الخميس، أبريل 10، 2008

بلاها رجاله




الحقيقة انا لم اكن اخطط للكتابة فى موضوع المرأة والرجل ولكنى مفروس من بعض النساء اللى دايما عاملين مناحة ضد الرجالة وعمالين يقولوا الرجالة ظلمة والرجالة بيستعبدوا النساء والست شايلة الراجل وبتضحى علشانة الى اخر هذه الاسطوانة المملة وبعدين قريت بوست عند مدونة صديقة بتوصف حال الست المبهدلة فى هدومها والمفشكلة فى شكلها او اللى عندها انيميا و بتتصعب على ايام الاناقة والشياكة وايام لما كانت الست بهية الطلعة وبهية وياسين

فهل الست اللى شكلها كده مبهدلة ومفشكلة وريحتها لامؤاخذة فايحة عرق عاوزه راجل شيك واللسطة طيب على ايه يعنى ؟

والست اللى لسانها طويل ونكدية عاوزه راجل ألافرانكة يقول لها ميرسى مدام و ينحنى علشان يفتح لها باب العربية طيب ده يبقى كلام منطقى ؟

والست اللى عمرها ما قرت غير باب البخت و فضايح النجوم فى مجلات لبنان عاوزه راجل لبق يتحدث اللغات و يحاضر فى المؤتمرات ويخليها تقابل السفير البريطانى فى حفلات الكوكتيل دى تبقى ست بتفهم وعندها نظر؟

والبت المفعوصة اللى مقضياها مع الشباب على شط النيل فى انصاص الليالى وفى العربيات فى المقطم والتجمع الخامس فى الاماكن المظلمة وفى الكافيهات عاوزه بعد ما تعمل العملية اياها شاب بنكير بيشتغل فى الخليج يعيشها فى شقة على النيل ويتفضل يسافر هو يشوف شغله وهى تعيش حياتها مع حبايبها الروشين يبقى ده كلام يمشى تحت بند ايه بالذمة ؟

والبنت اللى ما تعرفش تسبك الاكل ولا تعمل ملوخية ولا محشى ورق عنب ولا تعرف تخلل زيتون او ليمون معصفر او تعمل مربى جزر او تخيط الزرار اللى وقع من القميص او تلفق الخرم فى الشراب و لا عمرها مسكت فرشة نظفت ارض الحمام ولمعت التواليت ولا خزنت بصل وتوم فى البلكونة ولا وقفت على الحوض اخدت لها فومين غسيل ومقضياها على الشات والفيس بووك وعاوزه تتجوز قبل ما تعدى الثلاثين دى تبقى واقعية ؟

والست اللى جوزها طافح الكوته ( موش عارف يعنى ايه كوته ) تمنتاشر ساعة فى اليوم لا بيشوف منى الشاذلى ولا مى الشربينى ولا هيفا وقاعد قدام الكمبيوتر بيشتغل اوتوكاد او بيسوق تاكسى باليل بعد شغلانة الصبح ويحاول يقرب ليها يعنى عاوز يحس شوية انه انسان ولسة عايش تقوم تديله ظهرها وتروح فى النوم عشان ورانا مدارس العيال الصبح وهو انت لسة فيك حيل يا عبده ؟ دى تبقى تتصنف من اى فصيلة ؟
والست اللى ولدت قيصرية من غير لازمة فى المستشفيات الاستثمارية الفندقية علشان حبة عين مامتها موش بتقدر على وجع الطلق والولادة الطبيعية و بترضع البيبى البان صناعية علشان لامؤاخذة صدرها يفضل على جماله وعندها babysitter فليبينية و butler انجليزى و chauffeur نوبى ( مع الاعتذار لاهل النوبة انظف ناس فيكى يا مصر ) ياخدها لاجتماعات ال inner wheel club علشان تقول كلام عن تضحية المرأة وتفانيها فى خدمة الاسرة و من طراطيف مناخيرها تتهم الرجل بالقسوة والسيطرة المادية على مقدرات الاسرة وعدم استقلال المرأة ماديا وازاى تاخد نص نصيب الراجل فى الميراث بس وازاى الراجل طايح يتجوز مثنى وثلاث ورباع والمجتمع سايبه على حل شعره الخ الخ من الكلام اللى حفظناه ، دى تبقى ست طبيعية؟

يا جماعة فوقوا بقى هما دول الرجالة المتوفرين فى السوق هما دول الرجالة اللى ربوهم امهات من جنسكم ستات زيكم والعملة الرديئة بتطرد العملة الجيدة من السوق والبنات موش لاقيه جواز وعنسوا والشباب لامؤاخذه هرموناته بتنقح عليه وموش عارف يتصرف
ونصيحتى ان الست اللى موش عاجبها جوزها تتطلق وتحصل على الحرية المنشودة بلاها رجاله والعيال حيتربوا حيتربوا بأى طريقة
والبنات تبطل احلام وترضى بالحاضر والموجود يعنى take it or leave it وشوفوا اللى بيحصل على ارض الواقع فى قرى الصعيد البنت بتتجوز عند البلوغ وبتشتغل جنب جوزها فى الغيط والاتنين شايلين بعض والعيال بلابيص عشان مافيش هناك بامبرز والارض عاوزة سماد واخر النهار يرجعوا بيت العيلة اللى عايشين فيه مع جدهم واعمامهم واخوالهم واخواتهم يقعدوا ياكلوا ع الطبلية ويشربوا الشاى وكل واحدة تاخد راجلها ويناموا ع الفرشة مرتاحين البال

هناك 57 تعليقًا:

dr.Roufy يقول...

