الاثنين، يوليو 14، 2008

مصطفى الفقى وثنائياته العجيبة






هل رأيت بائع الشربة العجيبة؟ شربة الحاج محمود اللى بتموت الدود



هذا ما كنا نتندر به فى مرحلة الشباب المبكر عن النصابين اللذين يبيعون الوهم للناس معتمدين على ان الناس مغفلين دائما ولن ينتبهوا الى ان الشربة العجيبة ماهى الا ماء الترعة الملوث معبا فى زجاجات وان الذى سيموت حتما ليس الدود ولكن صاحب البطن الممروض



مصطفى الفقى هذا السياسى الداهية خرج علينا من قناة الجزيرة مباشر بان مشاكل مصر كلها حدثت بسبب الثنائيات العجيبة ، الثنائية الاولى فى رأيه هى الدين والسياسة والنتاقض بينهما وان الدين مطلق والسياسة نسبية بل لا اخلاقية حسب وصفه فالسياسى كاذب ومخاتل ومحتال ونصاب( وهذا كلامه بالنص) وان هذا حتمى للعمل فى السياسة فكيف يفعل السياسى المسكين اذا طلع عليه من يقول ان الاسلام هو الحل او ان احكم بما امر الله فسوف يسقط فى يده وتقف الدنيا والمصالح تتعطل



وهنا امنت ان كلام الدكتورة نهى الزينى عن نجاح هذا الدكتور فى الانتخابات قد تم بالتزوير حقيقي لان حسب كلام مصطفى الفقى التزوير والغش من ادوات السياسة فلا لوم ولا حرج على سيادته ان نجح بالتزوير فهو سياسى محنك ومن حق السياسى حسب عقيدته ان يفعل مايشاء فهى متطلبات السياسة يا عزيزى



وقال ايضا لافض فوه ان فض هذا الاشتباك بين السياسة والدين سوف يستغرق عشرات بل مئات السنين حتى تعود الليبرالية الى عقول الناس فى مصر مرة اخرى بدل التزمت الذى عشش فى عقول الناس بسبب الدين وانه يأسى لحال المصريين الان وقد كانو فى منتهى الليبرالية فى الخمسينات والستينات حيث كنت ترى الاولاد والبنات قاعدين بيحبوا بعض فى الكافيتريات والنوادى فى منتهى الاحترام وكنت ترى السيدات وقد ارتدين ما يحببن من ملابس شيك على المودة



هل هذه هى الليبرالية يا عم مصطفى؟ طيب على كده احنا عايشين ازهى عصور الليبرالية بس انت انزل على الكورنيش فى القاهرة او الاسكندرية او حتى دائرتك موش عارف فين فى دمنهور ولا المحلة موش فاكر ، انزل وانت تشوف البنات والاولاد فى منتهى الليبرالية والاحضان والقبلات الساخنة عينى عينك على قارعة الطريق بس ياخسارة البنات على شعرهم بتاع كده اسمه حجاب ويمكن الاولاد عندهم سكسوكة صغيرة بس لبيراليين ليبراليين يعنى عن حق



اما الثنائية الاخرى عند الدكتور مصطفى الفقى فهى العلاقة بين الثروة والسلطة وان ده موش تمام ابدا وسوف ينتج عنه الفساد لا محالة ، طيب متفقين يا سيدى ايه الحل بقى ؟



قال لك الحل صعب وحياخد برضه عشرات السنين علشان نفك الارتباط الملعون ده بين السلطة والثروة يعنى لغاية ما احمد عز يموت هو وامثاله مثلا ولا ايه موش عارف؟



الحقيقة التى خلصت اليها من هذه الترهات التى يقولها مصطفى الفقى انه يمارس السياسة حتى امام الميكروفون ولا يستطيع ان يتخلص من عقلية السياسى الذى يحق له ان يكذب وان يناور ويخدع الناس حتى يشعروا انه مافيش فايدة فى البلد دى وان الثروة سوف تظل تتحكم فى السلطة وان السياسة لايمكن ان تحكمها الاخلاق يعنى نحمد ربنا ونبوس ايدينا وش وظهر ، فهو سياسى حتى النخاع هذا الرجل ال..... ال..... ال..... السياسى

هناك 38 تعليقًا:

نعكشة يقول...

