الأربعاء، يوليو 30، 2008

المؤامرة




وبعدين بقى فى ام الغلا الفاحش ده ؟ ياناس يا هوه انا لسة قابض مرتبى امبارح ولغاية النهاردة صارف اكتر من الفين جنيه فواتير كهربا ودى اس ال وتليفونات وشوية خضار مايكفوش اسبوع وفرختين و2 كيلو لحمة من ارخص جزار فى مصر الجديدة وشوية بقالة ومنظفات ، الله طب وبعدين يا حكومة يا بنت الذين اعمل ايه ده الوقت ؟ واكمل الشهر اللى لسة مابدأش اصلا ازاى؟
يعنى بعد العمر ده كله وباشمهندس قد الدنيا اروح اقف فى طابور العيش ؟ ولا اعمل بطاقة تومين ( تموين ) ولا احط بنزين 80 ولا اولع فى العربية ولا اودى الواد كريم يشتغل صبى مكوجى فى الصيف ؟ ولا احسن اطوح الموبايل من الشباك؟
ده انا باشعر بالخسة والنذالة وقرفان من نفسى عشان باصحى بدرى اقفل التكييف على الجماعة ( حرمنا ) والاولاد وهم نايمين ويكملوا نوم من غيره علشان يحرموا يسهروا طول الليل واوفر كام جنيه ( فاتورة الكهربا الشهر ده 272 جنيه والله على ما اقول شهيد )
وبعدين يا جماعة الخير انا ماليش دعوة بممدوح زفت اسماعيل ولا بيوسف شاهين ولا الاهلى ولا الزمالك انا عندى مشكلة اهم من ده كله ، ازاى اقدر احط الاكل على الترابيزة واحط تى شيرتات على ظهر العيال الشحوطة اللى مالهمش لازمة وازاى المدام توافق تعمل كشرى وبصارة وبذنجان مقلى 3 ايام فى الاسبوع من غير اى شكوى او تذمر ، موش بيقولوا اللحوم بتزود الكلسترول ؟ طيب نعيش حياة صحية بقى من اول اغسطس بلاها جبنة رومى وبلاها بسطرمة وهامبرجر خلينا فى الاسطمبولى ام ملح جامد عشان محدش يحف وهو بيغمس
المؤامرة الحقيقية على الشعب المصرى هى الغلاء وكل اللى بيحصل من حراك سياسى واجتماعى ورياضى واعلامى وفنى وثانوية عامة وفتنة طائفية هو مجرد ستار ومن وراءه تأمر فاضح وتستر قذر على ضرب الطبقة المتوسطة ، الاخوة الفقراء حيفضلوا فقراء زى ماهم والسادة الاغنياء سوف يزدادوا غنى واحنا بس اللى بننضرب وعضمنا بيتكسر
ليه طيب ؟ وما هو السر وراء ذلك الذى هو كذلك ؟ هل علشان احنا مثقفين ؟ ولا علشان احنا اللى فاهمين وهارشين؟

هناك 67 تعليقًا:

... يقول...

ساعات بيبقي الجهل نور

والله يا باش مهندس ساعات باحس إننا لو بطلنا يتعمل فينا كدة هنسأل : هو فيه إيه .. بطلتوا تفعيص فينا ليه
نحسنا باين

نعكشة يقول...

ههههههههههههههههه

بيعلمونا زاي نعيش حياة صحية و نعمل ريجيم

اعتقد باين الجبنة الرومي بقت ب 40 جنية ( اغلي من اللحمة) كانت زمان ب 24 باين انا فاكرة عشان السيد الوالد بيحكي القصص دية قدامي

هوه انا مش عارفة صراحة

بس مفروض الواحد ياخد تدريبات علي التوفير
حاجات بسيطة ممكن نوفرها
ونوفر بيها

مش عارفة

فيه اقتراح آخر

انك تزود من الصدقات

" وَ يُرْبِي الصَّدَقَاتِ"

ربنا بيدي بدالها خير كتير

حلول تانية غير التوفير و الصدقة
مش عارفة

دمت سالم

سلامٌ عليك

Ahmed Kamal يقول...