هههههههه
واضح يابشمهندس انك شايف نماذج وفيرة تُسبب الفرسة
وأكيد لو كان على النماذج الى اتكلمت عنها هنا يبقى معاك حق جداااااا
كلامك سليم وبيحصل
وبرضه العكس بيحصل
يعني مثلا تلاقي شاب مستحلى نفسه, ومقضيها ضحك على بنات الناس وهو مابيفكرش اصلا في ارتباط من أي نوع
وتلاقي زوج بيطلب من زوجته انها تكون ملكة جمال وشغالة ومربية تلاته في واحد
وهو شايل ايده ولا بيعمل اي مساهمة او حتى تشجيع
للأسف على الناحيتين فيه نماذج مؤسفة

canary يقول...

واضح يا باشمهندس انك مفروس على الاخر مننا بس والله مفيش كتير من اللى انت بتقوله دة .احوال البنات اتغيرت كتير عن الاول وحقيقى بقو البنات عقلانين وواقعين فى حياتهم وتلاقى البنت بتلف على كل محلات البلد عشان تقدر تشترى جهازها بأرخص الاسعار . دلوقتى مفيش شبكه غاليه . احنا عندنا دلوقتى الشبكه دبله والحمد له اوى على كدة
يمكن ميكونش دة بسبب العقل و الرزانه لكن بسبب الظروف اللى غصبت الكل على الرضا بالحال المايل بس برضه اهو بقى موجود وخلاص وكله بيصرف امورة فى حدود اضيق الامكانات .
معلش عندى سؤال اخير والنبى
الا ايه هو النادى اللى انت قولت عليه دة؟؟اللى الواحدة عاوزة جوزها ياخدها فيه عشان تتكلم عن تضحيه المراءه

Salwa يقول...

كل إنسان وفيه عيوبه

لا النساء ملائكه ولا الرجال

يعني نوعيات وفي من ده ومن ده

وفعلا نقول للإتنين take it or leave it
محدش بيغصب حد على حاجه

حلو المثال بتاع الصعيد
ممكن يكون في كل مكان وزمان بس إحنا نرضى

بوست جميل وهضطر أجمع كل البنات ونعمل بوست مضاد يا استاذ راجي
خد بالك من نفسك بقى
أقل شئ الأخت ( هنمشيها أخت يعني ) اللي في الصورة ممكن تقول إنك بتقصدها بالكلام اللي في البوست
وطبعا دي تصرفاتها غير متوقعه
عموما إنت حر بقى

خالص تحياتي ودمت بكل خير

مـ~ـاجدولين يقول...

صراحه صراحه
معك حق
فعلا احنا جيل يخوف
ماابغى اتكلم اكثر لاني كلامي بزعل البنات
عمري ا شفت سيده متزوجه مهندمه
ولو شفت فعلا زوجها بقدرها

لا يوجد اي نوع من الاحتفاظ بالرومانسيه بعد الانجاب والخروج في سهره
للزوج والزوجه على انفراد
وهذا من اكبر عيوب مجتمعنا العربي

ربنا يهدي البنات
ويسخرلهم اولاد الحلال

MAKSOFA يقول...

أحوال المجتمع كلها زي مابتقول نانسي عجرم لخبط لخابيط ، أظاهر مافيش فايده

Hook يقول...

أن كان من ناحية الظلم الواقع على المرأة فهو شيء أكيد...لكن الأكيد برضه ان الجماعة الفيمنست دول زودها اوي...لسه من فترة قريبة كنت بتفرج على القاهرة اليوم و كانت حلقة عن عنف المراة ضد الرجل...و كانت الكاتبة "الكبيرة" اقبال بركة مصرة ان اي عنف من المرأة هوه دفاع عن نفسها من عنف الرجل...عمرو أديب يقولها يعني مافيش ست وحشة؟ مافيش ست مفترية؟...تقوله لأ!
بالذمة ده منطق أو تفكير للكاتبة الكبيرة؟...يعني ربنا ماخلقش الشر و العنف غير في الراجل؟

الصارم الحاسم يقول...

ينصر ديـــــــــــــــنك يا أستاذ.......خلييييييييييييييفة

:)

راجى يقول...

دكتورة روفيدا

ايوه كلامك مضبوط ولكن الزوجة تقدر لو عاوزة تكون ملكة جمال فى الليل ومربية فى الصباح والاجر والثواب على الله موش لازم تنتظر المساهمة والتشجيع من البشر

راجى يقول...

canary
ده يا ستى نادى الانر ويل وهو نادى السيدات المقابل لنادى الروتارى الرجالى
وانا باحب جدا البنات اللى بيرضوا بالواقع من غير فشخرة ولا عنطظة وبيكونوا والله زى النسيم اللى يشفى العليل
ربنا يكرمك ويكرمهم

راجى يقول...

