الاثنين، ديسمبر 10، 2007

فلوسى والبورصة وخروف العيد



اكتب اليوم عن البورصة وتجربتى الشخصية فى التعامل مع الاسهم ومتابعة مؤشر السوق يوميا ومحاولة فهم ما يحدث من ارتفاع وانخفاض فى اسعار الاسهم للشركات المقيدة فى البورصة المصرية

فمنذ عامين بالتمام والكمال بدأت الصحف تنشر اخبار عن اقتراب طرح اسهم الشركة المصرية للاتصالات وبدأ الناس يتحدثون حول هذا الحدث الجلل فى كل الاوساط تقريبا مع سائق التاكسى وبين ركاب المترو و على المقاهى وبطريقة مدهشة للغاية تم شحن الناس واصبحوا كلهم فى انتظار الموعد المنتظر لطرح الاسهم وانتابتنى حالة من التوتر انا ايضا وبدأت فى البحث عن اصدقائى واقاربى الذين لديهم خبرة فى البورصة واكتشفت اننى موش عايش فى البلد وانه لشراء الاسهم يجب ان تكوّد نفسك اى يصبح لك كود مسجل باسمك فى البورصة واكثر من ذلك انك لا تستطيع الذهاب الى مقر البورصة لشراء الاسهم مباشرة بل يجب عليك اختيار وسيط او شركة سمسرة مقيدة فى البورصة لتشترى الاسهم باسمك المكوّد ، وبالبحث والتحرى عن تلك الشركات اتضح انها بالعشرات ولكن ياحلو الحكاية موش سبهللة فلو كنت مبتدىء مثلى وفلوسك موش قد كده فسوف تتعامل مع السماسرة الصغار الذين ينتظرونك ومن النظرة الاولى يعرفون انك لسة جديد فى اللعبة ويبهدلوك، ويبدأ السباق وتترك كل شيء خلفك بيتك وعيالك وشغلك، وتحدد البنوك التى تقبل النقود وترى الناس فى طريقهم الى البنك وقد حملوا نقودهم داخل حقائب او شنط بلاستيك واحيانا وبدون مبالغة داخل كراتين الشيبسى الفارغة

ومع الطلب الشديد على السهم الجديد لا تستطيع شراء الكمية المطلوبة كلها فيتم تحديد 10 فى المائة فقط من كمية الاسهم التى طلبتها، وتجد نفسك منخرطا فى الزحام والمشاوير من البنك للسمسار والعكس طبعا مهرولا ومعتقدا انك لازم ولابد تسبق الناس كلهم حتى تحصل على اكبر كمية من الاسهم التى ينتظر ان يرتفع سعرها ارتفاعا شديد وطبعا كل ذلك من باب العبط والسذاجة فالعملية محسومة مسبقا بين الخبراء وحيتان البورصة الذين يمتهنون المضاربة ويراقبون الاسعار داخل شركات السمسرة على شاشات الكومبيوتر طوال اليوم وكل يوم ويحققون الارباح التى لا يدفعون عليها ضرائب ولا تفيد الاقتصاد بشىء يذكر،ونصيحتى لكم ان لاتستثمروا اموالكم فى الطابونة المصرية الشهيرة بالبورصة الا لوكان عندكم خلفية قوية عن ما يحدث داخلها وان لاتستثمروا كل نقودكم فى سهم واحد بل التعدد والاحتفاظ بما اصطلح على تسميته بالمحفظة المالية فهو اقرب للاحتياط ، والاهم من هذا وذاك الوقت ، ان يكون عندكم الوقت الكافى للمتابعة امام الشاشة والتفرغ تماما للبورصة هو الوضع المثالى للمتابعة

اول جلسة للتداول ارتفع سعر السهم الى ضعف سعر الاصدار فباع الخبراء اسهمهم ونزل السعر واستمر فى النزول الى اقل من سعر الاصدار وهذا ما استبعده كل الناس ولكن السعر استمر فى الانخفاض وحبست نقودى القليلة التى دفعنى الطمع والسذاجة الى المضاربة بها فى تلك الطابونة الشهيرة بالبورصة