إنت لسه واخد بالك يا هندسة ؟ ده الناس خلاص اتهرت أكل صحي لدرجة إن منظمة الصحة لو زارتنا حناخد جايزة شعب الرجيم المثالي .

و بعدين مش متهيالي إنهم مستقصدين طبقة معينة ، هم ناويين على المصريين كلهم لو ربنا قدرهم ، و هم يعني الناس اللي فاهمين و هارشين فرقوا معاهم إيه؟

بنت القمر يقول...

اولا المؤامرة الحقيقه هي فين التمبليت القديم؟؟؟؟؟؟؟
كان تحفه
ايه التمبليت الميري ده؟؟
وايه كده وفين الاضافت اللي كانت يمين وشمال؟؟
واخيرا انا عاملا بوست اسمهتآمر وانت مؤامرة؟؟
ده توارد بوستات بقا
ها اقرا وارجع اعلق

عاشــــــ النقاب ـقــــة"نونو" يقول...

السلام عليكم
اولا مبروك الاطلالة الجديدة ولو ان القديمة كانت مميزة
بالنسبة بقى للمؤامرة اذا كنت حضرتك صرفت الفين جنيه قبل الشهر ما يخلص
فانا الضهر دة استلفت حوالي 650 جنيه علشان اكمل وطبيعي علي للشهر الجاي وربنا يسترها بقى
دي حاجة
الحاجة التانية ياترى اي مؤامرة فيهم على التانية
هل بيشغلونا بالفساد على ارتفاع الاسعار ولا بالاسعار على الفساد
مين بيشغلنا عن مين
المشكلة ان العملية من سيء لاسوا وربنا يسترها يارب
ونطلع منها على خير
تحياتي

حمادة زيدان يقول...

عمنا راجي

والله الظروف السودة دي مبهدلا الشعب كله أغنياء وفقراء ... أصبحنا جميعنا بننحت في الصخور ... حسبي الله ونعم الوكيل فيهم وفينا كمان لأننا راميين العبيطة وساكتين

مش عاوز أقولك شيء تاني غير أنه الواحد خلاص هيتجنن او ينتحر

سوري يا بشمهندس نسيت أباركلك على النيو لوك الجديد

نزلت جزء جديد من حميدة

عروس البحر يقول...

اموت و افهم ايه سبب ضياع المرتب ده؟
حاجة غريبة
اللحمة بسبعة جنيه و الموبيل الدقيقة ب عشرة صاغ و الخضار رخص و الطماطم الكليو بنص جنيه و زي الفل و الفرخة بخمسة جنيه و لا البنزين ده ارخص حاجة
فين المؤامرة؟؟؟؟؟؟

أبو عمر - الصارم الحاسم يقول...

هههههههههه

فيه ماسورة تهييس ضاربة في المدونات النهاردة


تهييس بتهييس بقى .....


فعلا المهم هي المؤامرة على الطبقة المتوسطة

ما هو الحكومة عارفة ان كل يغني على ليلاه..ونحنا - احنا - كل يغني غلى ليلاه

فهتضيع يغني وتضيع ليلاه

كنت لسه بفكر بشكل مشابه...اني اما انزل مصر ان شاء الله...تلات ايام غدا هيبقوا فول

يعني الواحد مش ضامن الظروف....يعود نفسه من دلوقت...يمكن داخلين على السنوات العجاف
:))


الحل التاني...اننا نموت مالك العبارة ومسؤولي شركته - والمعنى في بطن الشاعر- ايه رأيكم

انا اللي بتكلم مش راجي...راجي عنده عيال..انا لسه متأهلتش
:))))

(green eyes) يقول...

بصراحة انا شايفة انك عايش في رفاهية جامده اوي ومزودها حبتين.
كويس انك جبت فراخ ولحمة وشوية بقاله ودفعت الفواتير.

الحياة في مصر بقت ازفت من كدا بكتييييير .
غيرك مش لاقي يجيب حتى رغيف العيش.

ولسه اللي يعيش ياما يشوف واللي يعيش في مصر يشوف اكتر بكتيييييييييير

بنت القمر يقول...