سلوى العزيزة
انا منتظر البوست المضاد ومحضر المدفعية والطيران
تحياتى

راجى يقول...

ماجدولين
عارفة اجمل حاجة انك فهمتى اللهجة المصرية القحة اللى انا كتبت بيها البوست وده يخلينى افخر بمصريتى وافخر بعروبتى وافخر ببنات العرب الاذكياء مثل حضرتك
دمك زى العسل
تحياتى

Salwa يقول...

طيران مدفعيه
وعلى إيه

إحنا هنسيب صاحبه الصورة تاخد حقها
وخلاص

تحياتي

راجى يقول...

مكسوفة
تفتكرى فعلا مافيش فايدة؟
يمكن تكون دى مرحلة صعبة على الناس ولكن الشعوب دايما بتعدل نفسها بالقصور الذاتى
تحياتى وشكرا على المداخلة

راجى يقول...

hook
الستات بتوع حرية المرأة لما بيتكلموا بيعتبروا كلامهم قرآن منزل لا يقبل النقض ولا النقد و لا الجدل
فيبدأوا الكلام على اساس ان كل ما يقولوه حقائق لا تحتاج لاثبات وعلى الناس ان تثبت العكس
عمرك ما تعرف تروح ولا تيجى معاهم ابدا
تحياتى

راجى يقول...

الصارم الحاسم

الله يكرمك يا عم الحاج ، واشكرك على الدعم بس خد بالك من نفسك
:)))

راجى يقول...

سلوى
تفتكرى لما الست دى كانت بتتصور كانت بتفكر فى ايه؟

Dieta يقول...

Hello. This post is likeable, and your blog is very interesting, congratulations :-). I will add in my blogroll =). If possible gives a last there on my blog, it is about the Dieta, I hope you enjoy. The address is http://dieta-brasil.blogspot.com. A hug.

Nsreen Bsunee يقول...

استاذ راجى

بوست دمه خفيف والنماذج اللى انت قلتها ديه عاوزه الحرق بجاز

الصوره بجد تخليني احمد ربنا مليون مره فى اليوم على نعمه حُسن الخلقه الحمدلله بس هى فى الصوره فى حاله تامه من الهدوء والرضا والثقه بالنفس سبحان الله وغيرها ربنا انعم عليهم بالجمال ويلعبو فى وشوشهم وينفخوها ويصنفروها

الحياه فى الريف جميله وبسيطه وبتفرض على اللى عايشين فيه البساطه والرضا والهدوء عكس الحضر والمدن اللى بتفرض علينا السرعه والتسرع والاهتمام بالقشور والانانيه والتباهي والتظاهر وغيرها

بس انت جبت من الاخر فعلا بعنوان البوست اللى هو بوست لوحده

"بلاااااااها"
:)

mado80 يقول...

أستاذ راجي
العزيز

صحيح (بلاهه) هانعمل ايه بقي

كلام في الصميم يا أستاذ راجي

بس برضه يا أستاذ راجي زي ما فيه نماذج من البنات اللي حضرتك ذكرتهم عايزه الحرق
فيه ولاد كده برضه المشكله مزدوجه في رأيي

تحياتي ليك يا أستاذ راجي وألف تقدير لشخصك الكريم

Cleo يقول...

هههههههه...

واحدة واحدة يا باشمهندس... انت واضح انك مبقوق قوى من حد.. بس معلش.. تعالى نتفاهم..

أنا فاهمة جدا وجهة نظرك من ناحية الست بتاعة الinner wheel والتانية بتاعة المقطم (بس لو سمحت ما أسمحش لحد يتكلم نص كلمة بطالة عن التجمع الخامس)..

أما باقى المقال.. لإنا أتفهم إحساسك من واقع النظارة التى تنظر من خلالها للمجتمع وذلك لأنى بحمد الله أجيد لعبة تبديل النظارات..

بس تعالى جرب تنظر للأمور وانت حاطط نظارة مختلفة عن عينك.. اتفضل النظارة دى.. لأ ماتقلقش دى مش حريمى دى يونيسكس.. تمشى على الاتنين.. أيوة زقها لدوة شوية عشان تظبط.. مظبووووط.. بص كدة:

الست اللى جوزها بيشتغل 18 ساعة فى اليوم ويرجع أخر الليل.. وماعندوش ولا ساعة من وقته للبيت ولا حطط البيت فى أولوياته أصلا.. مراته اللى تصحى من الفجر تلبس العيال وتعمل سندوتشات وتوصل المدارس وبعدين تروح تشوف شغلها وأكل عيشها.. ولما ترجع تروح تلف على اليعال تجيبهم من المدارس وتروح تطبخ وتغدى وبعدين تقعد تذاكر لمتوسط 3 أطفال وتساعد فى عمايل الواجب والأخر تعشى وتنيم.. مطلوب منها تبقى غى أناقة إليزابيث تايلور بأمارة إيه؟؟

الست اللى بتروح تشتغل عشان جوزها يا إما مرتبه على قده أو قده على مرتبه (يعنى عامل مرتبه مصروف إيده ومبلطج على مرتب المدام وعايش على عرقها).. تستحمل ضغوط العمل والمواصلات وأعباء البيت والبيه مقضيها شغل وقهوة مع أصحابه.. مطلوب منها تبقى أعصابها باردة وتقابله بملائكية ورقة الأميرة فوزية بأى منطق؟؟

بص كدة كويس من النظارة الجديدة دى... هتلاقى إن لو هو ده فقط الصنف المتوفر فى السوق.. يبقى leave it أحسن وعلى رأيك "بلاها رجالة" لأن بصراحة الرجالة من العينة دى رجالة إسما فقط وليس فعلا..

