الأربعاء، مارس 26، 2008

فيمينست




منذ وطئت اقدام البشر سطح كوكب الارض ، عاش الذكور والاناث من بنى ادم مشغولين فى تحدى ظروف الحياة القاسية فى محاولات تنجح حينا وتفشل كثيرا فى التعامل معها والسيطرة عليها ، ومرت الايام والسنين وتراكمت خبرة الزوجان وتعارفا على تقسيم العمل بينهما ممهدين الطريق الى صناعة الحضارة
وعند نقطة ما فى القرن التاسع عشر حدثت طفرة مهمة فى الجنس البشرى فبعد ان استقرت الكروموسومات على تقسيم البشر الى ذكور x,y واناث x,x ظهر كائن جديد ذو اصل نارى بركانى متوهج او جذر نيزكى اشعاعى وقد تميز بكروموسومات جديدة نشيطة ولنطلق عليها الرمز f
هذا الكائن الرائع يتميز بانه قد نزع عنه العاطفة ، دائم الغضب على الجميع وانه رافض لكل شيء وهو يريد ان يكون رجلا وامرأة فى ان واحد لانه لا يستطيع الاكتفاء بدور محدود فى الحياة بل يريد الحرية المطلقة والمتعة التى لا سقف لها
هذا الكائن العجيب يمتلك مهارات مدهشة فى الاقناع بما لا يقنع والاقتناع بأنه محور الكون وتجده فى قاعات المؤتمرات فى الفنادق السبع نجوم كما تراه على مقاهى الارصفة يدخن الشيشة او على شاشات الفضائيات يرطن بكل اللغات وخلف فتارين المعروضات داخل المولات
ودائما يخفى هذا الكائن عينيه حتى فى الليل خلف النظارات الشمسية الكبيرة ويحشر ساقيه ومؤخرته فى الجينزات السينيه الضيقة بينما يديه مشغولة بالموبايلات وريموتات السيارات الرياضية السريعة
وهو من الذكاء بحيث اختار ان يتشكل جسده على هيئة الانثى التقليدية ليتمتع بميزة الضعف التى ترقق نحوه القلوب دون التدنى الى تدنيس هذا الجسد فى حمل او ولادة او ارضاع
وهو من الفطنه بحيث يتسلح بالعلم والثقافة وعينه على اعلى الخانات فى الهياكل التنظيمية المحجوزة دائما لجنس الذكور
وعادة يسمى هذا الكائن بالفمينيست وذلك فى اوروبا والدول المتقدمة ويطلق عليه فى مصر لفظ المرأة
تميزا له عن الموزة وهى الانثى التقليدية التى تسير الهوينى فى دلال وقد لفت ساعدها الحانية حول خصر ذكرها الذى اراح يده المتعبة على كتفها الريانه ويتعلق فى ثوبها اطفالهما الطبيعيين ذوى الكروموسومات فئة ال XX,XY



هناك 61 تعليقًا:

Hook يقول...

و الله معاك حق

Cleo يقول...

أتفق معك تماما... فهذا الكائن "شبيه المرأة" قد انتشر بشكل رهيب حتى ان الأنثى الطبيعية أوشكت على الانقراض تماما مثل شقراوات أوروبا :-)

لكن ليس فقط الأنثى هى التى ستندثر وإنما جنس البشر كافة، حيث ظهر هناك عنصر رابع ولنطلق عليه الرمز m والذى اتخذ صورة الرجال قالبا لكى يعيش فيهفهو ضعيف وكأنه رجل صناعة تياوانى أو صنع فى مصانع تح تلاسلم فى الصين.. فالمظهر خشن والحجم أكبر من حجم العنصر f والصوت عال.. لكنه مثل الزئبق لا تستطيع أن تمسك به؟؟ فلا كلمة تحترم ولا عهد يصان.. فضلا عن قدرته الفائقة فى التغلب على عنصرى الشهامة والنخوةالتى كانت من أهم عناصر الضعف لدى الرجل الطبيعى XX :-)

ممكن يكون مخطط صهيونى.. (وش واحد مصاب بعقدة المؤامرة)

(((أى.. أى... كله ضرب !!! مفيش شتيمة؟؟)))

بنت القمر يقول...

