الاثنين، يناير 21، 2008

نفسنه



لو الدنيا ملطشة معاك ومخنوق من الزحمة وموش قادر تستحمل الغلا والناس بتعاملك بعدم احترام ومراتك او جوزك ضارب بوز وموش ملاحق على الدروس الخصوصية وموش عارف تحقق طموحاتك واحلامك ، خد بالك من نفسك شوية واقعد فكر بهدوء
لو لقيت نفسك فى حالة قلق مستمر وده بيعذبك طول الوقت ومتوقع دايما ان فى مصيبة جاية لك فى السكة موش عارف امتى ولا ازاى وكمان بدأت تشعر بالم فى معدتك او دايما عاوز تتبول ومصارينك موش ماشية عدل وعندك صداع على طول،،،، يبقى عندك قلق نفسى مرضى
لو لقيت نفسك بتسيطر عليك افكار غريبة بتخليك تعمل تصرفات او طقوس غصب عنك وانت موش راضى عن نفسك وانت بتعملها ، زى مثلا تقعد على الحوض تغسل ايديك ميت مرة وتحس برضه ان لسة موش نضاف او تقفل محبس الغاز وتخرج من المطبخ وترجع تانى كل شوية تتأكد انه مقفول ، او لوكنتى بنت وقلقانه على غشاء البكارة مثلا او انك ممكن تكونى حامل لانك سلمتى على راجل غريب من مده او حاسس انك كل شوية موش قادر تبعد عنيك عن اعضاء اصحابك التناسلية ، وانت او انتى عارف او عارفه ان دى افكار خاطئة وبتحاول تبطل التصرفات الغريبة دى وموش قادر ،،،، يبقى عندك مرض نفسى اسمه الوسواس القهرى
لو لقيت نفسك مرة سعيد وبتضحك ومزاجك عل العال من غير سبب ومرة واحدة تقلب معاك بغم جامد ، وشعورك بيتغير من الحماس للفتور بدون سبب وانك بدات تحب تهول وتبالغ فى الكلام وبتحكم على اللى بيحصل فى حياتك من وجهه نظرك والباقى يولع ، او كنتى شاعرة ببرود ناحية جوزك لكن بتحبى تتزوقى زيادة عن اللزوم وانتى معاه وان علاقاتك باسرتك واصحابك بقت سطحية وموش مهمة بالنسبة لك وانك بقيتى انانية جدا ،،،،،، يبقى انت عيان بالهستيريا
لو لقيت نفسك بتغرق شوية شوية فى حالة من اللامبالاه واليأس وبتتمنى الموت ومعندكش اى ميل للجنس وملكش نفس تاكل اى حاجة ولا رغبة انك تنزل الكلية عشان الامتحان او الشغل مع انك مهدد انك تترفد ، والمشاعر دى بتبقى صعبة جدا وغير محتملة لحظة ماتقوم من النوم الصبح وبتتحسن تحسن نسبى بسيط على اخر النهار وان الحكاية دى بتزيد يوم عن يوم وانت موش فاهم ايه اللى بيحصل لك ،،،، تبقى مريض بالاكتئاب
انا رأيى لو عندك اى حاجة من الكلام اللى فات تعرض نفسك ضرورى على دكتور نفسانى والعلاج مضمون




لكن لو لقيت نفسك سعيد على طول وموش دريان بأى حاجة وموش عارف الناس اللى حواليك فمتعملش اى حاجة انت كده قشطة وميت فل







هناك 28 تعليقًا:

Moustafa` يقول...

لن أفوت هذه الفصه فأنا أحب قلمك من بعد الحب الاول
ارحب بكونى اول تعليق وسوف اعود بعد برهه من ارتشاف كلماتك
سلام يا صديقى

ابن حـجـر الـعـسـقـلانـى يقول...

دة على كدة أنا المفروض أروح لدكتور نفسى قبل الأكل و بعده

على الرغم إنى مش متجوز .. بس حاسس إنك كنت مراقبنى و انت بتوصف الحالات دى

ربنا يعافينا و يرزقنا الصبر و يغفر لنا

S H A H يقول...

مدونتك رائعة , و ارائك جريئة

و تقريبا انا عندي شوية هستريا على شوية اكتئاب و حبة وسواس قهري

تقبل مروري الاول و مش الاخير

loumi يقول...