زمان كان الراجل يشعر بإهانة كبيرة لو مراته عرضت تساعده ماديا لو مزنوق.. دلوقتى يبشترط عليها قبل الجواز إن مصاريف البيت النص بالنص ده لو وفى بكلمته ودفع هو أى حاجة أصلا!!

زمان كانوا الناس المحترمين بيحترموا مراتاتهم.. كان الباشا من دول مايندهش مراته غير يا هانم.. فبالتالى كانت ماتندهلوش غير يا باشا أو يا بك أو كدة (أه ولله كان بيحصل!!) إنما نظام انتى يا ولية وانتى يا مر** وغيره من دلائل الاستهانة وقلة الاحترام..

يالا هات النظارة بتاعتى بقى..

monaliza يقول...

متفقة معاك جدا وفعلا دول لو بقوا امهات ياترى ولادهم هيكونوا عاملين ازاى بس ذى مافيه الوحش فيه كمان الحلو ومش كل البنات كده وارجع واقول ان التربية والنشأة السليمة للطرفين هى السبب فى نجاح الزواج مهما كانت الظروف المحيطة

مصطفى فتحي يقول...

take it or leave it

انت جبت من الآخر

تحياتي

someone in life يقول...

استاذ راجي

اولا الله يسامحك علي الصوره الملخبطه دي
ثانبا واضح ان البوست بتاعي مش عجب حضرتك من تعليقك عليه عندي و من البوست اللي انت كتبته هنا موضحا ان الطبقه الراقيه فاسده .. ماشي من فضللك اقرأ البوست تاني عندي انا لا اسخر من المرأه الغلبانه المقهوره بالعكس انا صعبان عليا حياتها و اهمالها لنفسها الست دي هي زوجه العامل و الموظف البسيط اللي من حقه زوجه تسر عينه و من حقها ايضا رجل تحس برجولته و لو بتتكلم ان سيدات الطبقه الراقيه مترفات و مدللات يعني رجالتها ماشاء الله كويسين ابدا الراجل منهم اول ما يملك المال بيكون عتده صاحبه و اتنين و ممكن بكونوا اصحاب مراته و لو محترم تفسه شويه بتيقي واحده غريبه غير طبعا خروج و مصاريف لزوم الترفيه عن المخ التعبان الشقيان طول النهار فعاوز موزه ( حسب كلامك في بوست سابق ) تدلعه و دي غير المدام و هو هنا مش بيمشي علي مبدأ خد أو سيب لأ لان البيه عاده جبان ان بكون راجل و خايف من عواقب الطلاق فكله بيمشي بصاحبه و لا جواز في السر
صحيح فيه ستات خساره العيشه فيهم لان لا لهم اهميه و لا طعم في الحياه بس انا مش انكلمت عتهم في البوست خالص و لا دافعت عنهم انا كنت باحاول اصحي المرأه العاديه من غفلتها لان من اسباب طلاقها اهمالها لنفسها و حاجات تانيه انت فاهمها كويس .
و لو عاوزني اتكلم عن الراجل العادي ممكن جدا اقولك انه نكدي و منعكش و مش بيعرف يلبس و بيمارس حياته بطريقه بوهيميه بحته و دي ثقافه برضه ان انا الراجل و ان كان عاجبك اتفرح علي فيلم احلي الاوقات خالد صالح قدم الشخصيه دي ببراعه .
يا سيدي مش قصدت غير التنبيه مش السخريه و ممكن اقول يتفلقوا انا مش زيهم و بلاها كتابه .. شكرا

Sherif يقول...

عزيزى راجى

لااريد التجنى على جميع الستات رغم انك عندك بعض الحق ..

لكن هناك ستات هن أغلى من الالماس

لم تنسيهم واجباتهم لمسة شاعرية فى هدية .. لاينسون اللحظات الجميلة فى حياة ازواجهم ولا اولادهم ويضعوت تحت تلك الزهور عشر خطوط لتظل الحياة جميلة يملأونها بهجة وسرورا

الا ان ذلك يقتضى أيضا من الرجال بعض التفهم وتقدير الأمور .. فهناك ايضا الرجل النكدى الذى يقضى وقته كله أو معظمه امام التليفزيون أو مع جريدة وغيره .. فلا يشعر بما تعانيه زوجته ولايشارك فى الحفاظ على السلام النفسى ولا فى تشكيل وجدان اولاده ومساعدتهم على الوقوف واكنمال شخصياتهم

يعنى الموقف يحتاج تقارب من الطرفين .. واللى بيته من قزاز

تحياتى للبوست المثير

راجى يقول...

