الاثنين، ديسمبر 15، 2008

بين هزيمة الاهلى وجزمة بوش

صباح السبت الماضى  خيم على الناس حزن وانكسار بسبب هزيمة الاهلى فى اليابان بعد الشحن الاعلامى المعتاد للناس بمناسبة مباريات الكرة وخصوصا عندما يكون النادى الاهلى طرف فيها ، ويزرع خبراء الاعلان والتسويق سلوك القطيع فى مشجعى الكرة لترويج المنتوجات والخدمات البائرة فيصنعون وهم يعيش فيه هؤلاء بأن فريق الاهلى نادى القرن وبطل الابطال وقاهر البطولات قادر على منافسة الفرق العالمية بل و هزيمة مانشستريونيتد ذات نفسه 
فلما حلت الهزيمة بالاهلى كان رد الفعل عند الناس ذلك الحزن غير المنطقى وغير المبرر ، فكل الناس يعرفون ان مباريات الكرة تحتمل النصر كما تحتمل الهزيمة ولكنهم تحت الضغط الاعلامى وخبث خبراء التسويق تناسوا هذه الحقيقة واستبعدوا احتمال الهزيمة فكانت الدهشة كبيرة عندما حلت بفريقهم المفضل
الناس هذا الصباح فى حالة نشوة وسعادة كبيرة ويهنئون انفسهم بسبب قذف الصحفى العراقى منتظر الزيدى حذائه على الرئيس الامريكى  دبليو بوش وهى سعادة لا اجد لها  مبرر كذلك 
فمثل هذا التصرف الطائش من الصحفى المتهور يحسب بالخصم من الرصيد العراقى والعربى واعطى الفرصة لرئيس يعتبره العالم كله بما فيه الشعب الامريكى مجرم حرب واسوأ رئيس فى تاريخ امريكا ، هذا التصرف اعطى لبوش الفرصة ان يدعى انه لولا الحرية التى منحها الغزو الامريكى للشعب العراقى لما اقدم الزيدى على قذفه بالحذاء كما انه وضع الصحافيين العرب فى خانة الهمج والغوغائيين الذين يعجزون عن الجهاد بالقلم وليس بالاحذية ، كما انه عبر عن العجز العربى وحالة الافلاس الجضارى التى نعيشها فى هذه الحقبة المظلمة
فلا مبرر للحزن يوم هزيمة الاهلى ولا مبرر للفرحة يوم ضرب بوش بالحذاء 

هناك 29 تعليقًا:

~*§¦§ Appy §¦§*~ يقول...

لااااا بص بقى انا ولا مع ولا ضد الاهلى ولا يعنينى
انما ضرب بوش مش معناه انه مدى حريه حريه لمين هو انت مش عارف ان الولد اتقبض عليه وربنا يستر وبعدين معلش يا راجى ده اقل واجب يعنى ولو على الحريه بقى يعنى رمى القنابل كل يوم والقتل هى دى الحريه
على فكره هو اتصدم وكان تعليقه انه واحد غاوي شهره طبعا ده مش صح خالص

~*§¦§ Appy §¦§*~ يقول...

وقال بوش بعد أن أفلت من الحذاء إن "قياس الحذاء الذى تعرضت له (10) وهذا لا يؤثر على شخصيا، ومن قام بهذا العمل يريد أن يجذب الانتباه اليه"، واردف قائلا "يحدث هذا فى الاجتماعات العامة".

على عبدالله يقول...

استاذ راجى
معلش انا بختلف معاك فى النقطتين دول بالتحديد
بالنسبة للاهلى طبعا الدنيا ماوقفتش علشان هزيمة الاهلى : ولكن الاهلى بصراحة خيب امال الجماهير ،وكان الاولى انهم يعملوا استعدادات اكبر من كده
فى النهاية مش مشكلة احنا مش واخدين حاجة كجماهير غير حرقة الدم !!!