هههههههههههه
هههههههههههه
بضحك علي تعليق كليو
علي فكرة انا عارفه المناظر دي ولعلمك هي هياكل ورقيه
كذبه
واسأل الست علي الست
الست الفيمينيست بالتوصيف اللي ذكرته ما تستحملش ساعه تكون ام
متستحملش لحظه حمل.. ولا متاعب وحم..
متستحملش تقوم لطفل ست مرات بالليل ترضعه!!لحد جهازها العصبي ما يوشك علي الانهيار!!
معندهاش القدرة علي العطاء ثانيه تصبر تحفظ جدول الضرب لبنتهالساعات وساعات!!
وغالبا فشلت في الحصول علي ما سبق فاختارت الطريق الاسهل
والله يا راجي ده اسهل
اسهل ميت مرة انها ترطن بكذا لغه وتنط في جينز سينيه وسيارة سبور
لكن متاعب الامومه وهموم اقامه زواج ناجح اصعب بكتير
هي مش دي قوة؟؟!!
رد يا راجيّ!!
يعني اسم الله عليها يحميها ويبارك لك فيها ام البنين اللي جابت في عين العدو5 وصل الكبير زي ما قلت انه مهندس
دي مش ست اللي تؤدي الوظيفه والمهمه دي مش ست _دي المرأه الحديديه
ونجحت!!
سمعت عن تصنيف جديد اسمه الموزة المؤدبه اطلقته نوارة ولما سألها احد المعلقين يعني ايه قالتله انظر مني زكي
انت عارف بعد ما قريت فكرت في ايه؟؟
هو انا تحت انهي تصنيف؟؟
اعتقد اني مش فيمينيست طبعا
ولا موزّه برضه
لعتقد يمكن كائن خليط من عده عناصر
راجل في تحمل المسئوليه وانثي في الرغي وقوة الملاحظه طفله في البراءه والغضب والتحدي عجوز في الصبر الجلد والحكمه
الله ده انا بشكر في روحي
ولا يشكر في روحه الا ابليس
تفتكر بجد
ممكن يكون في انواع تانيه من النساء
عموما عموما بما ان المدونه مدونتي هاخد لينك
منها عندي بعد اذنك تحياتي

عين فى الجنة يقول...

hook
يابنى ربنا يستر علينا منهم ، لكن انا قلبى اتقوى بتعليق كليو وبنت القمر فليسقط الفيمينست
تحياتى لك ول اسيوط المحافظة الجميلة

عين فى الجنة يقول...

كليو
حلوة فكرة العنصر m الاثنين fm على موجة غير الموجة بتاعت الناس الشقيانيين
والحقيقة انا منتظر الضرب انا كمان بس اناورايا رجالة
تحياتى لكى ايتها الصديقة العزيزة

عين فى الجنة يقول...

قمر
ايوة طبعا انا مراتى بميت راجل وبنتى كمان جدعة زى اخواتها
اما عن تصنيفك فانتى مصنفة فى خانة بنت حلال مصفية
وطبعا المدونة باللى فيها بيتك ومطرحك
ولكى التحية والسلام

قليل من التفكير يقول...

.
يوجد بيننا كثيرون ممن يغنون أغاني حرية المرأة والمساواة ... يروجون لهذا الجنس الدخيل ويبشزن بقدومه .
.

mado80 يقول...

أستاذ راجي

ازيك يا أستاذ

مقصر في حقك كتير معلش أسف والله

والله يا أستاذ راجي أنا شايف المشكله في الكروموسومات هههههههههه

هي بصراحه بقت حاجه تلخبط فعلا

بس مش تفتكر يا استاذ راجي أن المرأه ككائن حي لها مطلق الحريه في أنت تفعل ما تشاء؟ مجرد سؤال

تحياتي ليك يا أستاذ راجي والف تقدير لشخصك الكريم

موناليزا يقول...

الست ست والراجل راجل
مهما عملوا فى الاخر ده له طبيعة وهى ليها طبيعة

someone in life يقول...

هاى راجي
موضوع جامد بس بلاش كلمه موزه دي لانها بقت افة العصر زي الفمينست بالظبط و بعدين نظرة الراجل للست انها موزة هي اللي عملت الفمنيست و جرت ورا الفكرة نساء كثيرات مقهورات من سوء استغلال الرجل لهم و كانهم اماء على الارض الفمنيست موجودين من زمان بص للفلاحه في الارض و لا المعلمه في المدبح نفس الافكار بص مش بطريقة شيك و علميه ست مسترجلة و بنت سوق الزمن عمل فيها كده على فكرة انا مش بادافع عن الفمنيست لان اعتقادي في حكمة الله ان يخلق رجلا و امراءة بكل صفاتهما لكن اسمحلي ليه مش اتكلمت عن الرجل الناعم اللي ما ليه معني مش في الشكل بس لكن المصيبة الكبري في معني الرجوله .. الرجل فقد قدرته على التحكم و السيطرة استخدمها اولا بجبروت و تحكم ثم تنازل عنها و بقي بيخاف من المدام خايف يتجوز تاني ( شرع الله ) و هو قرفان في حياته لتخرب بيته فكان الحل انه اخترع الجيرل فريند بديلا للزواج بطريقه شيك بيشتغل طول النهار زي الماكينه و المدام كاسره ظهرة و لا يقدر ينطق كام واحد بيقول رايه في بيته كل واحد بيقول اللي تحبيه يا حبيبتي علشان يريح دماغه قول لي فيه كام محضر ضرب للازواج يا سيدي تغيرت جينات الجميع رجلا و امرأة و الخضار و الفاكهة تحياتي

عاشــــــ النقاب ـقــــة"نونو" يقول...

السلام عليكم
استاذ راجي بوست رائع الحقيقة
بيتهيالي ان الموضوع لا يخرج عن كونه وشعاراتت زائفة
واول ما تتحط في موقف ما تعرفش تهبب حاجة وبسرعة تجري تحت جناح الراجل ربنا يخلي كل راجل بيتقي الله يارب
ويهدي الل لسة
وبيتهيالي برضه انها مش هتعرف تبقى انثى طبيعية زي ما وصصفت بنت القمر كدة
الخلاصة ان الوضع شعارات وبس وفعل مفيش
لان ما ينفعش ومش هينفع
تحياتي لحضرتك

Hypatia يقول...