:^)
و رفعت احد حاجبيها و تركت الاخر تحت - الدنيا حر برضو- معبرة عن الاسي و الحسرة و التعجب

بتتفقع مرارتي انا من الناس اللي بيفصلوا لدين عن الحكم وهما اصلا ولا فاهمين ولا دين ولا حكم

هففففف

و بعدين ليبرالية اية في لبس الموضة و الحب في الطرقات
واية علاقة دة بالسياسة يعني؟؟

و ال اية الثروة و السلطة هيا مش سُلطة دية بقة سَلَطة و كوشة

ماهو اكيد سياسي و محنك
بس ازاي سايبينو يعني يبعبع بالكلمتين دول
ولا مبقاش فية رقابة علي اي حاجة

يادي النيشة عالليبرالية و العلمانية و إلخ إلخ إلخ

ربنا يستر بعد عشرة عشرين سنة علي رأيو هيحصل إية


الحمد لله اني مبتفرجش علي الاخبار

دمت سالم

سلامٌ عليك

عدى النهار يقول...

الجدع ده مش عارف ليه كل ماشوف سحنته أحس إنه عنده إمساك أو محتاج يروح يستحمى.. حقيقي فى لمسة "أزمة داخلية" ظاهرة دايماً عليه

المهم.. أعتقد إن الثنائية الأهم هى "مصطفى الفقي وأمثاله" و "مواقع المسئولية". حل هذه الثنائية المتعددة هو بداية حل مشاكل البلد

سبهللة يقول...

انت عايز ايه من واحد زى دة
تفتكر بنى ادم نجح بالغش التزوير
هايكون مثالى مثلا ولا عنده مبدأ غير مبدأ اللى تغلب به العب به

بنت القمر يقول...

دين ايه بس
هو حد بقا عنده دين حق دلوقت حتي اللي اتدروشوا{عن كآبه} ادروشوا هربا من حياه فاسده ومؤلمه
ودي ناس عاديه مش بتمارس سياسه اصلا
البنات الي اتحجبوا مش بيمارسوا سياسه
ولا بتوع الدقون
لانه ببساطه مفيش احزاب دينيه بتحكم مصر ولا حتي بتخش الانتخابات
ده حتي انتخابات النقابات بيحاربوهم فيها_ الاخوان
وبعدين في الخمسينات والستينات زي انت ما قلت برضه كان عندنا فساد وبقايا احتلال وجيش منيل ومهززم واسلحته فاسده
فو امتي كان وضعنا كويس؟؟!
لا من ايام اليشمك والحبرة
ولا بعدها ايام الميني جيب ولا ايام الحجاب الحديث تاني
مش بقولوكوا فتش عن المرأه ...
بقل تقسيم تاريخ مصر الحديث حسب لبس المرأه.. يا عيني علينا , والله ياعيني
مش عارفين يغطونا ولا يعرونا
يقعدونا ولا يشغلونا..
يختتونا ولا يسيبونا علي خلقه ربنا وفي الاخر طلعنا احنا سبب بوظان البلد ارحمنا يا رب
احسن حاجه قلتها.. ثنائيه السلطه والثروة... يروحوا ويشوفوها ويتلهوا
تحياتي

قوس قزح يقول...

ماهو لو ماكنش سياسى و محنك و فيه كل الصفات اللى ذكرها عن السياسة
مكنش هيجى فى برنامج زى ده و يحط رجل على رجل و يتكلم كده

سياسة ايه اللى لازم تكون قذرة !!
تكون قذرة لما تكون ناوى تدخل تلهف و تمشى
لكن داخل تصلح و تظبط لازم تكون بدات بنفسك

و بعدين الرجل يعنى عنده حق
هى الناس تسيب الحب و الموضة و تركز فى الدين و السياسة ده كلام !!
هم ناقصين وجع دماغ كفاية عليهم انشغالهم بتامين حياتهم و حياة اولادهم واحفادهم و احفاد احفادهم من خير المنصب فى وقت قليل
ناس بتتعب و الله و بيعملوا بيزنس جبار فى وقت قليل
ناقصين بقى الناس و طلباتهم

خالينا نشرب الشربة احسن اهو نرتاح و نريحهم

تصدق انا مبحبش البوستات السياسية بخس انى هطرشق منها

انا جيت اسلم عليك و اقولك نورتنى بزيارتك بجد

سلام

حمادة زيدان يقول...

عم راجي الجميل

والله مصطفي الفقي لخص المشكلة في ارتباط السياسة بالدين ... وهو إحنا في مصر بنطبق الدين ولا نعرف عنه حاجة .. خاصة الفقي وأمثالة , تزوير تلاقي , رشاوى تلاقي , بلا أزرق تلاقي ... فين بقي الدين اللي مأرقهم وتاعبلهم مصارينهم ... أما الأرتباط التاني فهو واصحابه أكلوها وبقيت الثورة عندهم معديه المليارات ... ربنا يريحنا منهم يارب

قطــــوفها دانيــــــة يقول...