أما بالنسبة لبوش فيستاهل ضرب الجزمة واكتر كمان وياريتها كانت جات فى وشه هو وحارس المرمى اللى جمبوا
صدقنى والله العظيم دى اهانة لبوش وامريكا كلهاوهاتتسجل فى التاريخ
باختصار يا استاذ راجى من وجهة نظرى ان ضربة الجزمة دى بتعبر عن اللى عاوز يعملوا الشعب العربى كله ،بصرف النظر عن الحرية المزعومة اللى بصراحة تغور فى ستين داهية (انا اسف )
والصحفى ده راجل وبطل ويستحق التقدير والمفروض ان كل الصحفيين والمحاميين يوقفوا جمبوا ويساندوه

انا اللى مزعلنى الجزمة (لان بصراحة دى اهانة للجزمة اكتر منها لبوش )

تحياتى

Sherif يقول...

ليس خصما من الصحافة العربية ولا أى شئ .. فساركوزى نفسه فيه واحد من المعارضين لبسه تورتة كاملةفى وشه .. والبرلمان اليابانى المحترم كان اعضاؤه يضربون بعض بالشلاليت .. والقصص كثيرة وتحدث فى اكثر الاماكن احتراما

الا ان الحادث الاخير .. له مذاق خاص

موناليزا يقول...

عايزين يطلعوا همهم فى اى حاجة بدل مايجيلهم كبت

سلوى يقول...

ده أقل ما يجب

وبعدين لو في حريه

كانوا عملوا اللي عملوه في الصحفي

ده حدث للتاريخ وسيبقى دوما
:)

إزي حضرتك يارب تكون بخير أنت وكل الأسرة

راجى يقول...

ابى
ازيك الاول وكل عام وانتى طيبة بمناسبة عيد ميلادك
على فكرة انا كنت ب اقارن بين حزن المصريين لهزيمة الاهلى وشايف انه حزن غير مبرر
وبين فرحتهم لضرب بوش بالجزمة وايضا هذه فرحة غير مبررة
الحالتين بيوضحوا حجم الخيبة اللى احنا عايشينها

راجى يقول...

على عبد الله
صديقى العزيز
اولا انا با ارحب بالاختلاف ولكن كما قلت لابى انا كنت اقارن بين حزن المصريين وفرحتهم فى مناسبتين فرق بينهم يومين
الحزن فى الحالة الاولى لانهم تعاملوا مع نتيجة مبارة كرة بحزن ربما فاق حزنهم على الضحايا الذين يتساقطون يوميا فى حوادث الطرق او حادث الدويقة او غيرة من المصائب التى تمر بنا
اما الفرحة الطاغية لما تعرض له بوش من القاء الحذاء من قبل الصحفى العراقى فهى تدل على عدم اخذ عواقب هذه الفعلة على الصحفى نفسه اولا ولا على العرب والمسلمين
وهذا تماما مثل حالة اطلاق الصواريخ من غزة لتسقط على لا شيء ثم رد الفعل الاسرائيلى الوحشى على ذلك من قتل الاطفال والنساء وتجريف الارض فهل اثر الصاروخ البدائى والفرحة التى تعتمل فى صدور من اطلقوه تساوى حجم الدمار الذى لحق بهم
طبعا انا لست ضد المقاومة المسلحة ضد الاحتلال التى تبلى بلاء حسنا فى العراق و افغانستان فهى مجهود مبذول فى محله واثرها قوى فى احراج الاحتلال
سمعت امس مقارنة بين التقاط صورة الدره الصبى الفلسطينى الذى قتل برصاص الاسرائيلين ، هذه الصورة خالدة وهى ادانة دامغة لاسرائيل وهى بكاميرا صحفى مثل رامى الحذاء ولكنها من الناحية المهنية افضل من مجرد رمى العدو بحذاء لم يصبه بدون حساب الخسائر التى قد تلى ذلك
فكل ما هنالك انه فى رأيى المتواضع ان الحزن الاول غير مبرر وان الفرحة الثانية غير مبررة

راجى يقول...

شريف باشا
ازيك واحشنى جدا
صح رمى الحذاء له مذاق خاص واسعد الناس ولكن من فضلك اقرا تعليقى السابق على الصديق على عبد الله
دمت بصحة وعافية

راجى يقول...

