السبت، يوليو 19، 2008







http://sonicbids.com/epk/epk.aspx?epk_id=140797


يوم الخميس في حديقة الأزهر كنا على موعد مع حفلة موسيقية في مسرح الجنينة، وكما قالت لي ابنتي أنها حفلة موسيقى روك وإنها يجب وحتما إن تحضرها
وبما أنها ابنتي الوحيدة ودلوعة أبوها كما إننا أسرة شرقية محافظة لا نسمح لبناتنا بالسهر خارج المنزل وحيث أن أخواتها الذكور أيدك منهم والأرض فلم أجد مفرا من شحنها هي وأخوها كريم في السيارة وأنا متضرر لانى لا أحب الخروج إلى شوارع القاهرة ليلا يوم الخميس خصوصا في فصل الصيف إلا مضطرا
ولدهشتي وبطريقة غير طبيعية كان المرور في صلاح سالم سائلا وفى دقائق كنا داخل حديقة الأزهر التي كانت خالية تقريبا من الرواد وبطريقة مريبة كان جمهور الحفل قليل ونصف الحضور من الأجانب بالرغم من أن تذكرة الحفل ثمنها خمسة جنيهات فقط و بدأ العرض متأخرا دقائق قليلة لم نشعر بها ومع ذلك فقد اعتذر عضو الفرقة عمرو حفنى عن التأخير




راجية





راجية وكريم

مسرح الجنينة مثل المسارح الرومانية القديمة عبارة عن مدرج أسفله ساحة العرض والكراسي بسيطة ومريحة ، يعنى لوهلة ممكن تضرب معاك أخماس في أسداس وتشك هل أنت أكيد في مصر ولا في بلد تانى




محمد رجب

محمد رجب وعمرو حفنى قاموا بأداء العرض المبهر وحدهم و كأنهم عشر عفاريت في بعض بمعدات موسيقية متقدمة من ناحية التكنولوجيا وقد استعانوا بشاشة لعرض كليبات فيديو Samples أضفت طابع سياسي انسانى للعرض فالموسيقى كما فهمت تصرخ في وجه السياسيين محترفي الكذب لوقف المجازر والحروب وإراقة الدماء بدون مبرر والذين لا هم لهم غير تسجيل الإحصائيات الصماء عن التقدم وأنماط السلوك للمجتمعات في الاستهلاك
وفى رايى فقد نجح رجب وحفنى في تقديم عرض ممتع وعصري جدا وأيضا له رسالة ومضمون يعنى عمل فني متكامل
والظريف أن الموسيقى تحتوى على جمل ذات طابع شرقي تم مزجها باحتراف مع الإيقاعات الغربية وان كنت أرى أن الموسيقى لا يصح تصنيفها إلى شرقي وغربي فهي نتاج الحضارة الإنسانية كلها
ولقد أجريت حديثا قصيرا مع محمد رجب بعد العرض فهمت منه أنهم قد ينهمكوا حتى أطراف أصابعهم في الإعداد للحفلات والعروض وينسون تماما الدعاية والإعلان عن أعمالهم
وروابط مواقع الفرقة على الشبكة موجودة في هذا البوست لمن يريد أن يستمع إلى موسيقى راقية تخاطب وجدان الإنسان

هناك 28 تعليقًا:

نعكشة يقول...

إية الابهات دية :D
ممكن أستلف حضرتك منهم شوية :D

يعني لأ بجد يلا خير ربنا يخليك للأولاد

اللهم امين
.............

بالنسبة للموسيقي هيا موسيقي ولا أغاني

انا مليش في الاغاني صراحة
بس بما ان حضرتك قولت عليها تخاطب سياسة و اقتصاد يعني شكلها مش اغاني حب و الكلام دة فممكن اتحقق من ذلك بنفسي
:P

هههههههه

هشوفهم
هسمعهم يعني إن شاء الله
و اقول رأيي


ربنا يخليك لأولادك
دمت سالم
سلامٌ عليك

رحــــيـل يقول...

هههههه
اه عارفه اان الاخوات الولاد اللى ايدك منهم والقبر دول
ملين مصر حضرتك ههههههه

كويس ان انت روحت معاها
حديقه الازهر مكان جميل جدا بس انا محضرتش حفلات فى القاعه دى قبل كده بس شكلى المره الجايه ضرورى احاول احضر شوقتنى بجد للمكان

ربنا يخليهم يارب

بنت القمر يقول...

طبعا لازم تفسحها البنت ماشاء الله ناجحه نجاح مشرف
في سنه صعبه اوي اوي.. بالمقارنه بالسنه اللي فاتت
ربنا يبارك لك فيها
وكمان زوقها عالي
ارشح لها يحي خليل
يوم 2/8 في الاوبرا علي ضمانتي
:))
عمي بقا... هتلاقي نظان واحترام
واوعدك ها تستمتعوا والتذاكر عليا
المكان في الاوبرا
ممكن تلاقيه في قائمه الفريند بتوعي في الفيس بوك وتلاقي جدول... بالايفينت بتوعه
تحياتي وسلامي للامورة

سمراء يقول...

من واجبنا ان نتيح لابنائنا وبناتنا التفاعل مع الفنون جميعها
والتي تساعد في بناء شخصياتهم وافكارهم ووجدانهم

حديقة الأزهر الثقافية هي بارقة أمل لنشر الفنون الراقية وخاصة ان معظم العروض لموهوبين من الشباب

تحياتي
سمراء

صباح الخير يا مصر يقول...