نسرينا

طبعا جمالك وحسنك باين فى صورك وعقلك وذكائك باين فى كتاباتك وتعليقاتك ، فاضل بقى فارس الاحلام يصحصح معانا شوية ، وبدنا نجوز ع العيد وبدنا نعمر بيت جديد بلاها عزوبية

تحياتى

راجى يقول...

ماجد بك

طبعا احنا متفقين ان النماذج السلبية مشتركة بين الرجال والنساء على السواء
وانا قصدت فى البوست ان هذا هو المتاح فى الساحة وعلى الطرفين التعامل مع الحقائق بواقعية وبدون شطط
اشكرك على المداخلة ولك الود والاحترام

Salwa يقول...

أنا كلامي على الصورة من وحي إنها أكيد متفبركه
يعني أكيد دي نتاج
شغل الكمبيوتر

يبقى السؤال
ياترى اللي طلعها بالشكل ده كان بيفكر في إيه ؟؟

بنت القمر يقول...

راجي بيه
مقدرتش امسك نفسي من الضحك بجد بوست تحفه وامضي وابصم عليه بالعشرة
واحلي ما فيه العفويه والتلقائيه
وممكن ازود عليك
لما الست يبقا لها شنب سايباه اخضر وحواجبها سا يباهم زي صوابع الكفته وجوزها يبص لها يقتكر ابن عمه
وتقول لجوزها متبصش بره!!
تبقي دي ست؟؟
لما الست تكون غبيه وحقوده وولحوحه وتضيع فلوسه علي الفاضي والمليان تبقا دي يتعاش معاها
لما الست تبقا ما بتطبخش الا مكرونه وناجتس وتزعل لما جوزها يروح كل يوم ياكل عند امه تبقي دي معقوله{مرات اخويا}؟؟
لما الست تكون زهدت في المانيكير وعلاقتها يالبرفان زي علاقتها بنفتلين البلي تبقا دي ايه؟؟
لما الست تجوز50كيلو وبد 5 سنين تبقا 100 كيلو وتتقمص اوي من اللي بيروحوا الجيم والنار تاكل قلبها حسد وحقد تبقا دي بتفهم؟؟
ولكن..
عشان انا عارفه انك حقّاني ننتظر البوست القادم علي الرجاله النمارده زي اللي ذكرهم دكتور روفي
(:
بس سؤال في الخباثه كده
انا معمريش عملت مربة جزر لكن بعمل ورق عنب وملوخيه وبسبك الطبيخ
يبقا ينطبق عليا قانون العقوبات؟؟
وبعدين ادم مش بيحب رفي الشرابات
عشان صلاة الجمعه مينفعش يصلي بشراب مرفي؟؟ فانا برفيهم والبسهم في الشتا عشان بتكون غاليه يبقا استحق العقوبه برضه
(:
طب انا بعمل ليمون مخلل وبسكوت نشادر في مفرمه اللحمه وبعمل بتي فور
لكن مباخدش غسيل في الطشت لانه ربنا كرمنا ب18 بروجرام يبقا انا ست فاشله؟؟ بوست جميل اوي
تحياتي

canary يقول...

هههههه الله يحظك يا باشمهندس وهو انا كنت عرفت ايه هو الانرويل عشان اعرف ايه هو الروتارى؟؟دة انا بقول اشرحلى مش عقدنى .
بس كمان مرة حلو اسلوبك السهل والبسيط فى الكتابه

بنت القمر يقول...

طب انا ها اشد لينك للتدوينه دي عندي بس علي وعد باخري متوازنه
نقد رجالي يعني
تحياتي

راجى يقول...

cleo
عزيزتى

انا فعلا مبقوق من الحملات المنظمة ضد الرجال وحيث انى مؤمن بنظرية المؤامرة فهذا هو الحال الحاصل على ارض الواقع والمستهدف هو ضرب الاسرة المصرية والعربية وهدمهما بمعول مكتوب عليه المرأة والمرأة بريئة منه
اما التجمع الخامس فهم اجدع ناس وحقه عليا ما يزعلش
النظارة بتاعتك دى شايف بيها حبة طشاش وحبة بوضوح
الحبة الطشاش يعنى اللى مختلف معاكى فيها مايلى
الست اللى شقيانة فى البيت وتوصيل الولاد سهل قوى تاخد دوش قبل ما تنام وتديها رشة او دى كولون انشالله ماركة الشبراويشى وتلبس الثياب المناسبة للموقف ثم تروح فى النوم وبكده تبقى عملت اللى عليهافلو الباشا الشقيان علشان خاطر الاسرة كلها موش علشان مزاجه الشخصى ، كان له شوق فى حاجة تقوم هى تفتح نص عين وتتجاوب وتحلم انها فى الجنة وكان الله بالسر عليم واكيد الياشا المذكور موفر لها السخان الكهربائى عشان مايبقاش لها حجة ان الدنيا برد وانها بتحب تصلى الفجر حاضر
وشايف كويس بنفس النظارة ان الست اللى جوزها بياكل من عرقها يبقى موش راجل ولازم تخلعه ومصاريف القضية من جيبى الخاص
واخيرا مافيناش من ترجيع نظارات انا ما صدقت لقيت نظارة كعب كوباية على مقاسى
تحياتى ولكى الشكر والتقدير

راجى يقول...