وبعد عامين كاملين ارتفع السعر وقارب السعر الذى اشتريت به فجريت الى السمسار وحجزت الاسهم للبيع ووصل السعر فى جلسة التداول بعد كام يوم اذهب يوميا الى شركة السمسرة ،الى السعر الذى حددته وفى اخر الجلسة ذهبت لتحصيل النقود فوجدت الموظف الذى يجلس خلف الشاشة يهز رأسة بأسف بأن البيع لم ينفذ

ليه يا مولانا ؟

لان طلبات البيع الكثيرة خفضت سعر السهم فلم ينفذ البيع بالسعر الذى حددته تعالى بكره


تااااااااااااااااااااااااااااااااااانى من الاول؟ الظاهر مافيش خروف على العيد السنة دى

هناك 11 تعليقًا:

نوسه يقول...

هههههههههههه
معلش ياراجى
يعنى كنت منتظر ايه من بورصه فى مصر يعنى
بس انا على فكره عمرى مافهمت البورصه دى بتشتغل فى ايه وازاى وايه كلمة سهم دى اساسا ومليش فى موضوع الفلوس ده خالص
يعنى عشان اقربهالك مثلا لما كان يبقى معايا 50 جنيه احس ان معايا ثروه بقى وكل اللى يكلمنى اقوله اوعى ده انا معايا 50 جنيه وغنيه
محسيتش انهم ملاليم غير لما نزلت اتفرج على حاجات المطبخ.. الصينى والكاسات والذى منه
يلا ربنا يعوض عليك ومتزعلش نفسك

Ragi يقول...

نوسة
انا بس زعلان على الخروف
كل سنة وانتى طيبة

مروة الزارع يقول...

عارف يا راجى انا اوافق نوسة فى كل كلمة قالتها
انا بقى فعلا عمرى ما فكرت فى اى حاجة من الكلام دة
وموعدكش انى ناوية افكر
طنش تعش تنتعش
ربنا يعوض عليك ببقرة عيد

وكل عيد وأنت طيب

من فضلك يا راجى شيل ال
Word Verification

باى يا قمر

أبوشنب يقول...

لا دا انت واضح انك خام خالص في البورصة

انت ممكن بمنتهى البساطة يا سيد راجي

تروح البورصة

تقولهم انا عايز خروف العيد

وهمة هيسعرو الخروف بكام سهم

وهيبعتو لك الخروف لغاية الباءءءءء

اقصد لغاية البييييت

Ragi يقول...

مروة العزيزة
شكرا على التعليق، وياريت اقدر اشترى بقرة بدل الخروف ونعزم كل المدونيين حبايبنا على كباب وكفنه
كل عام وانتى طيبة

Ragi يقول...

ابوشنب
اهلا وسهلا بيك اول مرة تشرفنى
وعلى فكرة فى البورصة هما بيذبحوا الخرفان اقصد المساهمين السذج اللى زيى كده
كل عام وانت طيب

loumi يقول...

عزيزي راجي

كل خروف وإنت طيب
:):):)
يييييييييه
قصدي
كل سنه وأنت طيب

بورصة مين يا راجي
أنا كنت عرفت موضوع التكويد ده من مده
بس بصراحه لا أحب فكرة المغامرة بالمال
قد أغامر بأشياء كثيره
إلا دي
لان الموضوع بيدخل فيه زي ما إنت قلت طمع وبدام ما بافهمش في حاجه
يبقا ما اغامرش

تحياتي
مش لازم العزومه تبقا كباب وكفته
بصلة المحب خروف
:)
:)
:)

Ragi يقول...

ماشى يالمى خلاص حرمت واخر مرة فعلا بس اعرف ابيع بدون خسارة، والبصل الخزين كتير عند عباس العبد فاضل بس المحبة
كل سنة وانتى طيبة

MAKSOFA يقول...

أنا با أحاول افهم الموضوع ده وبرضه موش عارفه فقلت لبنتي اللي بتدرس محاسبه تاخد كورس في البورصه وأسواق المال

Ragi يقول...

اهلا اهلا مكسوفة
والله البعد عن البورصة افضل ، جربى صناديق الاستثمار فى البنوك اضمن
وكل سنة وانتى طيبة

do3aa يقول...

كل سنه وانت طيب راجى مع انها متاخره اوى
معلش يا راجى الطمع وحش و السذاجه بتعدى علينا كتير وخصوصا تعالى بكره
ههههههه
سلامى ليك