راجي
*******
سعادة الباشا
ربنا يخليهم لك و يباركلك فيهم يارب ويخليك لهم يارب ..... اب حنون و صديق ودود دائما
حضور الحفل لايف دائما ما يكون له مزاق مختلف...فنحن نلمس الجهد عن كثب و نلمس حب الفنان لفنه و ادواته دون وجود وسيط

تحياتى

غير معرف يقول...

I am very happy that you liked the music more than your daughter:)
This is why i make music so i can share it with people like you"sorry cuz i write in english"

Jana يقول...

ما شاء الله ولا قوة الا بالله ..البنت ذوقها راقى جدا بالنسبة لسنها

ربنا يحفظك أبا صديقا... ويحفظهالك
وبكرة ان شاء الله تشوف اخواتها رجالة جدعان
:))

اخويا زمان مكانش بيودينى حتة معاه
دلوقتى بياخدنى انا وولادى كمان
ولسه حالا عازمنى على حفلة فى مكتبة اسكندرية
تفائل
هههههههههههههه

عروس البحر يقول...

مبروك لراجية
ما شاء الله عليها ذوقها راقي
تحياتي

canary يقول...

سيبك من كل دة بنتك وابنك حلوين

عاشــــــ النقاب ـقــــة"نونو" يقول...

ربنا يبارك لحضرتك فيهم
تحياتي

عين فى الجنة يقول...

نعكشة
ربنا يخليكى لينا
اسمعى موسيقى الفرقة دى هايلة
وعاوز اعرف رأيك
تحياتى يا دكتور

عين فى الجنة يقول...

سارة

اهلا يا صديقتى

طبعا حاولى تزورى مسرح الجنينة فى حديقة الازهر
وكمان حاولى تسمعى موسيقى فرقة الغرفة
the room

عين فى الجنة يقول...

قمر
يحيى خليل عمك فعلا؟
يعنى شقيق والدك لزم؟
حاجة جميلة ان الواحد يكون له قرايب مشهورين وفنانين جامدين زى يحيى خليل وانشاء الله نحاول الحضور فى الاوبرا
واشكرك على التبريكات

عين فى الجنة يقول...

سمراء

اتفق معك يا عزيزتى فى ان الفن من مقومات بناء الشخصيات وخصوصا لو كان فنا جميلا مثل الموسيقى

عين فى الجنة يقول...

صباح الخير يا مصر

باشمهندس احمد بك

فعلا يا عزيزى حضور الحفلات يجعلك تتفاعل مع الفن المعروض
وعلى فكرة الفرقة دى بتقدم فن محترم جدا وليس مجرد الفن للفن

تحياتى لحضرتك

عين فى الجنة يقول...

mohamed ragab

thank you my friend for the wonderful music
i wish i could see all your performances in egypt
thanks again untill we meet

عين فى الجنة يقول...

jana
انشاء الله اولادك يكبروا وياخدوكى تشوفى الحفلات والافلام وربنا يكرمك ويسعدك معهم

عين فى الجنة يقول...

عروس البحر
اشكرك يا صديقتى على المجاملة والاطراء
تحياتى

عين فى الجنة يقول...

كنارى

اشكرك انتى كمان حلوة

عين فى الجنة يقول...

نونو عاشقة النقاب

اشكرك وربنا يبارك فى اولادك

بنت القمر يقول...

عمي عمي لزم:))
والتذاكر مش غاليه... انا بدخل بدعاوي:))
بس اعتقد 10 جنيه
روح واحكيلي بعد المقارنه ما تنساش 2_8
اشكرك

غير معرف يقول...

راجى باشا

ربنا يخليهم لك وتفرح بهم دائما

أغانى الروك مش بس جميلة .. لكن لها أكيد ذكريات عندك .. من أيام الفيس

مبروك لراجية

someone in life يقول...

اولا مبروك لراجية اكيد تعبت قوي لان السنه دي الامتحانات كانت صعبة يا تري ناوية على كلية ايه ؟ هندسة زي بابا ؟
انا بحب الحفلات دي يا تري الاقي برامجها فين ؟ ساقية الصاوي بتبقى زحمة موت و مش بالاقي ركنه على الاقل الازهر بارك ممكن اركن براحتي
تحياتي

غير معرف يقول...

اولا ايع العظمه دى
تتنازل بهذه السهوله للنزول مع الاولاد
ربنا يخليكو لبعض


انا لا اسمع كثيرا للموسيقى ولكن ساجرب سماع هذه الموسيقى تحياتى

Ahmed Kamal يقول...

ربنا يخلي لك راجية و كريم و اخواتهم ، و يبارك لهم فيك ، أجمل شيء إن الصداقة بين الأب و أولاده ماتكونش مصطنعة ، يعني إنت بتحب تبقى معاهم ، و هم نفسهم في وجودك .

تحياتي لك

قوس قزح يقول...

لما بروح احضر حفلات فى ساقية الصاوى او الازهر بارك لفرق شبابية كده بستغرب اوى لان اداءهم بيكون مستواه كويس جدا و ممكن بشوية اهتمام اكتر يوصلوا للعالمية و بالرغم من كده وسائل الاعلام مش مهتمة خالص بهم و مهتمين بأخر اعمال الراقصات و مغنيي الكليبات و يقولوا ماهو ده مستوى الفن حاليا .. واضح ان القائمين على اختيار ما يعرض هم اللى مش بيشوفوا غير الفن الهابط

عجبنى جدا انك اب محافظ و متفتح فى نفس الوقت
تحياتى لك ولاولادك

نعكشة يقول...

1- حاولت كذا مرة اسمعها معرفتش
انه النصيب

2- ليك تاج عندي

3- سلام عليكم

freedom يقول...

و الله كل كتاباتك و تعليقاتك حلوة
ما بعرف كيف ممكن اعلق عليها
اقبل تقديري