الاستاذ راجي الفاضل
======================
هو عشان نتكلم كلام واقعي
ازاي تنظم الميزانيه
انا ها اقولك انا بعمل ايه
انا بقسم الفلوس نصين يعني مصروف البيت عشر قروش
يبقا لا بد وحتما ولازم اشيل قرشين علي جنب في ظرف في درج في رف مستخبي
طول لزوم الطوارئ والذي منه زبعدين بقسم التمن قروش الباقيين علي نصفين الشهر اربعه نص اول واربعه نصف تاني
الجزء الاول بيكون فيه فواتير وجراج وبواب وكده ادفعهم الاول واخلص نفسي
بعد كده اضبط الباقي اللي غالبا بيكون جزء صغير اووووي علي بقيه النصف الاول من الشهر ومهما كانت الظروف مش بمد ايدي علي الاربع قروش التانيين
نيجي بقا للنصف التاني بيكون خفيف اوي لانه ما فيهوش متاعب البدايه ولا فواتير ولا كده في النص ده بقا بمون البيت لحوم وفراخ وسوبر ماركت وكده خلص الشهر تمام ونيجي بقا للشهر اللي وراه بيكون اوله البيت لسه متمون لانه قريب من نصف الشهر الاخير
تقدر تسحب من التموين ده عادي القرشين بقا لو متصرفوش بتع الطوارئ وده نادرا بخلي الشهر اللي وراه عليهم قرشين برضه للطوارئ
لكن حكايه صرف الفلوس كلها فواتير وتموين اول الشهر بتخلي الدنيا تبوظ مرة واحد واخر الشهر يبقا الواحد بيشد في راسه
دي خلاصه تجربيتي المتواضعه في تضبيط الميزانيه
بالنسبه بقا للبس والفسح والحاجات دي فحلها كالاتي الاهم فالمهم
يعني لو بنتي عاوزة تطلع رحله الشهر ده يبقا يتأجل كارت الموبايل او الكوتشي
حتي لو ممكن عشان موصلش لمرحله الصفر
لو مصاريف المدرسه ما ادفعتش يبقا المصيف يتلغي او يتأجل
بس
جرب حكايه تقسيم الميزانيه نصين دي وقولي
يوضع سره في بنت القمر:))))))

Empress appy يقول...

بابا زمان يقولي يا رب تروح السجن والله يومين علشان تاكلي عدس وبساره علشان انا مش بحبهم دبوقتى مش بيقدر يقولى الكلمه دي اقوله هااااا العدس ب13 حنيه اوعي تتكلم يقولى جه الزمن اللى ولاد التيييييييت خلوا واحده زيك نرد عليا ههههههههههههههه

شوفت بقى وصلت لفين

سمراء يقول...

علشان احنا مش عارفين نتجمع ونبقي كلمة ورأي واحد يقف ويقول كلمته ضد الوضع السئ اللي الكل عايشة

سمراء

Unknown يقول...

غريبه!!!

مع انهم فهموني انو مصر رخيصه جدا مقارنة بالأردن

احنا االغلا عنا صاير يا ساتر!!!

وليه انتا زعلان؟؟

عين فى الجنة يقول...

بثينة

طبعا نحسنا من كتر الضرب

اهلا بيكى صاحبة مدونة مميزة وانا معجب جدا جدا باسلوبك الساخر النتفلسف او لنقول المتفلسف الساخر

أميرة جمال مصرية الديانة والجنسية يقول...

الحل ببساطه :
1\اتفرج علي شويه مسلسلات تصيبك ببعض البلاهه.

2\طبيب نفسي واقل واحد فيهم الروشته
ب 75 جنيه ضيف عندك الادويه بتاعتهبكماله الفلس .

3\اعمل نفسك اهلاوي وانبسطت كده وكده يعني .

4\ اتلطع ساعتين ومون 80 زينا ومتنساش تدفع بقشيش 3 جنيه .

5\ وليه تكيف اصلا نشغل مروحه او ننام في الساونا مفيده جدا جدا عشان تفقد بعض الوزن .

