

canary يقول...

ايوة يا عم طبعا
نفهم من كدة انك من بتوع الجامعه الامريكيه
وانك من اهل اللاب توب الاثرياء
وطبعا مدام فيه ربع جنيه للمنادى تبقى من اصحاب السيارات
ادخلنا الله واياهم جراج واحد
واطباق صينى جديدة كمان جابتهم المدام معنى كدة انك عندكو اطباق قديمه بقى لا وايه كمان بتاكلو فيها
والادهى والامر انكو عندكو اكل وطبيخ بدليل الريحه
هو البوست كان عن ايه؟؟؟ النظام؟
نظام ايه بقى يا عم اللهم لا حسد دة انت عامل بوست عشان تعايرنا بيه
وهقطع دراعى ان مكان الانترنت عندك اشتراك شخصى مش شبكه
ارزاااااااااق

Salwa يقول...

أولا
تعليق canary
ضحكني ضحك
مش قادره أقول

طلعت إقطاعي يا راجي
هههههههههههه

***************
ثانيا
الجزء الأخير بتاعك

كان فريد الاطرش بيغنى الحياة حلوة بس نفهمها فسرحت ونظرت مرة اخرى فإذا بصورة فريد الاطرش تتبدل ويطل الدكتور محمد نجيب من الشاشة مبتسما وعينه بتغمز

حد يعمل كده
كل شئ بالحساب
ولاب توب وسوفتوير وربع جنيه
ياخبر
ده شئ يجن
بس مش إنت الوقت كويس
يعني مرحله عدت والحمد لله
طيب الحمد لله
تجربه جديره إنك تكتب عنها
خالص تحياتي

راجى يقول...

كناريا

الله يخرب شيطانك، كل ده يطلع منك ؟

خمسة وخميسة

الجامعة الامريكية حضرت فيها دورة فى ادارة المشروعات ودى علاقتى الدراسية بيها وكمان حضرت فيها فى قاعة ايوارت بعض الحفلات والندوات

وانا حرمت اجيب سيرة ريحة الطبيخ تانى علشان الفتنة اكبر من القتل

ياختى كميلة ياختى

راجى يقول...

سلوى

ايوه بجد الايام دى كانت بؤس الله يسامح الدكتور نجيب

وطبعا ده بيوضح انى راجل على باب الله عندى مشكلة عويصة ان اليوم اربعة وعشرين ساعة فقط ، ليه ميكونوش ستة وعشرين ولا حتى تلاتين

بس انا بقيت كويس دلوقتى بالرغم من الانهيار العصبى اللى على وشك يحصل لى من فلوسى اللى بتطير اول باول وموش ملاحق عليها

شرفتينا وانستينا

بنت القمر يقول...

رااااجي
فين صورة البروفيل القديمه رجعها فورا انا اتخضيت من الصورة دي وافتكرت
انه مش انت وبعدين دست علي اللينك عشان اتأكد
رجع الصورة يا راجي حرام عليك
بلاش اللي هربانه من فيلم رعب دي
*************************
الصورة يعني انت وانت يعني الصورة وانا هي صورتي وصورتي هي انا
*******************
ثانيا بالنسبه لموضوع حضرتك يحيا ضرب الويندوز
انا ولو اني نشيطه جدا بس كل فترة بهنج
وافقد الحماسه علي اي شيئ وكل شيئ وده بيكون مرتبك بعوامل متداخله والسوفت وير بتاعي يضرب
اقوم من النوم متأخر واطبخ متاخر والعب طول النهار سبايدر سوليتير علي الكومرور
(((:
واضربها طبنجه
وقد تمتد الحاله ايام او ساعات
حسب الضغوط المحيطه وبعدين ارجع تاني زي الفل واتربط في الساقيه
وامشي تمام
من غير ما انسي اعمل باك اب !!وغالبا الاخرين هما اللي بينسوا يعملوا لي باك اب واهنج انا
((((:
ربنا يخلي الاكله السخنه واللي عملتها يا راجي
تحياتي

بنت القمر يقول...

طب والمصحف الشريف
الصورة شبه شيمون بيريز
(((:

MAKSOFA يقول...

ياتري غمزة الدكتور محمد نجيب دي قصدها أيه؟؟؟؟

على باب الله يقول...