استاذي العزيز
ازيك

فيه انواع كتير تانيه على فكره ظهرت مؤخرا
اهمهم نوع كده مطور من الجنس المذكر ساعات بيبقي عنده شنب وساعات لا وممكن يكون طويل وممكن يكون قصير لا منه راجل ممكن يرضي ست ولا منه ست ممكن ترضي راجل حاجه كده ماسخه ومايعه وهى السبب فى ظهور الفيمينست اللى تكرمت بالاشاره ليها

سؤال:
هل الفيمينست سعيده فى حياتها وناجحه؟
هل الموزه ست البيت ناجحه وسعيده؟

الامر نسبي ونظرتك كراجل للنوعين تختلف عن بعض الرجال اللى بيفضلو الست قويه الشخصيه الفيمينست الناجحه المستقله بذاتها اللى مش عايزه راجل ياكلها ويشربها ويتاويها بين اربع حيطان اختيار الراجل للست الفيمينست بيدل على شخصيته القويه كراجل مش محتاج لكائن ضعيف يفترى عليه حتى يثبت رجولته لانه مقتنع بان رجولته مش محتاجه اثبات

عزيزى الكائن f هو رد فعل طبيعي عن ظهور الكائن m اللى اشارت ليه كليو فى تعليقها

يعني من الطبيعي جدا لما تتراجع صفه الرجوله فى الذكور ان الست لازم تكتسب بعض صفات الرجوله حتى تسير الحياه

واختلف تماما مع فكره ان الست القويه-الفيمينست-متقدرش تخلف وتفتح بيت وكده لا بقي والله والله وشفت بعيني ستات بميت راجل فيمينست وفاتحه بيتها باديها وسنانها بتشتغل وبتصرف وبتربي عيال وبتعلمهم والعينه ديه كتير و فى كل الطبقات


بوست مميز جدا جدا كعادتك يا استاذ راجي

امضاء:
فيمينست
:)

أسوور يقول...

لا يمكن ان تحكم على انسان بما تحب انت ان يكون
اى انسان ايا كان
الإنثى انسان .. الذكر انسان

فى نوع برضه من الذكور ظهر يعيش على عرق المرأة .. ومنذ الأزل هذا النوع موجود ولكنه زاد بشكل مخيف

است تشتغل برة البيت وجوة البيت والبيه قاعد طول الليل يلعب كوتشينة ويحشش مع البهوات .. والصبح نايم وخالى شغل ومش عايز يبذل مجهود
احصائية يا سيدى تقول ان 35 % من الأسر فى مصر تعولهن امرأة و 30 % تساعد المرأة زوجها فى مصاريف البيت

نظرية النشوء والإرتقاء تقول ان دة لازم يحصل .. اما الراجل يبقى بياخد ومريح على الآخر والست المزة او الى كانت مزة فى يوم من الأيام متشحططة على لقمة العيش أكيد هيحصل حاجة فى الكروموسومات مع الوقت

بقى فى رجالة متستتة وكدة اكيد هيبقى فى ستات مسترجلة

وعلى كل حال أعجبنى تعليق مادو جدا وله كل التحية

النظر من زاوية واحدة للأمور و وضعنا رغباتنا محور الإهتمام هو قمة الأنانية

هاتلى راجل قايم بكل واجباته على أكمل وجه و ورينى بقى الست بتاعته عاملة ازاى

وبعدين معاملة مخلوق ما بعنف تجعل منه مخلوق عنيف وهنا نعود لنظرية النشوء والإرتقاء مرة اخرى
عايزها حنينة عاملة بحنية .. عايزها مزة عاملها على انها مزة ولو حتى كانت مين هتلين .. انا امرأة واعرف تماما ما أقول

تحياتى لك على بوست اثار جدل

بنت القمر يقول...

نسرين بسيوني
محدش قال ان الست القويه مش ممكن تخلف بس راجي مقالش ست قويه هو ذكر توصيف محدد لها لابسه جينز سينيه وبترطن بكذا لغه وبقيه الصورة اللي رسمها
ودي مش قوة
لاحظي انه اصلا نهي الكلام بانه
*****************
هو من الذكاء بحيث اختار ان يتشكل جسده على هيئة الانثى التقليدية ليتمتع بميزة الضعف التى ترقق نحوه القلوب دون التدنى الى تدنيس هذا الجسد فى حمل او ولادة او ارضاع
*******************
يعني هو نهي الكلام اصلا بانه اختارت طريق بعيد عم الزواج و الامومه
نيجي نقوله احنا لأ هي ينفع تخلف
الراجل بيوصف نموذج تاني خالص
وعموما يا عزيزيتي افهم ربما ما تعنيه
وده موجود في نموذج المرأه المعيله
الست اللي بتشتغل بره وجوه
ام وولادها ناجحين
ولو كده ابقا انا فيمينيست وبنت فيمينيست
((:
كمان لو ده التوصيف اللي تقصديه
تحياتي نسرين

Hypatia يقول...

عزيزتى بنت القمر
اشكرك على التوضيح انا الحقيقه اتضايقت من وصف الموزه ست البيت ووضعت مقابله على طول الفيمينست اللى انتى فهمتى قصدي بيها وللاسف التبس عليا الامر ومفهمتش قصد استاذ راجي
باعتذر
وانا متاكده انك فيمينست من النوع اللى انا اقصده
تحياتي قمر

canary يقول...