6\مش قادره اكمل كلام كفايه نصايح عليها ضرايب
تحياتي للحكومه اللي مريحانا ومهنيانا
وصندوق اااااالاسعافات الاوليه والمثلث امانه .

سـردية يقول...

انا لا أتعاطعى مع هذه الازمات حتى عند وجودي في مصر لكن طبعا متألم بشده من الأوضاع... كمان يعني ربما تكون قادر على الأستمرار ببعض الضغط... لكن هناك من يعيش تحت خط الفقر البغيض

عجبتني عفوية سردك
واسمح لي اضع عنوان مدونتك عندي لجديتها
شريف الصيفي، ألمانيا هانوفر

canary يقول...

اولا مبروك على تغير شكل المدونه وكدة احسن عشان الاولى كان الدخول عليها صعب جدا وبتاخد فترة طويله اوى تحميل
ثانيا بقى
لما سكان مصر الجديدة يشتكو من الفقر امال سكان القديمه يعملو ايه
(مصر برضه يعنى)
وبعدين ليه التكيف مالها المروحه اللى بتفضل تزن طول الليل دى حتى بتعمل ونس تكييف ايه و نيله ايه
وماله البدنجان المقلى
طب دة انت دلوقتى لو بتاكل بتنجان مقلى والمصحف تبقى من كبار القوم
يا باشا قزازه الزيت بقت ب 15 جنيه
والبدنجان بياخد على الاقل نص قزازه قلى يعنى شوف باقى تكلفه الغدوة قد ايه والعدس اللى مش عاجب ولادك والمدام دة بقى كنز مخفى غير سهل الحصول عليه لان الكيلو بتاعه وصل 14 جنيه
يعنى مش اكل فقغرا زى زمان
(فقغر دى بدل فقرا)
وجبنه رومى؟؟؟؟؟ بتأكل عيالك جبنه رومى؟ دى بتمن كيلو لحمه
ماياكلو يا اخويا زينا جبنه من اللى معموله ببودرة السيراميك دى حتى نعمه مش لقينها بعد هى رخرة ما غلت بسبب غلاء اسعار السيراميك
بالنسبه بقى لللبس ف دة مش مشكله انت تجيب الطقم وتقسمه على عيلين
واحد ياخد نصه اللى فوق والتانى ياخد نصه اللى تحت وحتى احنا فى الصيف يعنى مش هيبردو
وجاى تشتكى ؟طب اسكت بقى احسن انا معبيه منك انت وعيالك ومش هقول اكتر من كدة كفايه عليكو

snohe يقول...

عندك حق فى كل ما تقوله

فعلا
احيانا اشعر بان هناك من يسعى جاهدا لافقار هذا الشعب الكبير


كلنا فى الهم سواء

شكرا

عين فى الجنة يقول...

نعكشة

اقتراح الصدقات وجيه جدا ، وانا مستعد لتلقى صدقاتكم بعد الظهر يوميا فى نادى الشمس وبالتحديد فى ملاعب التنس عند بوابة رقم 2 وموش صدقات عينية بس ممكن تكون معنوية
:))))
بخصوص التاج انا اسف على التأخير لظروف مكتب التنسيق الالكترونى وسوف اعمله لما تفرج وربنا يخليكى ليا

عين فى الجنة يقول...

احمد بك كمال

صديقى وعزيزى بس انا فعلا مقتنع ان المستهدف من مؤامرة الافقار هى الطبقة المتوسطة والسبب واضح لان تحالف السلطة والثروة محتاج سوق كبير من الفقراء لترويج منتجات رجال الاعمال الهابطة والرخيصة والتى تقدم كبديل للوجبات الصحية التقليدية مثل الشيبسى وال gunk food وكذلك اجبار الاسر من الطبقة المتوسطة على اهدار تعليم ابنائها لتتمكن من اطعامهم وبالتالى يتخلصون من المعارضين المثقفين وتحويل المجتمع الى مجتمع ثنائى الطبقات من الاغنياء والفقراء فقط
لك التحية والود

عين فى الجنة يقول...