موناليزا
ايوه الناس عندها كبت لكن تفريغ الهم له مجالات هم اكسل من الخوض فيها
اشكرك

راجى يقول...

سلوى
ايه ده فينك من زمان وحشتنى تعليقاتك ووجودك جدا جدا والله ، انشاء الله تكونى بخير وسلام
ايضا بطلب منك قراءة تعليقى على الصديق على عبد الله
واشكرك ومتغبيش علينا كده

انا من اهوى ومن اهوى انا يقول...

راجى :

انا الحقيقة ماليش فى الكورة وماتعنينيش اوى ، لكن موقف منتظر مش هاقول انه مشرف ولكنه بجد بالعامية كدة ( فش غليل الأمه )

عارف لما تحصل خناقة بين اتنين المفترض انهم مثقفين وواحد فيهم مايعرفش ياخد حقة يعمل إية يلجأ لأسلوب الشوارع فى الكلام وهو التلفظ بأحقر الكلمات

أمريكا عملت كدة مع الشعوب العربية وكلنا ينعترف ان حجتنا خايبة لأننا مش عارفية ناخد حقنا حتى إعلاميا فاتجهنا فعلا اننا ( نردح ) زى ستات الحوارى

وجة بوش وقال بص شوف ناس زباله مش قلتلكوا دا نصيبى من الحرية اللى اديتهالكوا

مش مشكلة ولكن بجد ارتحنا لما شفنا ولو لحظة خوف فى وجهك

تحياتى

على عبدالله يقول...

استاذ راجى
انت سمعت خالد الغندور لما قال احنا بنطالب سيادة رأيس الجمهورية بالتدخل لحل ازمة نادى الزمالك ؟؟!!
اكيد ماسمعتش واحسن انك ماسمعتش ؟! لانى لما سمعته كنت عاوز اكسر اى حاجة جمبى
ماهو احنا مش فاضيين غير لمشاكل الكورة ومشاكل اللعيبة اللى بتاخد ملايين وناسيين الملايين اللى مش لاقية عيش حاف !!!
ما اريد ان اقوله انى اتفق معك بالنسبة لنادى الاهلى وزى ماقولتلك احنا مش عايد علينا ضرر او منفعة

فى وجهة نظر بتقول ان كل ما اصاب العرب من امريكا واسرائيل هم السبب فيه (العرب يعنى ) !! انا متفق تماما مع ان العرب هم المتسبب الاول فى الكوارس دى ولكن مش بسبب المقاومة واحداث 11 سبتمبر ولا صواريخ حماس ولا الارهاب الاسلامى ولا جزمة منتظر الزيدى !! لا والله السبب الرأيسى هو ضعف و خوف العرب
وانت ادرى منى طبعا بما حدث مع روسيا فى الاحداث الاخيرة ونروح ليه بعيد ما عندك ايران هو حد قادر يمسلها طرف

سؤال اخير
احنا ليه كل مانعمل حاجة نعبر بيها عن غضبنا ولا حتى رفضنا لما يحدث ،بنقول عليها تصرفات غير مسئولة ويـتادى لاضرار اكتر منها منافع ؟! فى الوقت اللى فيه الامريكان واليهود شغالين (حرت ) فى ارواح العرب والمسلمين بدون مبرر ؟؟؟
اخيرا احلفلك بالله العلى العظيم اننا لو بطلنا مقاومة وقعدنا فى بيوتنا ،وكممنا افواهنا امريكا ولا اسرائيل مش هيبطلوا اللى هم فيه

اطلت الكلام فسامحنى
ولكنى علمت انك صاحب صدر رحب فحبيت ابعبع

مع خالص تقديرى واحترامى لشخصك الكريم

راجى يقول...

انا من اهوى
على عبد الله

لو قدرتوا تقروا مقال ابراهيم عيسى فى الدستور النهاردة يبقى هو ده رد مناسب
طبعا انا باشكركم جدا على التعليق

StEElBeaUtY يقول...