مقال جميل يديك احساس غريب نوعا ما زى ما يكون دراسه شعريه مفيش فيه عنصريه ولا هجوم على المرأة لكن نقد راقى وزى ما قولت شعرى نوعا ما

همس الليل يقول...

من رأيى البسيط شايفه ان طول ما كل راجل وعذرا ان كل ذكر اصبح يطلق عليه كلمه الرجوله مجازا
بس طول ما كل رجل مبحلق عنيه فى هيفاء واليسا وبوبى بتاعه اعلانات ميلودى
فغصب عن اى انسانه هتتحول لفيمنست عشان تقدر تعيش
طالما اى انثى مبقتش شايفه ان اى راجل ممكن يحميها او يوفرلها حياه كريمه بعزه نفس
اكيد هتتحول لفيمنست او جزء من ساقيه الحياه
على فكره المشكله هنا مشكله جيل تحولت رجالته لو سمينا الستات من النوع دا فيمنست
يبقى الرجاله فى الجيل دا بئوا خواجات هههههههههه
واسفه اوى الكلمه اكيد كل واحد هيفهمها مكنش ينفع تتكتب
طول ما النخوه والشهامه والرجوله اتمحت
وبئا كل شريان ذكر بيجرى فيه بدل الدم كوكا كولا او حاجه ساقعه
لازم اى انثى هتتحول كدا

عارف حضرتك من 10 سنين كان فى انترنت ومن 10 سنين بردو كان فى فضائيات
وكان فى كل دا اه مش على نظاق اوسع انما كان موجود

وكان فى شباب كتير بتسافر بره لكنهم كانوا يرجعوا ويتجوزوا من المصريات
عارف ليه
عشان كان لسه فى عروقهم دم فى نخوه

لكن دلوقتى واسفه ان 99% من الذكور يطلق عليهم رجاله مجازا
ودا بيفسر ظاهره الفيمنست

انت دقيت على مشكله فعلا بقت واضحه اوى كل بنت بتجرى دلوقتى بدل ما تعمل جمعيه زى زمان تشترى لحافين ولا شويه مكياج عشان تعجب العريس
لاء بقت تروح تاخد كورسات انجليزى وكمبيوتر الى اخر الحجات دى وتلبس على اخر مودا مش عشان الثقافه لو دا الهدف يبقى مش عيب
انما عشان تستقل بذاتها وتقدر تحقق لنفسها الامان الاجتماعى اللى اصبح مفقود حاليا

احنا فعلا فى مشكله خطيره ظاهره تحول الاناث ونسيان ما خلقهم ربنا لاجله لاننا نسينا ان امهاتنا كانوا امهات المؤمنين
وان قدوتنا النبى صلى الله عليه وسلم
ونسينا اننا هنموت
عشان كدا الرجاله نست دورها والستات كمان

اسفه للاطاله لكن الموضوع حقيقى استفز غيرتى على انوثتى وعلى دينى
تحياتى لعقلك ولمواضيعك

Unknown يقول...

تقريبا الناس فهمت لا يغير الله ما بقم حتى يغيروا ما بانفسهم غلط...
المفروض كانت الناس تتغير للصح عشان ربنا يغير حالهم للاكثر صحه..
لكن اللي حصل العكس
الناس اتقلبت لمزز ورجاله ورق
عشان كده ربنا غير حالنا
وبقينا نشوف حاجات غريبه
ناس عايشه في مدينتي وناس بتاكل كلاب
تلاقي الست ماشيه لابسه تمام جدا وبنتها في ايدها مش لابسه حاجاه خالص
ناس بتتفرج على الجزيره وتزعل على اللي ماتوا وتقلب تلاقي بوبي بتعلن عن ميلودي قلبه يزئطط وينط من الفرحه
وغيرها من الحاجات اللي كلها ملهاش اي علاقه ببعض..
تحياتي على تسليط الضوء على الانواع الجديده مننا

Empress appy يقول...

طيب ايه بقى انا ايه
انت ليه هتلخبطنى كده بجد
اممممممممممممم
بس انا اشتركت فى جروب اسنه انا مش موزه ههههههههههههه بجد الكلمه دى وحشه انما فيمنيست دى
امممممممممممممم سمعتها كتير ومش بعترف بيها بس انا فيه شبه من حاجات قولتها
طيب انت كده لخبطنى ليه بقى
طيب هستنى اجابتك

عين فى الجنة يقول...
أزال المؤلف هذا التعليق.
عين فى الجنة يقول...