خليها علي الله

أماني يقول...

WoW
عجبني جداً البوست على فكرة
و قريب من واحد بفكر فيه و هنزله قريب بس يارب مطلعش أنا أغمزلكوا بعد "كل شئ راح و إنقضى"...نجاة

غير معرف يقول...

nice subject, it is true and i don't know why in our world the things doesn't go straight in spite of same person himselfself doing the same thing in out of country and,he succeed

بنت القمر يقول...

ولا دي برضه
):
خليها ام قميص ابيض
عشان بقا في ارتباط عقلي شعوري بين الصورة واللينك وصاحب الصورة والكلام المرتبط والمدونه في لاوعي اصدقائك الاليكترونيينّ!!!
((:
معلش يا صديقنا الاليكتروني غتاته بقا
تحياتي

appy يقول...

ههههههههههههههههههههه بجد انا قعدت رايحه جايه معاك خيلتنى ومتخيله منظرك
الا مش بيغظنى غير الكلمه دى
Things to do
انا بقى عملاها على التلاجه بس ايه خد عندك لو عندى لحمه باقلها فترى اكتب افرجى عن اللحمه المعتقله كده يعنى بسلى نفسى
فى نفس الوقت بعمل الحاجات بس مش بهستريا ههههههههه
فعلا الحياه بسيطه وسهله بس نفهما

ra7eel يقول...

هههههههههههههه

لا بجد مشكله انا عن نفسى لما جيت جربت موضوع تنظيم الوقت ده حسيت انى مقدرش اعيش بالورقه والقلم فى كل حاجه فىحياتى بحب احس انى فرى اعمل اى حاجه فى اى وفت وخصوصا ان فى حاجات كتير بعملها بتكون وليده لحظه مش مسبق الترتيب ليها

اقولك خليك مع فريد الاطرش احسن الحياه الحلوه

تحياتى وتقديرى

راجى يقول...

قمر

انا غيرت الصورة عشرين مرة علشان اترعبت من فكرة انى ممكن يكون عندى اى شبه من قريب او بعيد من شيمون بيريز
وأمر يا قمر

راجى يقول...

maksofa
طبعا الدكتور نجيب شمتان فى حالى علشان بدل ما احصل على السعادة من تنظيم الحياة حصل العكس وبقيت شقى

منورة دايما

راجى يقول...

على باب الله

ونعم بالله

تحياتى نورت وانست

راجى يقول...

امانى

انا مبسوط ان البوست عجبك وفى انتظار البوست اللى حتكتبيه عن نفس الموضوع وساعتها بقى انا اللى حاغمز :))))

اهلا بيكى يا امانى نورتى

راجى يقول...

غير معروف

Because the key to success is the team work within a discipline
In our country we have none of those
I don't know why I have the hunch that we know each other, do we ? you welcome anyway

راجى يقول...

appy

اهلا بيكى من جديد ايتها الصديقة العزيزة

والنبى لما تفرجى عن اللحمة المعتقلة ابقى افتكرى اخوكى الغلبان علشان كنارى ماتقرش عليا

منورة يا جميل

راجى يقول...

سارة

اهلا بيكى نورتى ، والله انا فى الشغل لازم انظم الوقت والا الدنيا تخرب وفى البيت برضو بس على خفيف والمشكلة دائما ضيق الوقت

اشكرك على المداخلة ولكى التحية

canary يقول...

شوف بقى يا كبير انا معنديش اى فكرة عن كيفيه اضافتك الى الفيس بوك
شوف انت الاجرائات الواجب اتخاذها فى هذة المعضله وانا وراك يا معلم

راجى يقول...

كنارى

ولا حاجة ، اكتبى
ragishokry@hotmail.ocm
فى الحتة بتاعت ال

search

على الفيس بووك ، وبعدين اديها بالماوس حتلاقينى طلعت لك على طول تقومى تطلبى انى اكون على قائمة اصحابك ، اقوم انا اوافق وخلصت الليلة
وسوف تجدى بين اصدقائى العديد من المدونيين الحلوين

ماشى يا جميل؟

Sherif يقول...

هايلة .. ومنتهى الواقعية

ظريف محاولة تنظيم كل شئ .. لكن تضحكون وتضحك الاقدار ..