لا طبعا اهلى ايه انا اعتقد حب الناس وتشجعهم لفريق الاهلى نوع من التعويض فهم يشعرون انهم مش فلحين فى حاجة فلقللهم فريق كورة بيفوز فده بقا اللى بيحسسهم بالانتصار

لكن عايزة اقول ان اللى عمله منتصر سيغنى العرب والمسلمين عن اى حب فى الدنيا فهذه النصره الحقيقة تكفى اهانة زعيم اعداناوان يعرف العالم كله كرهنا له ورفضنا سياسته

قوس قزح يقول...

انا زعلت بس على المصاريف اللى البلد و النوادى بيصرفوها على رحلات لفريق بدون ما يكونوا مستعدين للرجوع بالمكسب
و تصدق انا مفرحتيش ان بوش انضرب بالجزمة لان ده مالوش اى تأثير على الاحداث الموجودة و مجرد موقف و انتهى


موقف الجزمة ده فكرنى بنكتة
النمل اتلم على راس الفيل علشان يموته لان اكتر من مرة يهدد حياتهم و يموت منهم كتير .. الفيل حرك بس ودنه اليمين وقع نص النمل .. حرك ودنه الشمال وقع النص التانى و فضل نملة واحدة ..الكل من تحت يصرخ لها .. اضربه يا مرسى اديله يا مرسى موته يا مرسى


الناس ما بتصدق تحس بأى مشاعر جماعية ..حتى لو كانت تحرش

حمادة زيدان يقول...

عمنا راجي

أول نقطة لأني مش اهلاوي خالص فمش هتكلم فيها خالص
تاني نقطة بتاعت الجزمة فعندي فيها كلام ,,,

الرئيس الأمريكي في أخر حكمه وبكل برود أعصاب اعترف للأمريكان أنه غلط في حرب العراق وانه مفيش اسلحة ولا حاجة .. وجاي العراق في اخر أيامه يطلع لسانه للشعب العراقي كله ... أنا شايف انه منتظر علم بوش درس كبير وفضح كل اكاذيب امريكا أنه الشعب العراقي مبسوط بالغزو الامريكي لهم ... لدي أصدقاء من العراق أعتبروا ما فعله منتظر رد للحكومة الامركية اللي طول الوقت بتغني بحرية الاوطان

جزمة منتظر ليست مفخرة للعرب ولكنها أكبر رد على بوش ليتوج به في أخر أيام حكمه

عمنا راجي
مخاصمني ولا ايه!!!!!

ناصر يقول...

الغالي راجي
اتفق معك ان الرياضة ربح وخسارة، والموقف لا يحتمل اكثر من : هاردلك والسلام.
واختلف معك جدا جدا جدا جدا والى قطع النفس حول موضوع رشق الدجال الامريكي بالحذاء.
واردك الى ماقاله كاتب وصحفي امريكي حول هذا الموضوع:
http://conspiracytheoryandyou.blogspot.com/2008/12/blog-post_7142.html

ذو النون المصري يقول...

مبالغه غريبه فعلا في حادث الحزاء
عدد منالمظاهرات قامت تطالب بالفراج عن بطل الحزاء
و البعض وصفه بالمنتظر
و البعض وصفه بانه اعاد للعرب كرامتهم و انتقم للارامل و الايتام العرب
رغم ان عددهم مئات الالوف
فعلا امر العرب غريب
و الظاهر انهم مش هيعقلوا في الفتره القادمه و لزمن طويل

حسن ارابيسك يقول...

صديقي العزيز راجي
كما توقعت دلفت لمدونتك ووجدت ما توقعته لكن فوجئت بسطرك الأخير يحمل عنوان خاص وهو باختصار لا مبرر ولا مبرر
الحقيقة استغرب عدم التبرير
وكل حدث له ما يبرره بدون شك
حتى كتابتك لهذا البوست له مايبرره يرتبط بحلقة سابقه لمبرر أخر وهكذا سلسال من المبررات في حية كل منا مبررات خاصة ومبررات عامة
أسعدني كالعادة فكرتك الخاصة بك دون الأخرين وحرية التحاور معك هنا
تحياتي
حسن أرابيسك

راجى يقول...