توضيح هام
طبعا انا مستمتع جدا بالتعليقات والاراء والحقيقة كل الكلام قيم ونابع من عقول مستنيرة وانا غير مندهش من كده بل هذا ما اتوقعه دائما منكم
الحقيقة يمكن حضراتكوا لاحظتم فى البوست اننى لم اهاجم السيدات المنتميات الى الحركات النسوية المطالبة بالمساوة بين النساء والرجال بغض النظر عن لماذا هن يطالبن بالمساوة ، كما اننى لم اهاجم المطالبات بالحرية الكاملة للنساء سواء من الناحية الاقتصادية او السياسية او حتى الجنسية وايضا حرية الاجهاض
بل يمكن تلاحظوا اننى معجب جدا بالنشاط النسائى فى هذا المجال خصوصا فى مجال التفوق العلمى والثقافى وايضا الخبرة الكبيرة فى مجال استخدام ادوات العصر الحديث من الات و اجهزة ومنها طبعا الحواسب والانترنت مع التحفظ على بعض الافكار والمباديء الخاصة بالحركة فى مجال الحريات وذلك من منطلق تعاليم الدين الاسلامى الذى اعتنقه وحسب مفهومى الخاص لهذا الدين العظيم
وانا طبعا غير متناقض مع هذا الكلام على المستوى الشخصى فى علاقتى الابوية وخصوصا مع ابنتى اليافعة
لكن لو نظرت الى الحركة النسائية وانصارها وعلى فكرة هناك الكثير من الرجال ينّظّرون ويؤيدون الحركة ، لو نظرت نظرة تحليلية لهذه الحركة نجد انها قد اتسمت بالكثير من الانانية والعنصرية بل انها تمثل عكس المباديء التى تنادى بها من حيث المناداة بالحرية والمساوة
فبالرغم من اشتراك النساء مع الرجال منذ بدء الخليقة فى ممارسة الحياة كتفا بكتف وتعرضهم جميعا لمختلف الاخطار من الطبيعة المتقلبة الى الحيوانات المفترسة الى الامراض وكل هذه العوامل التى واجهت البشر لم تفرق ابدا بين رجل وامرأة فالفيضانات والبراكين والزلازل والامراض تفتك بالبشر بدون تمييز
كما ان نعم الله المتمثلة فى دفء الشمس ونور القمر والنجوم والزرع والانعام والمياه العذبة والهواء النقى وباقى النعم التى لا تعد ولا تحصى لم تميز ايضا بين رجل وامرأة
ايضا الاديان فى مضمونها العام تساوى بين الرجل والمرأة فى التكاليف الشرعية وفى العقاب والثواب
ايضا تعرض بنى البشر للحروب الطاحنة التى فتكت بالرجال والنساء والاطفال بدون تمييز مثل قنبلتى هيروشيما ونجازاكى اللتان مسحتا المدينتان بمن فيهما بدون تمييز
ايضا فان الجزء الاسود من تاريخ الانسان والخاص بالرق والسخرة والسبى والاضطهاد العنصرى والاغتصاب الجنسى قد طال كلا الجنسين بدون تمييز
وعلى مستوى الاسرة الواحدة فقد تم الاتفاق الضمنى العملى بين الرجال والنساء على ان يقوم الرجل بالعمل سواء فى الصيد او الرعى او الزراعة مع حماية البيت من الاخطار وتقوم المرأة بالرعاية بالمنزل وتربية الاطفال
ما سبق كان فى الاعم الغالب ما عدا الاستثناءات التى حدثت فى مراحل كثيرة من التاريخ وادت الى ممارسات القهر والظلم ضد المرأة او الاهمال والتنكر سواء من الاب او الزوج او حتى من الابناء الذكور
فالحركة النسوية اذن فى اعتقادى هى حركة انانية اهتمت بشئون النساء ولم تلق بالا لباقى البشر او القضايا التى تؤثر عليهم مثل التلوث والفقر والامية والحروب وسوء توزيع الثروات

ولذلك فقد ختمت البوست بالانحياز الى الاسرة كلها كوحدة واحدة فيها الرجل والانثى والاولاد وهذه هى المقاربة المنطقية لمشاكل كل البشر على اساس اعتبار ان الاسرة هى الوحدة التى يجب تكون محل الاعتبار وليس الرجل بمفرده او الطفل بمفرده او المرأة بمفردها
وبقى امر اخير فأنا اعتذر عن استخدام لفظ موزة فقد كان ذلك جليطة اسفت عليها
تحياتى لكم جميعا واشكركم وفى انتظار المزيد من التعليقات والاراء

Hypatia يقول...

كلام جميل وكلام معقول ماقدرش اقول حاجه عنه
:)

انا من البنات اللى باتمنى من كل قلبي وبادعى ربنا انى اكون زوجه وام -بطريقتي الخاصه-واكون كيان ناجح مع شريك ناجح ورجل بمعنى الكلمه
لكن يا استاذ راجي ظروف المجتمع بتفرض عليا انى احط لنفسي احتمال تانى وهو انى ممكن اكون لوحدى وانا قررت انى اتعامل مع الناس ومع روحى على اساس انى كيان مستقل بذاته واخطط لحياتي على هذا الاساس دون التعلق باحلام الكيان الاسري عشان لو ماتحققش الكيان الاسري ماموتش بقهرتى ولو اتحقق حاكون شاكره لله ومستعده ليه
يعني انا شايفه ان الست او البنت لازم تكون مستعده لكل الاحتمالات فى حياتها

بوست ممتاز ومناقشه استمتعت بيها

كلبوزة لكن سمباتيك يقول...

انا متفقة تماما مع رأي بنت القمر
النوذج اللي حاكيت عنه ده مش نوع جديد من البشر بس هو منشق من الجنس الانثوي و مش منتشر الا في طبقات معينة


تحياتي

عين فى الجنة يقول...

