المؤامرة

وبعدين بقى فى ام الغلا الفاحش ده ؟ ياناس يا هوه انا لسة قابض مرتبى امبارح ولغاية النهاردة صارف اكتر من الفين جنيه فواتير كهربا ودى اس ال وتليفونات وشوية خضار مايكفوش اسبوع وفرختين و2 كيلو لحمة من ارخص جزار فى مصر الجديدة وشوية بقالة ومنظفات ، الله طب وبعدين يا حكومة يا بنت الذين اعمل ايه ده الوقت ؟ واكمل الشهر اللى لسة مابدأش اصلا ازاى؟
يعنى بعد العمر ده كله وباشمهندس قد الدنيا اروح اقف فى طابور العيش ؟ ولا اعمل بطاقة تومين ( تموين ) ولا احط بنزين 80 ولا اولع فى العربية ولا اودى الواد كريم يشتغل صبى مكوجى فى الصيف ؟ ولا احسن اطوح الموبايل من الشباك؟
ده انا باشعر بالخسة والنذالة وقرفان من نفسى عشان باصحى بدرى اقفل التكييف على الجماعة ( حرمنا ) والاولاد وهم نايمين ويكملوا نوم من غيره علشان يحرموا يسهروا طول الليل واوفر كام جنيه ( فاتورة الكهربا الشهر ده 272 جنيه والله على ما اقول شهيد )
وبعدين يا جماعة الخير انا ماليش دعوة بممدوح زفت اسماعيل ولا بيوسف شاهين ولا الاهلى ولا الزمالك انا عندى مشكلة اهم من ده كله ، ازاى اقدر احط الاكل على الترابيزة واحط تى شيرتات على ظهر العيال الشحوطة اللى مالهمش لازمة وازاى المدام توافق تعمل كشرى وبصارة وبذنجان مقلى 3 ايام فى الاسبوع من غير اى شكوى او تذمر ، موش بيقولوا اللحوم بتزود الكلسترول ؟ طيب نعيش حياة صحية بقى من اول اغسطس بلاها جبنة رومى وبلاها بسطرمة وهامبرجر خلينا فى الاسطمبولى ام ملح جامد عشان محدش يحف وهو بيغمس
المؤامرة الحقيقية على الشعب المصرى هى الغلاء وكل اللى بيحصل من حراك سياسى واجتماعى ورياضى واعلامى وفنى وثانوية عامة وفتنة طائفية هو مجرد ستار ومن وراءه تأمر فاضح وتستر قذر على ضرب الطبقة المتوسطة ، الاخوة الفقراء حيفضلوا فقراء زى ماهم والسادة الاغنياء سوف يزدادوا غنى واحنا بس اللى بننضرب وعضمنا بيتكسر
ليه طيب ؟ وما هو السر وراء ذلك الذى هو كذلك ؟ هل علشان احنا مثقفين ؟ ولا علشان احنا اللى فاهمين وهارشين؟