برضه الأكل الجميل ذو الرائحة الجذابة فى جو كله حب وبهجة .. كفيل بمسح كل المتاعب ..

بالمناسبة فقد رشحت حضرتك لعمل تاج .. اذا شرفتنى ستجد الدعوة

تحياتى اليك

loumi يقول...

العزيز راجي

دمه خفيف البوست ده
:):):)

وهو إنت أي حاجه تسمعها تصدقها؟
:)

تحياتي لك

canary يقول...

انا بعت الاضافه لكن مش عارفه بقى ظروفها ايه والا وصلت او تاهت فى الطريق الرجاء الافادة

راجى يقول...

شريف بك

اولا ادعو الله لك بمعمرة مقبولة انشاء الله
ثانيا حاضر يا باشا انا حاعمل التاج وتحت امرك

وترجع بالسلامة انشاء الله

راجى يقول...

لمى العزيزة

طبعا انا عشان قلبى طيب باصدق اى حاجة:))))

راجى يقول...

كناريا

طيب دورى على

ragi shokry

معلش بقى تعبتك معايا بس تستاهلى اللى يجرا لك

dr.Roufy يقول...

رغم العشوائية التسيب الذي تتسم به حياتي
ورغم اني من أشد خلق الله اهدارا للوقت
ومعاناة من الزنقة في الآخر يعني
:))
الا اني لا أفكر في تغيير تلك العشوائية المبهجة
ولم افكر في وضع بريمافيرا يوما على اللابتوب
ولا تنظيم مواعيدي في نوت
ربما اصبحت مدمنة بوهيمية وعشوائية
لكني استمتع بهما وربما بالزنقة الى في الآخر كمان
:))
أمخاخ بقى

راجى يقول...

دكتورة روفيدا

ايوه طبعا مافيش احسن من البوهيمية فى مواجهة المطلوب انجازة فى الشغل وفى البيت
وعلى رأى بنت القمر ،المفروض الواحد يضرب الدنيا طبنجة عيار 100 مم علشان تحوّء

لكن ، واه من لكن دى حكاية البوهيمية والطناش ما تنفعش معايا للاسف لانى مزنوق على طول وبدون متعة

تحياتى يا دكتورة بس بعد ماتتخرجى البوهيمية ما تنفعش :)))

blackcairorose يقول...

راجى

لو الامور ماشية كويس بقالها سنين خلاص العملية مش محتاجة تظبيط بعد كل الوقت ده وكومبيوتر وسوقت وير الخ

خليها ماشية زى ما كانت ماشية

بنتالقمر قالت انها افتكرت الصورة شارون

انا على طول جه فى بالى انها زى صورة المخرج شريف صبرى

فينك يا روبى

canary يقول...

بقولك ايه انت خليتنى اماله ابعت دعوات على الهوت ميل وعلى الاسم بتاعك
لحد ما الفيس بوك بعد كدة هيتف فى وشى ارحمنى بقى الله يخليك
وشوفلك حل عشان انا دخلت فعلا على الاسم وبعتلك الدعوة
حتى بالامارة حاطط فيها الصورة اللى واحدة مدونه قالت عليها شبه صورة شيمون بيريز

راجى يقول...

blackcairorose
روبى !!!....روبى!!! الاسم ده انا سمعته قبل كده فين ؟ ياترى فين؟
الظاهر انى هنجت ومحتاج setup من تانى
المشكلة يا وردتى ان الامور موش ماشية لوحدها ولكن اختناقات الحياة بتفرض ان الانسان ينظم وقته ونشاطه شوية
اشكرك على المداخلة ولو بس تدينى اى امارة بروبى حافتكرها على طول:)))

راجى يقول...

كناريا

خلاص يا جميل بقينا اصدقاء على كتاب الوشوش
مبروك

nody_1987 يقول...

جميل جدا ان يكون الانسان دقيق ومنظم فى عمله
ويحترم الوقت احترام مقدس
افتكر لو نص الشعب كده كان اتغير حالنا
ده على المستوى العملى
انما بقى الحياه الاسريه
فا اسمح لى ما ينفعش خالص
ان الواحد يكون عايش فى دفتر للحسابات
الغدا بكزا
وعلبه الشار بكزا
واتفسحتى بكام
وها نصيف بكام
دى تبقى حياه ممله وسئيمه جدا
النظام موجود
بس بارضه التغير والسلاسه مطلوبه
يمكن انا ده راى لانى بكره حد يسالنى بكام؟
اسفه على الاطاله

مـ~ـاجدولين يقول...