قليل من التفكير
سيدى العزيز اولا ارحب بك فى مدونتك واشكرك على المداخلة
المشكلة ان المساواة موجودة فعلا الا بعض الحالات الاستثنائية ولكن فهم يتصرفون مثل العالم الذى اجهد نفسه فى وضع تفسير للماء ففشل وكان مضرب الامثال حيث قيل لقد فسر الماء بعد الجهد بالماء
شكرا وتحياتى لحضرتك

عين فى الجنة يقول...

ماجد بك

اهلا بحضرتك ومنور ، ولكن يا اخى العزيز لا يوجد انسان على وجه الارض يملك الحرية المطلقة ليفعل مايشاء فهذا فرض نظرى وغير قابل للتطبيق
فكل انسان سواء اكان ذكرا ام انثى له حدود طبيعية واخلاقية وقانونية الخ الخ فلا يوجد ما يسمى بالحرية المطلقة الا فى خيال الشعراء والفيمينست:)))))

عين فى الجنة يقول...

موناليزا
اهلا بحضرتك لاول مرة عندى مشرفة ومنورة وتمام يافندم عداكى العيب ، الراجل راجل والست ست
كل له دور مهم فى الحياة وادوارهم تتكامل ولا تتعارض
تحياتى لحضرتك

عين فى الجنة يقول...

someone in life
اولا انا باعتذر على استخدام تعبير موزة
ثانيا : السيدة العاملة فى الحقل او فى السوق من اكثر السيدات تضحية ولكن ليس من اجل نفسها او بنات جنسها ولكن من اجل اسرتها وعلى فكرة هذا النموذج عملى جدا بدون تنظير ولا مؤتمرات وبتدى زوجها وضعه الادبى وبتكون شريكة فى ادارة الاسرة
ثالثا : الرجال الذين على الهامش او اشباه الرجال ، هؤلاء تنازلوا عن رجولتهم ازاء المجتمع ككل وليس امام النساء فقط
تحياتى

Amany Y. El-Saeed يقول...

لاحظت من التعليقات إن الناس فهمت البوست غلط إلى أن وضحت ذلك في تعليقك الأخير و الذي أتفق معه أكثر من البوست

عين فى الجنة يقول...

نسرينا
طبعا انتى احلى فيمنيست فى منطقة الشرق الاوسط ، بس ياخسارة زمالكاوية

تحياتى والمدونة نورت بالمعارضة الديموقراطية

عين فى الجنة يقول...

nonoymm
صدقتى يا اختى فى ما قلتيه وجزاك الله خيرا
واهلا بحضرتك فى المدونة شرفتينا

عين فى الجنة يقول...

نسرينا
كلامك صح 100 % ومتفق مع كلامى ، بس لازم ننظر للموضوع على اساس ان الرجل يحتاج للست والست لا غنى لها عن الرجل ، يبقى لو فى مجهود وشغل للاصلاح فى المجتمع يجب ان يوجه للاسرة كوحدة بنائية للمجتمع ، مع الاخذ فى الاعتبار ان الانسان ذكر او انثى طالما عايش هذه الحياة الدنيا حبحصل اخطاء وتجاوزات بطبيعة تكوين البشر فيكون الاولى لم الشمل
واى انثى فى رايى يجب ان تتسلح بالعلم والثقافة فى كل الاحوال سواء التحقت بالعمل لصالح شركة او مؤسسة او فى اى عمل يدوى فى اى مجال او اختارت التفرغ لاسرتها
وعلى فكرة بس عشان اعاكسك : ممكن المدير فى العمل يطلع عنيها من غير ما تقدر تعترض وقد يكون اكثر فى ذلك من زوج غبى او متصلت
اشكرك مرة اخرى
ولكى التحية

عين فى الجنة يقول...

اسوور
اهلا بحضرتك ليكى غيبة طويلة
والله كلامك صح ، فى رجال كده وكده يعنى اشباه رجال فالمتوقع ان مراته تاخد زمام المبادرة والا البيت ينهار
بس مختلف معاكى فى ان ليس فى كل الاحوال ان الست بتعامل الرجل بحنيه لو هو عاملها بحنية بل العكس قد يكون صحيحا، وكمان مش حنعمم فى هذا الموضوع بس الرجل ( وانا ايضا رجل وعارف ) بيحتاج الى مراعاة زوجته الى بعض الامور الهامة فى الحياة واولها الهدوء واختيار الوقت المناسب لمناقشته فى المشاكل والقمصان تكون مكوية والشرابات فى الدرج والفوطة ناشفة فى الحمام والاكل سخن لما يرجع تعبان وحينزل تانى يروح شغل بعد الظهر يعنى شوية حاجات هايفة لكن بتفرق وبعدين والله انا عارف ان الست بتحب تسمع كلام حب رقيق لكن فى بعض الاحيان بيكون الامتنان بدون كلام وكفاية ان الواحد بعد ما يتغدى يخش ينام ساعة فى هدوء بعد الغدا ويقول الحمد لله وهو بيحط راسة على المخدة ، ساعتها يكون الاجر من ربنا احسن الف مرة من كلمة شكر او حب من الزوج لزوجته، احنا فى النهاية بنعامل ربنا وننتظر الاجر منه
اشكرك ولكى تحية وسلام

عين فى الجنة يقول...

canary
الله يكرمك ويعزك ، اشكرك على المداخلة والمرور
الف شكر

عين فى الجنة يقول...