عادى مهو دلوقتى دى سمة العصر ان كل واحد يطلع يقول كلام غريب على التليفزيون يترك فيه المشاهدين بعد انتهاءه( وده حسب تخيلى يعنى ) شعره منكوش وفمه مفتوح ولا يسمع او يرى اى شخص يحدثه الى ان يرجع الى حالته الطبيعية ولا يلبث انه يفوق فيدخل فى حالة من الغيبوبة مرة اخرى اثر فرجته على شخصية تانية بكلام جديد من هذه النوعية ...
يلا هنقول ايه يمهل ولا يمهل

nody_1987 يقول...

يعنى جناب النائب المزور ده
يقصد ان احنا هانفضل نعانى من ظواهر التحرش والمعاكسات فى الشوارع طول ما الدين داخل فى السياسه
وبعدين ايه علاقه الاخلاقيات بالسياسه ؟
ونسى يقول على كده ان السياسى كمان بيسلم على السيدات السياسيات زيه
ودهما يرفضه الدينين
وبكده يبقى ده سبب تخلفنا وجعلنا من اكتر الدول تاخر

ده عصر عملقه الاقزام

Jana يقول...

وهل نسى ثنائية المجلس والنوم!!؟؟

عموما الليبرالية تدعو الى قبول أفكار الغير ايضا ..والحريات المكفولة للجميع
له اذن ان يتكلم ويضع ثنائيات كما يحب ولكنه لن ينجح ابدا فى وضع ثلاثية ..فعلها نجيب محفوط قبله
:)

الليبرالية على شواطىء الاسكندرية
حدث ولا حرج
افرحوا يا شباب ..أصبحتم ليبراليين
ثقافتهم لا تتعدى وصفهم لأنفسهم بالبرجوازية الانتهازية اللوذعية..وسيسعدوا للاضافة القيمة

Misrdream يقول...

اول زيارة لمدونتك الرائعه
استمتعت بكل ما شاهدته هنا
تقبل تحياتي

NilE_QueeN يقول...

على كده كلمة سياسي بقت شتيمه

Sherif يقول...

عزيزى راجى

اعتقد انها ثنائية بالتقلية

واعتذر لحضرتك .. هل يجب علينا أن نشاهد أى كلام وأى مواضيع ثم نبدأ فى تحليل مالايجوز تحليله؟

فقط لأنه أى كلام فارغ لاتسمعه من أى انسان عادى بره يقرأ ويفهم قبل أن يعرض مافهم على الناس؟

اعتذر لك مرة أخرى

بنت القمر يقول...

راجيه عملت ايه؟؟
طمنا من فضلك ان شاء الله اصدقائك معزومين علي الحلو بمناسبه النجاح المشرف يارب

على باب الله يقول...

هو أنا مستغرب فعلاً لأني سمعت الكابتن مصطفي قبل كده في كام برنامج و كان عاقل و أبن حلال

بس هو عنده حق أن الدين مطلق و لكن السياسة قابلة للنقد و التعديل عند الحاجة لصالح الفرد و مصالحه و ده طبعاً بدون كسر لقيم و نصوص الأديان .و إن كانت طريقته في عرض فكرته مضحكة جداً

و الجماعات التي تستقوي بالدين و تتخذه وسيلة للوصول للحكم و وسيلة لضمان شرعيتها بتقلب الأحوال في النهاية إلي سكة الأحوال البظرميط

( يا ريت تقرا مقالي في مجلة مصر الجديدة الإلكترونية )

اما ثنائية المال و السلطة فمش ها تتحل إلا بمحاربة الفساد .. يعني نضمن أن صاحب السلطة لا يستفيد من منصبه لتحقيق مصالح شخصية .. و ده من أصعب ما يمكن .. لإن الفساد زي ما إحنا عارفين .. للركب

و مازلت مستغرب أن مصطفي الفقي قال الكلام الهجايص ده

Misrdream يقول...

فى واجب ليك عندي فى المدونه
الرجاء التفضل بحله
تحياتي

راجى يقول...

نعكشة
انا بردو موش عارف ليه سايبينو يبعبع وحواجبينى الاتنين فوق موش عاوزين ينزلوا من ساعت ما سمعتو

يا مرحب بالدكاترة

راجى يقول...

عدى النهار

ياهلا بك

المصيبة انه واخد شلوت جامد من الحزب الوطنى ومن مؤسسة الرياسة قبل كده لكن مايقدرش يعيش بدون ثنائيات
منورين

راجى يقول...