قمر
انا زهقت من شكل المدونة القديم بس ده هو السبب وانا فى انتظار تعليقك

عين فى الجنة يقول...

عاشقة النقاب

اهلا بيكى يا اختى وفعلا الغلاء بقى عبارة عن وحش بياكل كل الفلوس اللى بتدخل جيوبنا
ربنا يستر

عين فى الجنة يقول...

حمادة سكر زيادة

ماشى يا جميل سوف نقوم بالقراءة والتعليق as soon as possible

عين فى الجنة يقول...

عروس البحر

ماهو ده اللى حيخلينى اتجنن يعنى الحاجة رخيصة جدا زى مانتى بتقولى ولكن المرتب بيطير طيب ليه؟
عاوز حد يفهمنى

عين فى الجنة يقول...

الصارم الحاسم

اهلا بيك ، انت فين يا عم من زمان وحشتنى خناقاتك ومعاركك الجميلة مع المدونين
ابقى تعالى نشرب شاى لما تنزل مصر اهلا وسهلا

عين فى الجنة يقول...

green eyes
طيب ليه القر ده يا جميل ؟
يعنى انا موش من حقى اعيش فى مستوى انسانى معقول زى اى مواطن فى اى بلد تانى؟واخر الشهر اشيل قرشين للزمن؟

عين فى الجنة يقول...

قمر
انا عاوز بس استأذن ادم تحلى علينا ضيفة لمدة شهر واحد واوعدك كل المرتب وبدلات السفر حيكونوا بين ايديكى قسمى فيهم زى مانتى عايزة واخر الشهر يبقى التوفير من نصيبك مقابل انك تطبقى نظريتك الاقتصادية فى بيتنا على الطبيعة
والعدد الاضافى لافراد الاسرة لن يتغير لان عمر ابنى البكرى سوف يعتمد خلال هذا الشهر على مرتبه هو وسوف اضرب يجى عشر عصافير بحجر واحد
اولا نتشرف بوجودك معانا
ثانيا نتعلم منك ادارة الميزانية
ثالثا اريح دماغى من القلق طول الشهر من طلبات السادة الابناء الافاضل
رابعا ان عمر يبطل يطنش ويختشى شوية ويساهم فى مصروف البيت من مرتبه
ربنا يخليكى تعالى

نعكشة يقول...

هههههههههههههههههههههه
تعاطفك لوحده مش كفاية

بالنسبة للتاج
خد راحة سعادتكم يا فندم
هوه حكم
دة تاج :D


سلام عليكم

The Son of Man يقول...

مش حسد والهى بس عاوز اعرف انتا بتاخد كام فى الشهر .

عين فى الجنة يقول...

appy
اولا تحياتى لاجمل كوكب فى عالم التدوين
ثانيا وحيث انك عرايشية فما فيش احسن من زيت الزيتون مع الزعتر ونحلى بالخوخ اللى طالع على مية المطر
امتى حتدخلى القفص الذهبى ؟

عين فى الجنة يقول...

سمراء

عندك حق ولكن الاحتجاج وحده لا يكفى يجب اعادة النظر فى عاداتنا واسلوب حياتناونغير قدر استطاعتنا

تحياتى

عين فى الجنة يقول...

مياسى

الغلاء فى العالم كله لا يسمح له بالتوحش وهناك اجراءات اقتصادية تتخذها الحكومات للسيطرة على الغلاء والتضخم وذلك للحفاظ على تركيبة المجتمع
اما فى مصر فلا توجد اجراءات حقيقية محسوسة تتخذها الحكومة لصالح الطبقات التى تتأثر بالغلاء بل يترك الحبل على الغارب كما يقولون والنتيجة هى انتقال الطبقة المتوسطة الى خانة الفقراء وبالتالى يتم تهميش الثقافة والتعليم لاجل توفير الطعام والعلاج
اخدتى بالك ؟
اشكرك ولكى التحية

عين فى الجنة يقول...