StEElBeaUtY
هل ما فعلة الزيدى يستحق كل هذه الفرحة والسعادة ؟
هذا هو السؤال ! لست اناقش الفعلة فى حد ذاتها بل رد الفعل للجماهير التى لا حول لها ولا قوة
كذلك فانى اتعجب من استبدال الصحفى لقلمة بحذائه
اشكرك

راجى يقول...

قوس قزح
يعنى معظم الناس وليس كلهم يحكمهم سلوك القطيع، صح اتفق معاكى

راجى يقول...

حمادة سكر زيادة
اخاصمك ؟ لا
مع تحياتى

راجى يقول...

ناصر بك
اهلا يا صديقى دعنا نختلف وما الضير فى ذلك
لم استطيع الوصول الى المقال فلم يفتح الرابط
اشكرك على كل حال

راجى يقول...

ذو النون المصرى

سعيد باننا متفقين فى هذا الموضوع
اشكرك

راجى يقول...

الفنان حسن ارابيسك

ليس له ما يبرره من وجهة نظرى الشخصية
واهلا بك منور المدونة

ناصر يقول...

الغالي راجي

اسف لانى تأخرت في احضار الموضوع، وهذا هو النص :
وصف الصحفي والكاتب الاميركي ديف ليندوروف الصحفي العراقي منتظر الزيدي بأنه بطل في العصر الراهن وقال أخيراً أصبح لمهنة الصحافة امثولة يمكن التطلع إليها باحترام. وقال الكاتب الامريكي في مقال نشره في موقع كاونتر بونش تعليقا على قذف الصحفي العراقي الرئيس الأمريكي جورج بوش بفردتي حذائه إن الزيدي فعل ما كان يجب على فيلق الصحفيين الذين يغطون المؤتمرات في البيت الأبيض أن يفعلوه منذ سنوات. وقال الكاتب إنه طالما شعر بالرغبة برمي جهاز التلفزة بحذائه عند الاستماع إلى بوش وهو يكذب في المؤتمرات الصحفية طوال ثماني سنوات, كاشفا أن الصحفيين الذين يحضرون المؤتمرات الصحفية للرئيس في الولايات المتحدة يتم اختيارهم بعناية ويتم تقديم والتدقيق باسئلتهم مسبقاُ. وأضاف الكاتب الامريكي إن الزيدي الذي دفع ثمن احتجاجه الشجاع بالضرب المبرح الذي تلقاه من عناصر الأمن هو بطل لهذه المهنة, فقد توقف عن التعامل مع الهراء الذي يطلقه الرئيس الامريكي ووصفه بما هوعليه فعلا "قاتل ومجرم , يداه مخضبتان بدماء العراقيين. وأضاف الكاتب ان الزيدي حول المؤتمر الصحفي الذي كان يفترض بأن يكون فرصة مصطنعة لالتقاط صور جيدة للرئيس , إلى فرصة للحديث باسم كل أولئك الذين دمر هذا الرئيس حياتهم. ااقترح الكاتب الامريكي قيام الصحفيين بتطوير نوع من علاقة جديدة مع إدارة الرئيس بوش في الأسابيع الخمسة المتبقية لها , علاقة يتخلون فيها عن التقاليد واللياقات الزائفة ويبدؤون العمل بجدية نشطة ويوجهون اسئلة قاسية , وحتى أن يضحكوا بسخرية لاذعة عندما يتلقون اجوبة تافهة, وأن يلحوا للحصول على اجوبة دقيقة عندما يتلقون اجوبة متملصة, أو أن يغادروا المؤتمر إذا اقتضت الضرورة.
____________________ انتهى

ودمت لمحبيك

قليل من التفكير يقول...

قد أتفق معك اذا نظرنا للموضوع من ناحية احترافية الصحفي ولكن لا تنسي استاذ راجي انه انسان عنده شعور .. انسان متئلم لموت أكثر من مليون انسان من اهله وتدمير بلده وحضارته .

farida يقول...

وجهة نظر مختلفه عن وجهة نظري في موضوع الحذاء لكن عرضتها بهدوء و ترتيب جعلني أرى الأمور من منظورك
تحياتي