سبهللة

عزيزتى الباش مهندسة

الغريب انه بيصرح ان السياسة لعبة قذرة وطبعا مفهوم ان الذى يلعب بقذارة يكون قذر ايضا يعنى بجاحة على الاخر وعدم احترام للناس
ياهلا بحضرتك

راجى يقول...

بنت القمر

طبعا حاجة تضحك ان مصطفى الفقى يصور الليبرالية على انها حرية جلوس العشاق فى المقاهى والنوادى وان المجتمع يقبل كده بصدر رحب
ومقالش ان الف باء الليبرالية هى حرية الشعب فى نقد حكامة عن طريق الصحافة والتظاهرات

اما ثالثة الاثافى فهى اعتقاده ان السياسةيجب ان تكون قذرة وغير اخلاقية حتما ولم يفكر طرفة عين فى احتمالية ان يلتزم السياسى بالاخلاق ناهيكى عن الدين
شكرا لكى

راجى يقول...

قوس قزح

اهلا بيكى ومدونتك رائعة
وانا كمان موش بحب البوستات السياسية لكنى مكنتش قادر استحمل كلام الرجل ده

وربنا يخليكى لينا

راجى يقول...
أزال المؤلف هذا التعليق.
راجى يقول...

حمادة

وانا باقول امين على دعائك

منور يا صديقى

راجى يقول...

قطوفها دانية

اهلا بحضرتك يا سيدتى

ومتفقين تماما فى حالة الذهول اللى بتصيب الناس اللى بتحاول تفهم كلام باعة الاوهام

وسلامى لنورا امانة

راجى يقول...

nody

الاقزام عمرهم مايقدروا يكونوا عمالقة

اشكرك على الزيارة والتعليق

راجى يقول...

jana
ليبرالية مصطفى الفقى فى اتجاه واحد فقط
one way
فهو لايقبل اراءالمعارضين وخصوصا لو كانوا مصنفين فى خانة الدين بحجة ان الدين مطلق ولكنه نسى انهم بشر وان رؤيتهم للدين يمكن نقدها وليست مطلقة بدليل اختلاف المذاهب والعلماء فى اجتهاداتهم
ونسى ايضا ان الاحزاب فى اوروبا ترفع شعار الدين فمعظم الاحزاب السياسية فى اوروبا لها اسماء مسيحيةبدون حرج من فرض تصورات مقدسة لايمكن مناقشتها
واشكرك على المشاركة

راجى يقول...

misrdream
اهلا وسهلا بك يا صديقى
واشكرك على الاطراء
وانشاء الله سوف اعمل الواجب:))

راجى يقول...

nile queen

على مذهب مصطفى الفقى ، اى نعم

تشرفنا

راجى يقول...

شريف بك

والله يا باشمهندس انا ساعات بحب اتفرج على الناس اللى من النوعية دى بدافع التسلية ومن باب اعرف عدوك

اشكر لك الزيارة والتعليق

راجى يقول...

قمر

الحمد لله حصلت على 91 % وربنا يسهل تدخل فنون جميلة

واشكرك على السؤال عن ابنتى الوحيدة وعلى فكرة ممكن تشوفى صورها على الفيس بووك

لكى الشكر

راجى يقول...

على باب الله

اهلا بحضرتك لاول مرة

وممكن تشوف الفيديو فى اليوتيوب هو كان فى ندوة لمناقشة كتاب الدكتور حسن حنفى على الجزيرة مباشر الاسبوع الماضى

ولكن اسمح لى اختلف مع حضرتك فى ان السياسة لا تخضع للاخلاق ، بل يجب ان تخضع للاخلاق وده اللى حاصل فعلا فى كل العالم ان السياسى ماشى على خط اخلاقى فلا كذب ولا غش ولا خداع
وليس معنى ان نتفاوض او نساوم فى قضية ما ان نغش ونكذب ونخدع فايضا المفاوضات والحلول الوسط ممكن ان تكون مبنية على خلفية اخلاقية

اشكر وانشاء الله اقرا لحضرتك

بنت القمر يقول...

الف الف مبروك ان شاء الله يكون لها نصيب في فنون.. طبعا شفت صورها من قبل ما تقول
ربنا يخلي... بس انا منّظره عليها
:) وفي اطار تبادل المنافع منظره كمان علي علي وعثمان
:))))))))
عندي تانيه وسادسه ابتدائي
:D:D
لو فاضيين يستنوا شويه
:)))
تحياتي

canary يقول...