صاحبة القمر

نصائحك غالية وبخصوص بنزين 80 فأنا مستعد اقف فى الطابور بس فى الاخير موتور السيارة حيصفق لانخفاض رقم الاوكتين
المسلسلات لا اطيق حتى سيرتها والاهلى والزمالك بيعكسوا الفساد السائد وانهيار الاخلاق

تحياتى

عين فى الجنة يقول...

شريف الصيفى المانيا هانوفر
ياترى ايه شروط الهجرة الى المانيا ؟
وعامل ايه مع حليقى الرؤوس ؟

ارحب بك صديقا جديدا

عين فى الجنة يقول...

كناريا

ايه القر ده على الصبح؟

انا لو كان عليا لوحدى عش العصفورة يكفينى وعلى البساطة البساطة افطر جبنة بزيتون واتعشى بالبطاطا
:)))

عين فى الجنة يقول...

snohe
اهلا بك يا صديقى

اولا اعتذر على عدم الرد على تعليقك على موضوع مصطفى الفقى لانشغالى الشديد
لكن انا زرت مدونتك وهى ملفتة للنظر وتحتاج للتأمل

تحياتى لحضرتك

عين فى الجنة يقول...

نعكشة
امال فين سالم ؟

عين فى الجنة يقول...

the son of man

موش حاقول لك
:)))

سلوى يقول...

يعني أغيب شويه شكل المدونه يتغير

طيعا الشكل الجديد إقتصاااااادي :)

حنى زي ما قالت كناري مش بياخد وقت والصفحه بتفتح بسرعه

مش بقولك إقتصادي :)

أهو يبقى إقتصادنا في شئ وخلاص

سردك جميل للواقع والأجمل طريقتك الساخره

طبعا شر البليه ما يضحك :)
دمت بكل الخير

سـردية يقول...

معلش مفهمتش موضوع " حليقي الروؤس " ده

عين فى الجنة يقول...

شريف الصيفى

حليقى الرؤوس ، جماعات النازيين الجدد الكارهين للاجانب
كنت باسأل حضرتك هل ياترى سببوا لك اى متاعب؟

عين فى الجنة يقول...

سلوى العزيزة

وحشتينى جدا جدا والله ، ارجو ان تكون كل امورك على مايرام
واشكرك على التعليق الظريف

بنوتة يقول...

صدقني يا راجي مش انتى لو حدك ده التاكسات بتقف بال 5 ساعات في طابور بنزين 80 بس انا مختلفة مع نعكشة في اول جملة اللي بتقول" بيعلمونا زاي نعيش حياة صحية و نعمل ريجيم" انا من رأيي ان هما بيعلمونا ازاي نعيش حياة صعبة بس انا اؤكدلك ان اللي بيغلى لا يرخص تاني بتاتا
ربنا يكون في عونك و في عون الشعب المصري

قوس قزح يقول...

علشان احنا اللى نستاهل
لا رضينا بالسكوت
ولا رضينا نسرق و نرتشى و ننغنغ نفسنا

انا لو منك
اديها الفلوس و اخد مصروف و هى تتصرف بقى :)

عين فى الجنة يقول...

بنوتة

اهلا وسهلا بيكى صديقة جديدة ذات مدونة مميزة

واشكرك على التعليق الظريف

عين فى الجنة يقول...

قوس قزح

تفتكرى هى حترضى؟اديها الفلوس وبعدين اقعد احاسبهاموش حنخلص

اشكرك على الزيارة ومرحبا بك

غير معرف يقول...

راجى باشا

مبروك النيولوك الرائع ده

معك قلبا وقالبا فى أن تلك هى المؤامرة الحقيقية ..

تسأل عن الحل .. يقول لك تزود دخلك .. بس ماقالش ازاى

ليصدق دائما قول عمنا محمود السعدنى

لكى يزداد الغنى كبابا
و يزداد الفقير هبابا

هون على نفسك .. كلنا فى الهم شرق

nody يقول...