تذكرتني لما انتسبت لمنتدى البرمجه العصبيه على نصيحه صاحبتي

عملت حاجات غريبه :)

بوست دمه خفيف بقدر ماهو واقعي

راجى يقول...

nody
والله كنا من وقت قريب لا نحمل هم مصروف البيت وكانت الفلوس لها قيمة ، اما فى هذه الايام رزم ندقق

وشكرا

راجى يقول...

ماجدولين

اشكرك يا صديقتى على الاطراء

mostafarayan يقول...

عارف انا في كل مرة كنت بقول هعمل خطة كذا وكذا مش عارف ايه كانت بتفشل
وكل مرة كنت فيها بسيبها علي الله كانت النتيجة بتبقي احسن مما انا عايز
صحيح يجب ان نأخذ بالأسباب ولكن يجب ألا ننسى رب الأسباب
لازم يا راجي نبسطها علشان تتبسط ونفكها علشان تتفك

راجى يقول...

مصطفى بك

التوكل ام التواكل هو ده السؤال اللى لازم نجاوب عليه

اشكرك يا صديقى على الزيارة والمداخلة

dodda يقول...

البشمهندس المدون الجامد جدا راجى بك
مرسل طيه دعوه للمرور بمدونتى المتواضعه وقراءة اخر بوست
احداث يومى كانت مش حلوه فبل دخول المنطقه البيضاء قلت لجوزى وصيتك البلوج
واول ما رجعت قعدت احكى لحماتى عليك
والمنطقه البيضاء فيها الوقت والساعات كلها بيضاء
وكان فى دكاتره كتيربس محمد نجيب مكانش هناك
واخر مره فى حياتك تحاول تغيرصورة البلوج
ده رأى الاغلبيه وعاملين عليك رباطيه

الباحث عن الحقيقة يقول...

هو انا اعتقد
اننا بنظم وقتنا علشان نستمتع بيه
وان لما كل حاجة تمشى بنظام هتكون اكثر راحة وسعادة
انما انت كنت راجل نكدي
تلاقي الويندوز ضرب علشان كان بيتأخر في الفتح
ولما يتأخر تسأله اتأخرت ليه
وافرض هنج منك ..ياه تبقى ليلته سوده
اخدها من قصيرها وضرب
ضحى بنفسه علشان خطرك
عيش بقى واستمتع
هو ان مكنش ليه وبكام
اوعى تحسب اللى اتصرف علشان ما تقعدش تقول كام وليه وازاى ومش هنخلص
بص فاضل قد ايه وهتقدر تنجز بيه ايه وازاى
وختاما
سلملي على شيمون بيريز
يا اقطاعي
ههههههه
عندكم طبيخ كمان هههههه
واطباق صيني
ومنادي وعربية
انت فلت ازاى من الثورة
انا هبعتلك ابن عم عبد الواحد الجنايني واسمه الحركي كناريا
اوعى تكون بنتك اسمها انجي انا بحذرك
ههههههه
تحياتي

عاليا حليم يقول...

حاجة تربك صحيح

ما تبقاش تصدق حد تانى

راجى يقول...

dodda
خلاص حرمت اغير الصورة وسلمى لى على حماتك:)))

راجى يقول...

الباحث عن الحقيقة
ماشى يا عم مقبولة عشان بحبك :)))

راجى يقول...

عاليا

صديقتى العزيزة انتى لو سمعتى الدكتور محمد نجيب بيحاضر حتصدقى اى حاجة حيقولها
وايه اخبارك واخبار المجلة؟

Sara Swidan يقول...

أنا رأيي إن مافيش حاجة تضيع الوقت ..

قد التخطيط التفصيلي له ..

التخطيط كويس ..

لكن الحزافير و كل النفاصيل دي ..

جنان يعني

راجى يقول...