وانت مستنى ايه من الفقى يعنى؟
يقولك قال الله وقال الرسول؟
ايه يا بشمهندس مش تخليك انت اكبر منه شويه وهو لو كان يعرف حاجه كان دخل مجلس الشعب؟
انت بتتكلم عن واحد يحمل اسفار
وبعدين دة اليبراليه دى مفيش اكتر منها عندنا لحد ما قربنا نمشى على دماغنا من البلد وبندعى ربنا يمن علينا بشويه رجعيه وتخلف عشان البنات والشباب يتلمو فى البيوت احسن لو اليبراليه كترت عن كدة هتقلب بوباء وربك يستر
ثايا بقى حكايه السلطه والثروة دى ف ربنا تاب علينا منها من زمااااااااان ومبقاش حيلتنا حاجه منهم والقناعه كنز لا يفنى

راجى يقول...

كنارى
والله انتى عايزة ضرب النار
كنتى فين يا صبية؟
عاوز تقرير مفصل دلوقتى حالا

موناليزا يقول...

فكرتنى بكلام محافظ الاسكندرية الاسبق حينما تكلم مع عمرو اديب
وبدل مايبرر افعاله الغريبه لشعبه كان رده مستفزا

!!! عارفة ... مش عارف ليه يقول...

الكلام ده فكرني بفيلم بخيت وعديلة الجزء الاول لما كانت شرين بتعنف خاطيبها احمد راتب وبتقوله

يا مووووووووظف

من البوست ده بقى يعني لما الواحد يضايق من حد يقوله

يا سيااااااااسي

تحياتي
وليد

راجى يقول...

موناليزا

فعلا كلام السياسيين والمسؤلين مستفز لانهم يفترضون انهم يخاطبون قطيع من البقر
تحياتى

راجى يقول...

عارفة موش عارف ليه

صحيح على كلام مصطفى الفقى فالسياسى نصاب وكذاب فالكلمة تصلح ان تكون سباب يعاقب عليه القانون
تحياتى

snohe يقول...

صديقى العزيز
=============
اول زياره لمدونتك .
انا شاهدت الحوار
وسمعت كلام الدكتور مصطفى الفقى
كما فعلت انت . ولكن تسمح لى ان اختلف معك ومع كثير ممن علقو على البوست ولهم كل الحق فى ارائهم طبعا

مع العلم اننى لا انتمى لاى حزب ولا اى جماعه ولا اى جمعيه لعدم الاهتمام ولعدم وجود وقت عندى


صديقى العزيز

اولا- اهم ما كان فى الندوه هو الكتاب والكاتب
وكنت اتمنى ان تذكر اسم الكتاب والكاتب لانه مهم ويتكلم عن غياب دور مصر التاريخى وعن مشكلات فعلا مهمه

ويتكلم ايضا الكتاب عن الفساد الحكومى فى مصر وعن الكثير من مظاهر التخلف التى نعيشها ويحلل اسبابها

يعنى ببساطه الكتاب هايل ورائع ويستحق القراءه لانه يفضح الكثير من المساوىء عندنا

وكان يحب ان تركز على الكتاب او تزكر اسمه على الاقل او اسم الكاتب


ثانيا - فعلا توجد اشكاليه فى رفع الشعارات الدينيه لعدةأسباب
- انها تقسم المجتمع الى مسلم وغير
مسلم
- ايضا معظمنا يفهم الدين من
وجهة نظره الشخصيه وتوجد خلافات
كثيره فى الفهم
- اكيد كلنا بنشوف الفضائيات الدينيه واعلاناتها الجميله عن الاعشاب الطبيعيه وعلاج الضعف الجنسى وملابس المحجبات والفتاوى الجميله
كذلك اهتمامهم بالشكليات وعدم الاهتمام بامور مهمه ومشكلات اكبر نعيشها يوميا
كذلك التركيز على الاخرة والجنه وحور العين ومالا عين رأت ولا اذن سمعت
وكأنهم يتفقون مع الحكومه على ان الدنيا للحكام واللاخرة للمحكومين

الدنيا كلها كانت مقلوبه على تزوير الانتخابات وقضايا التعذيب وقضايا الفساد والدم الملوث ورغيف العيش

والشيوخ بيتكلمو فى الفضائيات عن حور العين والجنه ونعيمها .

الهم ارزقنا جميعا الجنه

ثالثا -فعلا اشكاليه الفساد واقتران الثروة بالسلطه موجوده وواضحه


صديقى العزيز ارجو ان تسامحنى على الاطاله

على فكره انا لا ادافع عن الدكتور مصطفى الفقى او غيره ولكن اهتم

بالكتب والافكار المطروحه فيها