نورا ( همس الليل )

اهلا بيكى يا انستى العزيزة والله كلامك جميل وانا متفق معاكى تماما انه من اسباب ظاهرة الحركة النسوية تقاعس بعض الرجال عن القيام بواجباتهم في المجال الذى خلقه الله لهم ، اضف الى ذلك ظاهرة الرجال الشواذ ذلك الوباء الذى لو استفحل فى اى مجتمع فلينتظر عقاب مثل عقاب ال لوط والعياذ بالله
اشكرك وابدى اعجابى من جديد بفنك الرائع سواء شعرا او صور فى مدونتك العزيزة

عين فى الجنة يقول...

دمعاتى

اشكرك يا عزيزى على المداخلة ومتفق معك تماما
ايه اخبار الطرب عندك ؟ ارجو ان تكون قد سجلت اغنية جديدة
تحباتى ولك كل تقدير

عين فى الجنة يقول...

appy
انتى طبعا اجدع واحدة فى القاهرة الجديدة والقديمة كمان ، طول ما القلل معاكى والادوات التانية فانتى واخدة حقك بدراعك ومافيش اجمل من كده
وانا باعتذر مرة تانية عن استخدام كلمة موزة
اشكرك وارجو لكى كل الخير

عين فى الجنة يقول...

Sampateek

اولا ارحب بيكى واشكرك على المداخلة وانا متفق ايضا مع بنت القمر فى رأيها وتوضيحها لنسرين
تحياتى ولكى كل التقدير

عين فى الجنة يقول...

امانى

اهلا وسهلا بيكى للمرة الاولى وارجو ان لاتكون الاخيرة
واشكرك على المداخلة وانا زرتك فى مدونتك واعجبت بيها جدا

تحياتى والى اللقاء

غير معرف يقول...

من يوووم ما ظهرت الكائنات دى
والستات خنشرت والله يا راجى

مبقيتش اشوف دلوقتى ستات رقيقة وننوسة كدة الا والميديا تصورها أنها ست ملعب وسارحة على حل وسطها

مبقاش فيه مثال للإحترام و الجدية والأدب الا خفراء الدرك ذوى الهرمونات الأنثوية

حاجــــــــة بقت تقرف

أنا بقا بأشجع اللعبة الحلوة
أقصد الست اللى هى ست ست يعنى
حلوة وحركات من دى

:))))

والعوافى

عين فى الجنة يقول...

شهروزة

العوافى عليكى واهلا بيكى منورة المدونة
وانا كمان باشجع اللعبة الحلوة عند الستات اللى بحق وحقيق الننوسات القمرات
اشكرك على المداخلة والحمد لله انك ظهرتى بعد اختفاء طويل

بنت القمر يقول...

معجبه بردك عند محمود المصري
طبعا حب لف كده توصل الخيوط ببعضها
ميا مسا--> اسكندراني فار اواي--> بنت القمر{العميله}محمود المصري شفت الدنيا ضيقه ازاي؟؟
تحياتي

dr.Roufy يقول...

حقيقي أحييك يابشمهندس على الموضوع وفكرته ..رغم كوني بنت الا اني اوافقك تماما ..فاالفيمينيست غير المرأة العادية, على الأقل ان كنا سنحكم ظاهريا
أما الحكم ان كان مبنيا على التأثير الاجتماعي والنجاح الأسري, فيقينا لن تكون الفيمينيستس هن الأكثر بريقا

مودتي

Mona Shereif يقول...

تعجز كلماتى ان تبدى اعجابها بمدونه حضرتك

مـ~ـاجدولين يقول...

اولا مدونه مش جميله بس لكنها مذهله

ثانيا بصراحه

كنت أعتقد ان الرجال يعشقون f

ويكرهون x,x


طيب كويس اديتنا امل

blackcairorose يقول...

بحس انا لوحدى اللى مبشفش كلمة مزة وحشة قوى زى ما اغلب الناس بتشوفها

اقول حاجة؟

لو كلمة مزة صفة بجانب صفات أخرى زى

مثقفة

رقيقة

أمينة

جدعة

معنديش أى مشكلة

ولكن لو كلمة مزة هى مجرد الصفة الوحيدة البارزة فى المرأة، ربما هنا تكون المشكلة

ولا أيه

عين فى الجنة يقول...

قمر
اشكرك على الاطراء
على فكرة انا معجب جدا بالقصة القصيرة الاخيرة وياخسارة مالحقتش اعلق على الاحتفال بوفاة حماة صديقتك
تحياتى

عين فى الجنة يقول...

دكتورة روفيدا

اشكرك على المداخلة ومتفقين تماما وطبعا حضرتك لاحظتى ان نسبة كبيرة من الانسات والسيدات متفقات معنا

تحياتى

عين فى الجنة يقول...

sometimes
وانا كمان معجب بمدونتك واتمنى لكى النجاح

تحياتى

عين فى الجنة يقول...

ماجدولين

اشكرك يا انستى العزيزة على المداخلة وعلى الاطراء

انتى ايضا عندك مدونة اكثر من رائعة واعجبنى جدا تعبيرك انك كالبحر المسجور

تحياتى ودمتى لنا صديقة عزيزة على الدوام

عين فى الجنة يقول...