موناليزا

عزيزتى الجيوكاندا دى ليوناردو دافنشى
متفقين وفعلا ليست كل البنات وحشين ولا كل الرجالة رخمين
بس البضاعة اللى فى السوق اليومين دول مضروبة من الصنفين
اشكرك واحيكى على المداخلة

راجى يقول...

مصطفى فتحى

ربنا يهدى

اشكرك

nody_1987 يقول...

ايه ده يا هندسه
دا انت هارش نص ستات مصر وراسى على الدور
ويسلام بقى لما تبقى الست ببوذ ونكد وكل ما جوزها يقولها بخ ولا حتى امه تدى له ضهرها وتقوله امك فى العشه ولا طارت(خالتى)
ويسلام بقى لو بنت امها وكل كلمه جاي حكياها لامها(عمتى)
بس حضرتك انت كده جبت لى اكتئاب
اى نعم انا بقالى اربع سنين فى الجامعه ماقولتش لواحد صباح الخير
وبحب النظام واحب اكون مرتبه
ويعنى ليه فى شغل البيت بعمل مكرونه بشاميل وكيك وبسبوسه ومحشى
بس مش بعرف اعمل الليمون المعصفر ده
ولا بلفق شربات
ويعنى ليه اهتمامات بحب كتب التاريخ والسياسه والادب
وبموت فى الروايات
ونفسى اتجوز واحد زى احمد فى انى راحله
تفتكر فى امل ؟
وارجع اقولك تانى يا اما فى رجاله

مالهمش حل غير جوانتانمو
تحياتى

راجى يقول...

someone in life

سيدتى العزيزة انا مظلوم والله انا معجب اشد الاعجاب بالبوست اللى كتبتيه عن بهية وكان من قبيل الالهام لى فى كتابة هذا البوست
I was inspired by it
لانى لما عرفت ان انا مش لوحدى شايف حال الستات ملخبط ومفشكل وان فى عين اخرى ناقدة من الجنس اللطيف بتشاركنى الرأى قلت اكيد فى سيدات وانسات ممكن ننبهم موش فقط على طريقة الملبس ولكن ايضا فى موضوعات تمس الثقافة والخبرة واللياقة واللباقة الى اخر هذه الموضوعات التى تلزم الانسان بنوعيه لكى يستطيع الحياة فى العصر الحديث
وعلى فكرة انا كنت كمان بافكر فى امى رحمها الله وان اكتب الموضوع فهى كانت سيدة مدهشة نصف متعلمة ولكنهاكانت خبيرة فى كل نواحى الحياةمن حيث التدبير المنزلى بما تعنى هذه الكلمة من مدلولات والصحة والتعامل مع الاخرين والعطف على الضعفاء الى اخره طبعا لم تكن ملاك ولا كلام فارغ من ده ولكنها كانت سيدة محنكة ذات عقلية مرتبة ممتازة

نعود لموضوعنا

يقول الله فى القرآن الكريم :

(الْخَبِيثَاتُ لِلْخَبِيثِينَ وَالْخَبِيثُونَ لِلْخَبِيثَاتِ وَالطَّيِّبَاتُ لِلطَّيِّبِينَ وَالطَّيِّبُونَ لِلْطَّيِّبَاتِ أُولَئِكَ مُبَرَّؤونَ مِمَّا يَقُولُونَ لَهُم مَّغْفِرَةٌ وَرِزْقٌ كَرِيمٌ)

الاية الكريمة دى ذات معانى عميقة توضح ان الخبيثة ترزق بمثلها والخبيث يرزق بمن مثله والطيبة ترزق بمثلها وهكذا يعنى بالبلدى كل واحد بياخد على قد نيته ولكن هل هذا حكم ابدى وهل الست الخبيثة او الرجل الخبيث لاامل فى صلاحها او صلاحه؟ نجد ايات اخرى تقول
﴿إِنَّ اللَّهَ لا يُغَيِّرُ مَا بِقَوْمٍ حَتَّى يُغَيِّرُوا مَا بِأَنفُسِهِمْ﴾
يعنى هناك امل فى التغيير لو حاول الانسان مخلصا يوفقه الله الى الاصلاح والصلاح
والناس سيدات ورجال يتغيرون على الدوام فرجل اليوم البخيل والفلاتى ممكن ينصلح حاله بعد زمن طال او قصر والسيدة سليطة اللسان او المسرفة او الطايشة ممكن تتغير للاحسن
يعنى الموضوع عاوز صبر وحكمة
وحضرتك تلاحظى فى البوست انى لم ادافع عن الرجال دفاعا مطلقا بل ذكرت ان هؤلاء هم الموجودين على الساحة ولا يجب ان نطلب المستحيل فى زوج او زوجة برفكت
فكما قالت مادونا فى اغنيتها الشهيرة
no body is perfect
ارجو ان اكون قد اوضحت

اشكرك ولكى التحية والتقدير

راجى يقول...

شريف بك

سيدى العزيز ، اتفق معك ان النماذج السلبية يشترك فيها الذكر والانثى فى مجتمعنا وفى كل المجتمعات
ولكن دورنا ان ننقل خبرتنا فى الحياة الى الشباب ونقرص ودنهم علشان ياخدوا بالهم من الواقع ويبطلوا احلام

اشكرك يا صديقى العزيز على المرور والتعليق

راجى يقول...