سارة

يا صديقتى العزيزة جدا ، التخطيط ووضع البرامج الزمنية لاى مشروع ولو كانت الحياة نفسها لو اعتبرنا الاستمرار على قيد الحياة مشروع العمر ، هو شيء مهم حقا
حيث تخدد الاهداف والموارد ثم التكاليف ثم تحدد نقاط الميل ستون
milestones
وهوب يلا نعيش ونشتغل ده بيكون مرة واحدة لكل مشروع نحط الحذافير جميلة قوى الكلمة دى نحط الحذافير والتفاصيل وتبقى الخطة اكتملت
واثناء التنفيذ بتحصل مشاكل وتحتاج الخطة الماستر
master plan
الى تعديل او تحديث ويستمر المشروع الى نهايته

التكة هنا هى الباك اب علشان التعب ميروحش هدر

لكن والله مافيش احسن من الخطط والبرامج وتنفيذها والاحساس بذات الانسان وهويته لما يحقق الاهداف

شكرا يا سارة

someone in life يقول...

راجي

شكرا لردك علي التاج .. وضح كتير من شخصيتك انا ايضا احب فتره الستينات جدا مع اني ما كنتش موجوده لكن الصور و حكايات ماما و الأفلام خليتني اتمني اعيش فيها .. بالراحة علي العيال هما ملهومش ذنب في الغلاء ده و بلاش ميزانيه البيت بالذات لانك هاتتعب قوي دي بالذات سيبها على ربنا .. تحياتي

ذو النون المصري يقول...

و الله ظريفه حكاية تنظيم الوقت و بتفيد لاني فعلا في احدي المرات كان امامي شغل كتير جدا و كتبت المطلوب كله في ورقه و بدات اعلم زي ما بتقول اكتب المهم فالاهم و املا اوقات الفراغ بمهام مطلوبه و فعلا انجزتها كلها و كان استحاله اخلص نصها من غير تنظيم لكن للاسف انا مبنظمش الوقت الا اذا كنت خلاص بفلفص من كتر المهام المستعجله

راجى يقول...

someone in life
يا سيدتى العزيزة اشكرك على الزيارةوالتعليق وعلى فكرة بقى عندى طلب ارجو ان ماتكسفنيش وتغيرى الصورة الكئيبة دى واحدة بتبكى دم ؟؟ خليها على الله واقبلى على الحياة
ايه رأيك تنضمى لشلة المدونين على الفيس بوك ؟ عندك اكونت؟

راجى يقول...

ذو النون المصرى

واحشنى ياراجل من زمان وانا مقصر جدا فى زيارة مدونتك الجميلة اصل الاجندة مليانة والمهام مزنقة :)))
لكن انت سباق بالخير اشكرك ولك منى التحية والسلام

someone in life يقول...

شكرا للدعوة للفيس بوك ايوة عندي اكونت عاوز الاسم ولا الايميل للاضافه؟
marooo_96@yahoo.com
بالنسبة للصورة حاضر هاحاول

مياسي يقول...

الحمدلله اللي ضرب الويندوز أحسن ما يضرب شي تاني لووول

ما دام الله فاتحها من وسعو ليه مغلب حالك؟؟

خلي الأولاد و المدام عايشين

أنا عن نفسي عمري ما حطيت جدول لأني عارفه عمري ما رح أمشي عليه أبدا

شو هو هاد البرنامج كمان مره من باب الفضول؟

Misrdream يقول...

مدونتك متميزه تقبل تحياتي

Sherif يقول...

عزيزى راجى باشا

دعوت لك فى الكعبة بأن يصلح الله كل أحوالك ويوفقك .. ويرزقك من أوسع الأبواب .. ويحفظك من كل شرّ

ربنا يتقبل دعواتى

آمين

someone in life يقول...

راجي

هل جف النهر ؟ ام الامطار لم تهطل بعد ؟

Cleo يقول...

أظن لذلك فإن أعمار سكان المناطق البدائية والبدو على وجه التحديد قد تتعدى المائة عام، فى حين انه من لاصعب جدا أن تجد واحدا فقط من سكان مدينة كبرى مثل القاهرة أو نيويورك وقد طعن فى اسن (ماعدا محمد عبد الوهاب ونجيب محفوظ)

غير معرف يقول...