وردة القاهرة السوداء
طبعا السواد يعود على القاهرة موش كده؟ وانتى وردة بلدى مفتحة

الموزة تعبير مثير للجدل فى كل الاوساط ولست ادرى اصله ولا من اول من اطلقه على الانثى الجميلة ذات الخلاعة والدلال
وهو بيفكرنى بموزة اللحم حيث انها قطعية طرية فى الدبيحة ، ما علينا

طبعا الانثى بجانب الجمال والانوثة والدلال والفتنة والجاذبية يستحسن ( يستحسن ولا اقول يلزم ) ان تكون على قدر من الذكاء واللباقة
وان كان تمتعها بالجمال والانوثة الطاغية يعتبر ذكاء بل وعبقرية فى حد ذاته
اشكرك

nody يقول...

اكيد الانثى الرقيقه المحترمه اختفت من الحياه
الا من رحم ربى
بس كمان الراجل الجميل المؤدب اختفى هو كمان بقوا يا اما ماكينات المانى
يا اما فرافير امريكانى
خلاص يعنى خلصت

nody يقول...

معلش تكملت التعليق
وبعدين يعنى بصراحه الراجل ما بيعجبوش لاf ولا yy
زى بالظبط روايه فينا ليوسف ادريس
راح يدور على واحده جريئه فى النمسا ولما لقاها
قعد يقول لا مراتى الخجوله احسن بتحسسنى برجولتى

عين فى الجنة يقول...

nody_1987
اهلا بيكى فى المدونة وانا زرت مدونتك وهى جريئة وجميلة
تعليقك ظريف جدا بس ياريت افهم قصدك ايه من الرجال اللى زى الماكينات الالمانية؟او الفرافير الامريكانى ، واضح انه تصنيف مبتكر للرجال
تحياتى ولكى كل المودة

اسامة يس يقول...

بعض النساء وجوههن جميلة،، ويصرن اجمل عندما يبكينا...

بالقطع لم يقصد نزار الا النساء الطبيعيات... التي يبكينا...

لكن لي سؤال...: لماذا نبتت هذه المرأة ...؟ ثم ألا يحق لها ان تقول انا.. وتعيش الحياة كما تشاء.. طالما هي تعيش حياتها هي ...

دمت بكل ود...
خالص تحياتي

nody يقول...

اولا مرسيه على ردك على تعليقى
ثانيا مرسيه على زيارتك الغاليه لمدونتى المتواضعه
ثالثا ها جاوبك
الماككينه الالمانى
يعنى الراجل الى مش مستعد انه حتى يعبر عن حبه واعجابه لاى واحده
وفاهم ان الرجوله تكشير ووش جبس
انما بقى الفرافير الامريكانى فادول بقى بتوع التسبيل وماما وبابا ومربى وعيش توست
بقى الرجاله معظمهم كده الا من رحم ربى ودول بقوا قليلين جدا
وياريت تسامحنى على مصطلخاتى بس انا ليه عذرى اصلى ليسانس لغه عربيه
الفيوذ لسعت من كتر اللغه
ودى النتيجه
تحياتى

عين فى الجنة يقول...

عزيزى اسامة

طبعااى انسان له الحق فى الحياة على طريقته طالما لا يتعدى حدود الحرية المباحة
لك التحية واشكر لك الزيارة الغالية

عين فى الجنة يقول...

nody_1987
دمك زى العسل ، اشكرك على التوضيح
وياسلام لو الماكينات الالمانية تركب سوفت وير معدل يسمح بالتعبير عن المشاعر
لكى التحية واشكرك

الباحث عن الحقيقة يقول...

والله انت راجل عسل
موضوع جميل
وقدرت تعبر عن وجهة نظرك فى المسترجلات بشكل مميز ومختلف ..ومبدع ايضا
وكمان عجبنى تعليق كليو
بقى عندنا فيمنيست ..ومالينيست

loumi يقول...

العزيز راجي

كل مرة أدخل عشان أعلق ألاقي تعليقات تشدني وأستمتع بيها بالإضافه للبوست نفسه طبعاً
عارف
مشاكل المساواه والمواطنه وغيرها من القضايا المستحدثه نتيجه العولمه
مشاكل واهيه ضعيفه فكما ذكرت فى توضيحك المساواه موجوده منذ خلق الله الدنيا ومن عليها
كل طرف كُلِّف بمهمة على قدر طاقته على التحمل فأتمها على أكمل وجه فاستوت الأمور واستقرت
وحين تريد أن تزعزع هذا الإستقرار فإنك يبحث عن طرق لزعزعة هذه الثوابت
بإدخال مفاهيم جديده تروق للبعض
فيتبوها ويتشدقون بها على غير وعي كامل بأثر هذه الأفكار الدخيله على مجتمعاتنا
أنا مع أن يختار كل فرد الطريقه التي يريد أن يحيا بها بشرط أن يكون على درايه كامله بعواقب إختياره


تحياتي لك

عين فى الجنة يقول...

الباحث عن الحقيقة

اهلا بك من جديد واشكرك على التعليق وعلى المدح واهو انت اللى عسل :)))
تحياتى

عين فى الجنة يقول...

لمى
انا سعيد بعودتك الى التعليق والتدوين واشكرك على المداخلة
ومتفق معاكى على طول الخط