سلوى
وليه يا صديقتى بتستبعدى انها تكون صورة حقيقية لسيدة من الواقع؟

راجى يقول...

بنت القمر

سيدتى العزيزة

موش قادر امسك نفسى من الضحك على الست اللى شنبها اخضر وحواجبها صوابع كفته
وبعدين كله يغفر لكى ما عدا رفى الشرابات ، اصل انتى موش واخده بالك ان الرفى معناه ارجاع الشيء الى اصله فلا يمكن الشراب يبان انه مرفى لو عندك خبرة
اييييييييييييييييييييييه، الله يرحمك يا امى

همسة فى ودنك فى الخباثة بردو ، الدكتور روفى يبقى الدكتورة روفيدا:)))

اشكرك وربنا يخليكى ويبارك لك

وان شاء الله نكتب بوست نهاجم فيه الرجاله ونبين كل مزاياهم وتضحياتهم وتفانيهم ومواهبهم يعنى حنقطعهم ولا يهمك
:)))))))))

راجى يقول...

canary

:))))

انتى على فكرة جن مصور وعارفه كل حاجة بس الطبع الانثوى بقى يغلب

اشكرك ولكى كل تقدير

راجى يقول...

nody_1987
جوانتانمو يا مفتريه

شوفى بقى الليمون المعصفر ده اساسى من غيره البنت تعنس وتبور على طول:)))
وراوية انى راحلة دى نكد فى نكد من ابداع المنكداتتى المحترف يوسف السباعى اه منك يا ستات بوريه منكم
:)))
تحياتى ، جوانتانمو يا مفتريه طب شوفى حاجة يعنى اقرب عشان العيال طرة او ابو زعبل او الواحات

canary يقول...

هههههه الطبع غلاب بقى يا بشمهندس ومفيش واحدة ست اسمها ست تخلو من المكر والخبث الانثوى اللى متقدرش تنكر انه اوقات بيكون دمه خفيف

غير معرف يقول...

http://benkerishan.blogspot.com/

غير معرف يقول...

http://benkerishan.blogspot.com/

mohandsmasry يقول...

هههههههه نماذج حلوة يا باشمهندس المشكلة ان البنت المصرية اول ما توصل لسن البلوغ ماعندهاش غير هدف واحد فى حياتها وهو انها تصطاد عريس وبتشحذ كل اسلحتها وبتستعمل كل الوسائل المشروعة والغير مشروعة لتحقيق النصر فى المعركة دى ههههههه ماهى معركة حياة او موت بالنسبة ليها اتذكر مرة من فترة طويلة شفت ست فى جرين بلازا كان معاها بنتين البنات محجبات اما اللى من اسفل الحجاب شئ تانى مختلف 180 درجة ينتمى لشارع الهرم وقاعدين مع الست الوالدة بيدخنوا شيشة وبيتصرفوا بطريقة تخلى الواحد وشه يحمر ..النماذج دى بقت كتير اوى على فكرة اللى عاوز الحجاب اهو موجود واللى عاوز حاجة تانية بردو موجود ههههه وبمجرد ان الست تحقق هدفها تلاقى فعلا واحدة تانية لا علاقة ليها بالاولى نهائى بتطول بالعرض والاهتمامات بتتغير مابين بيت واولاد وشغل واخر حاجة فى القايمة دى جوزها وجمالهاواناقتها وشياكتها ماهى ماعادش ليها لازمة اصلا هاتعمل بيها ايه وليه !!!احنا اخدنا من الغرب اسوأ ما فيه للاسف ...تحياتى

Salwa يقول...

مش عارفه والله يا راجي

إحساس مش أكتر

عاليا حليم يقول...

بص أنت معاك حق أنا عن نفسى مش بقول ان كل الستات ملائكة و مظلومين

بس أؤكدل يا عزيزى انى بشوف حالات كتير جدااااااااااا قدامى فى الواقع بتقول ان الست فعلا مهما قادت صوابعها العشرة شمع و اهتمت بنفسها و ببيتها و بحب جوزها اوى و ما بتصدق يفضى شوية عشان تنعم معاه بلحظات الحب

فعلا الزوج بيديها ظهره و كتير بيهينها و بيبهدلها من غير اسباب منظقية

مجرد انه زهقان من الشغل و داخل البيت قرفان و خلاص أو والدته أديتله كلمتين فى العضم مثلا لكن ما بيبقاش فيه سبب واحد مقنع

صدقنى ده بيحصل

خالص تحياتى

S H A H يقول...

كدة بدأت اتاكد ان راجي زير نساء و لف لغاية ما زهق منهم بعد ما فهمهم

انت جمعت كل أنواعهم في البوست الرائع ده

و بجد بلاها ستات

راجى يقول...

عاليا
اهلا بيكى يا صديقتى العزيزة

طبعا احنا متفقين تماما ولا خلاف
وارجو ان يرزقك الله زواجا سعيدا وحياة مباركة

لكى التحية والسلام

راجى يقول...

shah
انا بردو يا جلالة الامبراطور شاهنشاة بلاد فارس وما بين النهرين؟
يا عم من صورك بيان انك مقطع السمكة وديلها وبلاش قر بقى
:)))
تحياتى

محمود الغنــام يقول...