صباح الخير يا راجي

هو أنا كان عندي إكتئاب على خفيف
بس لما قريت كلماتك رااااااااااااح


:):):)


تدوينه جميله
تحياتي

عين فى الجنة يقول...

frake_ghost
اهلا بحضرتك فى اى وقت واشكرك على حضورك والمحبة متبادلة ان شاء الله

عين فى الجنة يقول...

عزيزى العسقلانى
تزوج بدون ابطاء ، واظفر بذات الدين تربت يداك
على فكرة كل الناس تقريبا عندها مشاكل نفسية الا المجانين فهم فى نعيم والا من رحم ربى

عين فى الجنة يقول...

شاه
تشرفت بزيارة جلالتك يا صاحب السمو ومدونتك جميلة وشبابية
لك التحية

عين فى الجنة يقول...

لمى العزيزة
طيب فين اجرة التشخيص والعلاج؟
ربنا يعافيكى

Empress appy يقول...

لاااااااا انا كده اكتشفت انى اروح العباسيه احسن واوفر لانى تقريبا عندى 50% من الحاجات دى بجد بس على مين ولا بيهمنى بجد هههههههه

عين فى الجنة يقول...

ابى
ازيك وحشانى والله
ولا يهمك الناس كلها مهيسة

paranoia,magnetic & dramatic girl يقول...

راجي ازيك
انا اول مرة اجي هنا
انت علقت عندي في المدونة رقم 2
لكن مدونتي الاساسية ده اسمها
http://didoredoado.blogspot.com
....
هههههههه
طيب انا عندي اعراض تانية انت مش ذاكرها هنا
بس اعتقد برضه النتيجة واحدة انا عارفة عندي اكتئاب وهيستريا وبارانويا
موضوع دمه خفيف ياراجي
شوكريا
الله حافظ
دودو

عين فى الجنة يقول...

دودو
اشكرك على التعليق والزيارة
ومدونتك جميلة جدا
وارجو تكرار الزيارة

دكتورة سنان يقول...

انا طلع عندى هيستيريا
بس انا كنت فاكره الاكتئاب حاجه تانيه غير كده
احم ..الموضوع فيه كلمات صادمه شويه

عين فى الجنة يقول...

نوسة
والله يا دكتورة لا حياء فى العلم وفى قول اخر العلم لا يكيل بالباذنجان بل بميزان الذهب
اشكر لكى المرور والتعليق

mado80 يقول...

هههههه بس كده يا دكتور يبقي معظم المصريين عاوزين يتعالجو عند دكتور نفسي

معلش الهموم اللي شايفينها المصريين تعمل أكتر من كده

تحياتي ليك وألف تقدير

همس الليل يقول...

فى اسكندريه فى مكان بديل للعباسيه اسمه المعموره
ودى مش المصيف بتاع الاخوه المبسوتين
دا مستشفى مجانين

والحمد لله انا عندى كوكتيل من كل دا

يعنى مجنونه
الا فى اوقات معينه من اليوم اللى بينادينى فيها ربى ساعتها بكون اعقل وانقى انسانه

باقى الاوقات فى البعد
تقريبا الحيوانات احسن
..
بس انت بئا عندك ايه من كل دا ههههههههههههه
خلى السحر ينقلب على الساحر شويه
يعنى شركتنا كلنا ومقلتلناش انت بتحس بايه
; )

Rain man يقول...

غريبة انا كنت فاكر ان كل الاعراض اللى قلتها عن الوسواس القهرى دى حاجات طبيعية بتحصل لاى حد
و انها طالما بتحصلى ابقى قشطة و ميت فل ..

انا عايز اروووح لدكتووور

يا لذيذ يا رايق انت
بس بلاش حكاية غشاء البكارة دي احسن اتكسفت و انا بقرأها مع اني ولد

عين فى الجنة يقول...

مادو
اهلا بيك منور ومشرفنى
عندك حق فعلا الامراض النفسية اصبحت ظاهرة ولكن لحسن الحظ ممكن علاجها بسهولة
المشكلة فى الامراض العقلية التى تصيب الكثيرين وعادة العائلات تخجل من الكلام عنها لو اصابت احد ابنائها
عموما اشكرك على مجاملتك وربنا يعافينا

عين فى الجنة يقول...

نورا
انا سعيد جدا بتعليقك بجد والله
وانا طبعا باشعر باعراض نفسية تتفاوت حسب الظروف اللى بامر بيها سواء على المستوى العائلى او المهنى واحمد الله انها اعراض مؤقته لا تستمر طويلا
ومثلك وهنا احب انوه على حسن تعبيرك ان الاوقات التى نتوجه فيها بالصلاه والدعاء لله هى التى تعمل بمثابة الميزان للروح والنفس
واحب مرة اخرى اعبر عن اعجابى الشديد بمدونتك التى تكشف عن حاسة فنية رائعة ومواجهة مع الواقع بدون لف ولا دوران
لكى التحية

عين فى الجنة يقول...