تصدق انى بسبب حضرتك حسيت بالمؤامره دى
من اسبوع قلت اخرج اشم هوا على المشايه
اشمعنى البش مهندس راجى يعنى يجى ويلف الجامعه وانا لا
وقد كان
اتمشيت وجبت ترمس ولب
وايس كريم من عاند البارون
الى قدام بواباه الجامعه
يعنى ما جبتش اى حاجه غاليه
واكتشتفت ان كل حاجه من التلت حاجات دول تمنا زاد اكتر من الضعف
ساعتها بس حسيت بالمؤامره

أبو عمر - الصارم الحاسم يقول...

طب بما ان فيها كباية شاي....فياريت تبقى تعدي في المدونة كده تنورني
:)


عادة انا ما باطلبش الطلب ده من حد...لكن منك هاطلبه

نتقابل في مصر ان شاء الله اكيد

dodda يقول...

الناس المتوسطين
عندهم شوية ثقافه وفاهمين
وعشان كده متعذبين
ما هم اللى عليهم العين
ومنهم الناس اللى فوق خايفين
اول ما يسمعوا الندا
حيروحوا قايمين..ثايرين!!
قول يا معين

Unknown يقول...

هى من جهة مؤامرة فهى مؤامرة المهم بعد ما عرفنا أنها مؤامرة حنتصدى لها أزاى ؟

وش شرير

Empress appy يقول...

لا انا مش داخله
اصلى طمعت فى القفص بعته ههههههههههههه وقولت يفك ازمه

حسن ارابيسك يقول...

ولسه ياما..ياما..ياما في عمرنا
ولسه ياما نشوف ويحصلنا
مش احنا ساكتين
مش احنا راضيين
وعلى رأي ستي الهم طايلني وطايلك
بتشكي لمين وتقول لمين ياباشمهندس
أما أنت بتشتكي كده وانا وغيرنا كتير امال الناس اللي مش لاقيه حاجه خالص تعمل ايه وتجيب منين
بيقولك فقراء زمان بالنسبه لفقراء اليوم هم أغنياء ومرفهين
ياعيني ياعيني ياعينى على البلد
بكره يوصل بالناس الحال تاكل لحم بعضيها
واللي كنا بنشوفه في الأفلام من أكلي لحوم البشر يصبح حقيقة
تحياتي
حسن أرابيسك

(green eyes) يقول...

لا طبعا انا مش قصدي القر
انا عنيا مش وحشة والله :) :) :)
كل الفكرة ان بجد الحياة في مصر وحشة اوي
وعلى فكرة مش قله امكانيات أبداااا
لأن موارد مصر كويسه جدا بس مفيش استغلال صح للموارد دي بالاضافة طبعا للسرقة اللي كلنا عارفينها.
تحياتي.

Mona Shereif يقول...

ههههههههههههههههههههههههههههههههههه
طيب وبعدين
انا اتجننت

Unknown يقول...

راجي

بما أنك بتحب الحكي الشامي كتير

أنا نزلت بوست كلو حكي شامي ع مدونتي

أتمنى انو يعجبك:)

عين فى الجنة يقول...

شريف بك

اهلا بك يا صديقى

واستأذنك فى استخدام كلمات عمنا محمود السعدنى فهى نتاج قريحة ابن بلد اصيل

عين فى الجنة يقول...

nody
والله فكرتينى باليومين اللى قضيتهم فى المنصورة
انشاء الله حاسافر تانى قريب

عين فى الجنة يقول...

الصارم الحاسم
حاضر ، سوف امر على مدونتك فورا انشاء الله

عين فى الجنة يقول...

الصارم الحاسم
حاضر ، سوف امر على مدونتك فورا انشاء الله

عين فى الجنة يقول...

dodda
يا معين يارب

عين فى الجنة يقول...

عاليا

اربطوا الحزام اربطوا الحزام

عين فى الجنة يقول...

ابى

ياخسارة يعنى راحت العزومة؟

عين فى الجنة يقول...

حسن بك ارابيسك

شرفتنا ونورتنا ولك وحشة والله

عين فى الجنة يقول...

green eyes
انا بس بهزر معاكى مافيش حاجة

عين فى الجنة يقول...

sometimes
نبقى اتنين اتجننوا مع بعض

عين فى الجنة يقول...

مياسى
فعلا والله بعشق الحكى الشامى