مدونه جميله جدا ..

والاراء صحيحه ميه بالميه

blackcairorose يقول...

راجى

بقى كل ده فى قلبك وساكت؟لول

زى ما فيه نوعيات سيئة من السيدات هناك ايضا نوعية رجال سيئة جدا

ولكن الحديث بشكل عام ونسبى فان هناك ظلم واقع على السيدات اكثر من الظلم الواقع على الرجل، ليس فقط فى مصر انما فى دول أخرى كثيرة لاسباب عديدة

وهو ما يجعل بعض المدونات تركز على هذا الجانب غير العادل الذىيعامل به المجتمع المرأة

لكن كل الوان الطيف من الجيد والسىء موجودة عند الستات والرجالة

راجى يقول...

مهندس مصرى

اهلا بيك يا باشمهندس وطبعا حكاية ان وشك احمر دى تدل على حقيقة الوضع ان الستات محدش بيقدر عليهم وربنا معانا على كل حال
تحياتى ونراك على خير

راجى يقول...

استاذ محمود بك الغنام

اشكرك على المداخلة الكريمة والزيارة الاولى

واشكرك مرة اخرى على المجاملة وعلى الاتفاق

وقد قمت بزيارة مدونتك المشتركة مع ماجدولين وطبعا قصيدتك هائلة وجميلة

تحياتى

راجى يقول...

وردة(black cairo rose )

طبعا كلامك صح ، الكل يعانى والكل ظالم ومظلوم فى نفس الوقت ، فلا محل لتكرار الشكوى

اشكرك وردتنا الجميلة على المداخلة الكريمة

أماني يقول...

أستاذ راجي...أنا مش هتناقش في موضوع إنك محتد في كلامك لأن ده إنت قلته في أول البوست و بالتالي موضوع إن إنت إتكلمت عن نوعيات سيئة من الإناث و أحلامها المكملة بأرقى أنواع الرجال فهو تركيز على وجهة النظر إللي إنت بتعبر عنها لأن ده في الأول و في الآخر بوست مش كتاب و أكيد مكنش هيتناول كل أنواع البشر

بص بقى...أنا شايفه إن كل انسان لازم يتمنى إللى يتناسب مع شخصيته...ضروري جدا الإنسان يسأل نفسه هل هو كشخص يستاهل إللي هو بيتمناه و لا لأ؟ لما نجاوب ع السؤال ده جزء من البنات هتقبل بأقل من راجل شيك و جزء تاني هيقبل بأقل من راجل الافرانكه و تالت هيقبل بأقل من مثقف و رابع هيقبل بأقل من بنكير و جزء منهم هيتمسك بأحلامه لأنهم فعلا يستاهلوها و جزء تاني هيحسن نفسه عشان يكون جدير بإللي بيتمناه

أما عن الست بقه إللي بتتغير بعد الجواز من بنت رقيقه و جميله لست بيت مبهدله و اليوم يكبرها سنه فأنا بشوف إن كان هدفها من الأول الحصول على لقب زوجه و أم مش حياة زوجية سعيدة...بغض النظر عن حاجات تانيه كتير منها كونها إنسانه مثقفه و أنثى و حبيبة...و تفرغها لأداء دور الأم بس غالباً مش بيكون على أكمل وجه لأن إهمالها في أي جانب شخصي عندها هيقلل من كفائتها كأم...و هيطلع جيل تاني عنده قصور في كل حاجه كان عندها هي قصور فيها

أنا قريت بوستك أكتر من مرة و كل مرة بقول أعلق عليه بعدين عشان هو مهم و مرة في مرة كان لازم أعلق بقه حتى لو مقولتش كل إللي أنا عايزه أقوله

راجى يقول...

امانى
واضح انك قريتى البوست صح وفهمتى قصدى منه ، وهوان كل انسانة المفروض تنظر لنفسها اولا وتقيم نفسها بطريقة واقعية وبعدين تشوف مين يناسبها من الرجال
اشكرك والله على مداخلتك الظريفة وارجو مداومة الزيارات

لكى التحية والود

غير معرف يقول...

العزيز المهندس راجى
انا اسفه جدا غلى اللى انت كاتبه ده انا كبنت كزوجه كانثى بعتذر
بنات جنسى حالهم بقى يوجع القلب
بس ده فكر اليلد اللى احنا عايشين فيه
نسينا الموده والرحمه..نسينا قداسة الزواج..نسينا الهدف منه!!وكل البنات هدفها واحد اتجوز اتجوز اتجوز
قبل ما ابقى عانس قبل صحباتى..واحيانا قبل ما انحرف!!
الهدف مبقاش بيت واسره استقرار سعاده...الجواز بقى يعنى الشقى للشعب المصرى...
كثيرا ما يلحعلى انا اطالب بتدريس روايه عظيمه لاحسان غبد القدوس فى حصص التدبير المنزلى للبنات..وهى زوجة احمد..واحسان مش تابوه وقنوات الاغانى فى كل بيت
dodda
http://dodda-hanem.blogspot.com