معظم المصريين يبذلون مجهودًا هائلاً في إظهار التدين وادعاء الالتزام بشعائر الدين لكنهم ينسون أن إغاثة الملهوف وإيواء اللاجئ وغوث السائل شيء حميم من صميم الدين، بينما المصريون لم يعد أيهم يطيق اللاجئين العرب، نسمع ونري ونعيش تذمر المصريين من اللاجئين لدرجة التأفف والرفض والتملص، حدث هذا في مهزلة إنسانية مؤسفة حين تخلي المصريون عن نخوتهم وقيمهم الإنسانية والدينية وتخلوا عن اللاجئين السودانيين في منطقة جامعة الدول العربية من سنتين (لاحظ المنطقة اسمها جامعة الدول العربية والتخلي تم علنًا وبمنتهي النذالة مع لاجئين عرب وغير عرب)

راجى يقول...

مياسى

اهلا بيكى ، نورتى المدونة

وسؤالك عن اى سوفت وير بالضبط هل الخاص بالبرامج الزمنية ؟ فهو بريمافيرا
اما الخاص بالميزانيات فهو ميكروسوفت منى
microsoft money
تقبلى تحياتى وارجو مداومة الزيارات

راجى يقول...

حلم مصر
اشكرك يا سيدى ربنا يخليك

راجى يقول...

شريف باشا

اولا نحمد الله على سلامتك
ثانيا وثالثا ورابعا انا اشعر بالامتنان الشديد لك والعرفان بالجميل لتذكر شخصى الضعيف والدعاء لى عند الكعبة المشرفةمما اثلج صدرى فعلا
وادعو الله ان يوفقنى لخدمة سيادتكم فى مجال استطيعه انشاء الله فى حال طلبكم
شكرا شكرا شكرا
جزاك الله حيرا كثيرا وتقبل منك اداء النسك والشعائر
امين يارب العالمين

راجى يقول...

someoneinlife
سيدتى النهر متدفق باذن الله وسوف تقرأين موضوعا جديدا اليوم انشاء الله
تحياتى وتقديرى

راجى يقول...

cleo
صدقتى يا صديقتى فالعيشة فى القاهرة تقصر العمر

ادعو الله ان يمد لك فى عمرك ويمتعك بدوام الصحة

راجى يقول...

غير معروف

مع انى لا احب الرد على الغير معروفين الا انك تغالط الحقيقة
فمصر على تمة عينها زى ما بنقول بالبلدى من الاخوة العرب والاجانب ، بس امشى شوية فى الشارع وانت تشوفهم فى كل مكان وانت اكيد عربى وعايش معانا بس تتعالى على قول الحق انك عايش هنا افضل من عيشتك فى بلدك
على العموم اهلا بيك فى وطنك مصر وكل من يحب يشرف بس احترم الناس اللى فنحوا لك بيتهم وما تعملش زى اللاجئين فى ميدان مصطفى محمود لما عاشوا فى اكبر عشوائية بعد دارفور وارتكبوا من المهازل والموبقات الكثير وانت اكيد عارف كده كويس
شرفت ونورت

غير معرف يقول...