رجل المطر
فكرتنى بالفيلم تمثيل داستين هوفمان الذى مثل دور المصاب بمرض التوحد باقتدار وايضا بطولة تزم كروز
المهم ان اخر فقرة فى البوست يمكن محدش خد باله منها الا انت المقصود بيها من يشعر بالسعادة وانه طاير فى السما طول الوقت فهذا طبعا يبقى خلاص فقد عقله تماما ( عافاك الله ) وبقى قشطة وميت فل
يعنى بعض الكلمات قد تكون صادمة ولكن مع السياق العام ارجو ان تغفروها لى فمن الواضح انها موظفة بهدف علمى وليس خلاف ذلك ، وانت عندما تشعر بخجل من بعض الكلمات فهذا دليل على رقة احساسك ونبل مشاعرك
تحياتى لك

أبوشنب يقول...

أنا عارف ان عندي اكتئاب

مش جديد عليا يعني

يمكن بسبب الغربة

وان الايام كلها شبه بعض

بس برضه مش هروح لدكتور نفساوي

شوية اكتئاب ما يضروش برضه

خصوصا موضوع الجنس ده

أحسن الفلبينيات هنا مبهدلين الدنيا

Unknown يقول...

يا نهار مالوش ملامح دة انا على كدة مجنونة رسمى
كويسس انك نبهتنى بالاعراض دى كلها عشان الحق نفسى

عن ازنك بقة عشان اروح ادور لى على دكتور كويسس ويارب الاقى

على فكرة البوست جامد اوى

تحياتى الشديدة ليك

Hypatia يقول...

اوباااااااااااااا
انا عندى اكتئاب ده اكيد
بس اكتشفت ان عندى شويه هستريا على وسواس قهرى كمان

حاعيش يا دكتور
:)

بنت القمر يقول...

راجي
واللي عنده احساس دائم
بأن مفيش وقت ووراه مليون حاجه واول ما يفتح عينه يفتكر انه الدنيا مكربسه ولازم يجري وعشان المليون حاجه اللي وراه
وفي نفس الوقت
معنديش اي طاقه
ومليش مزاج
ومضايقه جدا اني مش قادرة الحق ولا اخلص اللي ورايا
وده نفسه بيخنق
يبقي ايه يا دكتور
في امل؟؟
؟؟
ممكن اعيش اد ايه؟؟

عين فى الجنة يقول...

باشمهندس ابو شنب
حالتك خطيرة جدا ومايسكتش عليها ، الاكتئاب مع الفلبينيات موش ماشية دى خالص
امال لو كنت شفت الدوحة من غير حريم اصلا على رأى المدون الظريف انا جعان بيقولك هو عايش فى المملكة العربية السعودية بنين
ربنا يحفظك وترجع بالسلامة

عين فى الجنة يقول...

نوراى
اهلا بيكى فى المدونة وبعدين تروحى بعيد ليه ما احنا موجودين برضه فى الخدمة المهم تدفعى الفيزيته
هتبقى قشطة وميت فل
:))))

عين فى الجنة يقول...

نسرين
ده انتى جن مصور وتجننى مديرية بحالها
ديتك مكالمة واحده من اسكندرية وتروح كل الاعراض
:))))

عين فى الجنة يقول...

بنت القمر
بما انك مسئولة عن ادم والبنوتات فدى حالة استثنائية ، لازم قبل التشخيص ارجع تانى للمراجع بتاعتى واعمل كونسرتيوم مع المتخصصين علشان التحديد الدقيق والعلمى للاعراض مع الاخذ فى الاعتبار تحليل كل البوستات الموجودة فى مدونتك وعرضها على المقاييس المعترف بها دوليا فى علم النفس من اول فرويد لغاية الدكتور احمد عكاشة
دى حكاية بتاعة اربع سنين او خمسة فانتى ممكن تعيشى بالاعراض دى لغاية ما نتوصل للتشخيص
ولكن لو مستعجلة ، فمن الواضح ان عندك قلق صحى وليس مرضى يشوبه اكتئاب خفيف زى بتاع ابوشنب كده يعنى مايضرش
ربنا يعافيكى ويسلمك