إبراهيم عيسي

معظم المصريين يبذلون مجهودًا هائلاً في إظهار التدين وادعاء الالتزام بشعائر الدين لكنهم ينسون أن إغاثة الملهوف وإيواء اللاجئ وغوث السائل شيء حميم من صميم الدين، بينما المصريون لم يعد أيهم يطيق اللاجئين العرب، نسمع ونري ونعيش تذمر المصريين من اللاجئين لدرجة التأفف والرفض والتملص، حدث هذا في مهزلة إنسانية مؤسفة حين تخلي المصريون عن نخوتهم وقيمهم الإنسانية والدينية وتخلوا عن اللاجئين السودانيين في منطقة جامعة الدول العربية من سنتين (لاحظ المنطقة اسمها جامعة الدول العربية والتخلي تم علنًا وبمنتهي النذالة مع لاجئين عرب وغير عرب) ونجد هذه المشاعر السلبية والسخيفة منتشرة هذه الأيام ضد اللاجئين العراقيين الذين يتهمهم البعض أنهم وراء إشعال أسعار الشقق في السادس من أكتوبر والبعض الآخر يتهمهم بأنهم شيعة يحاولون غزو سنية مصر، وكل هذه الاتهامات والمبررات لعدم احتمال المصريين للاجئين وهذه سمة تكشف كم أن المصري من فقره وقلة حيلته وقهره صار أنانيًا متخليًا عن الدعم النفسي والإنساني والمادي الذي يفرضه عليه دينه وإنسانيته، لكنه لم يعد قادرًا حتي علي تحمل أعباء أنه يدعي التدين، والمأساة الحقيقية أنه لا يوجد بيت مصري إلا وقد سافر منه واحد أو اثنان في السبعينيات والثمانينيات إلي العراق كي يكون نفسه من الشغل هناك وعاد كثير جدًا منهم إلي مصر ليبنوا البيوت في البلد بفلوس العراق ويتزوجوا بفلوس العراق، ولما وقعت العراق ولجأ إلينا العراقيون كان ثمن أنهم بنوا نصف بيوت ريفنا أننا لا نطيقهم ولا نتحملهم، يا ساتر ماذا حدث لنا وفينا؟ حين ضج الفلسطينيون من الحصار الذي نشارك فيه نحن بسكوتنا وجبننا وتواطئنا، ولما انفجر الشعب الفلسطيني في غزة من الحصار والخناق وتهديد الأطفال بالموت والمجاعة فاقتحموا حدود مصر، وجدنا من بين المصريين وخصوصا في الإعلام الحكومي التعس من لا يتسامح مع هذه الأزمة الطاحنة والمدوية وكأن أهل غزة ليسوا عربًا ومسلمين ومسيحيين، كأنهم ليسوا بشرًا وناسًا يستحقون الغوث والتضامن، يكاد المرء يشعر بالذهول من استفزاز المصريين وغضبهم علي ما كان ولا يزال يجري مثلاً في الشيشان وقبلها في البوسنة من مجازر لمسلمين عزل ومدنيين، بينما هذا الطناش وتلك الغفلة التي يعيشها المصريون مع ما يجري في دارفور من ذبح مئات الآلاف من المسلمين والعرب هناك بأيدي مسلمين وعرب وبتنا لا نهتم إطلاقًا بهذه المذابح، بينما الغرب هو الذي يعلن الأسي ويطلب التدخل وساعتها نقول عنه إنه غرب يبحث عن كنوز دارفور وبترول دارفور، ولنفرض أن الغرب كذلك، أين أنت يا سيدي وأين ذهب ضمير العرب وقلب العرب والمسلمين وهم يتفرجون علي واحدة من أسوأ مذابح الإنسانية والتي يستخف بها مسئول سوداني حاول أن يقلل من أرقام القتلي التي تذيعها الأمم المتحدة فقال إنها ليست 300 ألف قتيل بل عشرة آلاف، يا نهار اسود وهوه حتي لو عشرة آلاف فهل هذا رقم ضئيل صغير؟! وكان طبيعيًا بعد كل هذا أن تسقط حكومة مصر في فضيحة دولية وإنسانية حين ضربت وأصابت وأهانت عشرات اللاجئين السودانيين بمنتهي الفظاظة والغباوة، الدولة التي تزعج العالم العربي بأنها الرائدة والزعيمة تتخلي عن لاجئي العرب بل وعن العرب أنفسهم، منين زعيمة ومنين بتخلع طول الوقت، ثم كانت النتيجة بالإضافة إلي الجرسة العالمية أن اللاجئين السودانيين بدأوا اللجوء والسفر إلي إسرائيل فمصر التي لا تطيق اللاجئين السودانيين تجعلهم ذخيرة وقوة وإضافة لإسرائيل شخصيًا.. تحصل علي احترام العالم من جراء استقبالها للاجئين أو تتمكن من ابتزاز العالم طلبًا للمال وللمساعدة من أجل اللاجئين، ثم هي تهود اللاجئين في حربها ضد النسل العربي، ومحاولتها لمواجهة الزيادة السكانية العربية بمنح الجنسية والتهويد للروس من ناحية وللسودانيين وغيرهم من ناحية أخري، لا شك عندي أن حكومتنا ليس لديها عقل ولا قلب لكن الجديد أنها أصابت شعبها بنفس العدوي!
الصفحه الأولى تقارير وأخبار اخبار قصيره راي ورؤى شئون خارجية ملاعب ولعيبة نجوم وفنون أدب وأدباء كل حاجة شخصيات 24 ساعه الأخيره الأرشيف