الأحد، فبراير 17، 2008

النوم على الكنبة




لا نتصور رحلة العمل من دونه ، فصاحبنا من الظرفاء فهو بشوش الوجه سريع البديهة دائم السخرية من اى شيء على وجه البسيطة حتى من نفسه ومن زوجته ، وهو شديد الحرص على النقود لا ينفق مليم احمر الا على ملذاته الشخصية التى لا يشاركه فيها اى مخلوق ومن اقواله المأثورة انه يطلع القرش من اليهودى
واتذكر يوما فى الاسكندرية وقد عزمناه على العشاء عند ابو اشرف فى منطقة الجمرك وصال وجال من شوربة السى فوود الى البورى عبورا بالجمبرى وبعد ان مصمص اخر كابوريايه ،اقترح علينا وهويمرر الخلة بين اسنانه ان نحبس بالجيلاتى من عند النظامى احسن واحد فيكى يا اسكندرية يعمل جيلاتى ، ولانه على حد قوله خبير باسكندرية وعارفها حته حته لانها مسقط رأس زوجته فقد خفتت الاصوات التى اقترحت صابر او غيره على اعتبار انه صاحب العزومة وهو حر يختار المحل اللى يعجبه ، وقد كان وكما توقعت كان النظامى محل نص نص وما يقدمه لا يمت للجيلاتى بصلة ولكن المصيبة حدثت عندما خرجنا الى الشارع ووجدنا النظامى يجرى خلفنا صائحا
فين الحساب يا بهوات
وكان صاحبنا يمشى امامنا ويضع يدية فى جيوبه مصفرا بفمه بدون ان يدفع لانه عيب قوى ان يدفع وهو وسط اعز اصدقاءه
اما قصته مع زوجته فهى نموذج للصراع الشرس بين الطرفين والضرب تحت الحزام ومثالا على التماسك الاسرى المزيف الذى تحرص الطبقة المتوسطة على ان تعلقه على حائط الصالون امام الناس مع صورة الزفاف التقليدية بالابتسامات المفتعلة على الشفاه
لم يحكى لنا كيف اختارها ، فقط هو يتذكر كيف اقنع والدها ان حفلات الزفاف ما هى الا صداع فى الدماغ ومضيعة للنقود ، وكانت زوجته حديثة التخرج انذاك تحلم بالعيش فى القاهرة بعيدا عن الاسكندرية حيث فرص العمل المحدودة فلم تصر على حفلة الزفاف واقتصر شهر العسل على ليلتان فى فندق سيسل بالرمل
وكما حكى لنا فقد احبته فى السنوات الاولى من الزواج وكانت دائما تبتكر له المفاجأت مثل الاحتفال بعيد ميلاده بالتورته والزمامير بين زملائه فى مكان عمله وتعبر عن حبها بشتى الطرق الممكنه ، وانتقلت هى من عمل فاشل الى اخر اكثر فشلا وهى صابرة على بخله وتعليقاته التى تسفه من ارائها وتسخر من فشلها امام الاخرين
وانجبت له بنت وولد صارا بالنسبه له الدنيا وما فيها وكان يقوم بنفسه بتغيير الكوافيل وتحميمهما الاهتمام بكل شئونهما ، وفى هذه الاثناء كان ينتقل من نجاح الى اخر حسب مفهومه الشخصى الا وهو حجم رصيده فى البنك وسيارته من احدث الموديلات
اما هى فقد قدحت زناد فكرها حتى اهتدت الى دراسة اللغات والترجمة وانخرطت فى البرامج التى تؤهل للعمل فى الترجمة ونجحت فى الحصول على رخصة الترجمة الدولية المعتمدة وبدأ رصيدها فى البنك يتضخم فى نفس الوقت الذى بدأت مشاعرها نحوه فى التحول الى العداء الخفى ثم العلنى ولم يعد يهمهما ان يسمع الاطفال الشتائم الطائرة فى جو المنزل ولم تفلح جهود الجيران والمتطوعين فى الاصلاح بينهما ناهيك عن الفضائح التى صارت بمثابة نشرات الاخبار فى الحى الراقى من حولهم
ومن الطرائف التى حكاها لنا انها طلبت منه يوما ان يعتذر لوالدها عن ما اعتبرته سوء تصرف وجليطة من جانبه ولما ماطل احضرت ساعته الرولكس التى يتعدى ثمنها الثلاثة الاف جنيه ودشتها بايد الهون
ويوم كانت فى حاجة الى دولارات امريكية كان يملكها وعرضت عليه شرائها بسعر السوق ، فضل ان يبيعها الى شخص اخر بفرق قرش صاغ لكل دولار فما كان منها الا ان ذهبت الى السوبر ماركت واشترت لحوم وبقالة لا حاجه لها باكثر من الف جنيه وما لم تسعة الثلاجة فقد وجد طريقه الى صفيحة القمامة
واصرت هى على مدرسة لغات باهظة المصاريف فساومها على ان تدفع نصفها فامتنعت عن الطبخ والنظافة فى المنزل واجبرته على استخدام شغالة مرتبها اكثر من ستمائة جنيه كل شهر
وعندما سافر لاداء فريضة الحج للمرة الثالثة اشترطت عليه عدم حلق رأسه بالموسى وعندما عاد ووجدت راسه بدون شعر تركت له المنزل واخذت الاولاد واضطر الى دفع ايجار شقة فى الجوار حتى لا يحرم من رؤية اولاده ثم عادت مرة اخرى للبيت تحت ضغط اهلها
وعندما يصاحبنا فى تلك السفريات يصر على مشاهده الافلام الكوميدية التافهة مثل اللنبى وعوكل وافلام هانى رمزى وعندما اقول له يا سيدى نحن كريمة المجتمع نشوف فيلم اجنبى عليه القيمة ايه اللى عاجبك فى الافلام الهايفة دى يقول الافلام دى بتنسينى الكارثة اللى انا عايش معاها وكده احسن ما اشرب خمرة واسكر علشان انسى
وهو عندما يحكى لنا تلك الاحداث اضحك حتى افقد القدرة على التنفس وعندما نقول له طلقها يتعلل بانه لا يستطيع البعد عن الاولاد ، طيب اتجوز عليها يقول نفسى والله لكن انتوا عارفين مصاريف الجواز ومشاكله ، طيب عاملين ايه مع بعض يقول هو قرص فياجرا واحد فى السنة يقسمة الى اربعة اجزاء هى عدد المرات التى تسمح له فيها بدخول غرفة النوم من باب فعل الخير وايتاء الذكاه وهو من جانبه علشان ياخد حقه مقابل فلوسه التى ينفقها على البيت اما بقية العام فينام فى الانترية على الكنبة

تنويه هام : هذه الاحداث حقيقية تماما مائة فى المائة ولكن لو صادف ان ادعى احد انه هو المقصود بها ففى هذه الحالة هى خيالية ومحض اختلاق

هناك 32 تعليقًا:

mado80 يقول...

أستاذ راجي

ازيك

القصه تمثل مأساه الحياه الزوجيه حين تتحول هذه الحياه لجحيم بعكس ما يجب أن تكون من موده ورحمه وسكن

للأسف هناك الكثير مثل صديقك وأعتقد أن القصه واقعيه تماما

وللأسف أيضا ما لا يدركه الزوجان في صراعهما الدائم وضربهما البعض تحت الحزام أن الضحيه في ذلك دائما ما يكون الأبناء

فنجد بعد كل هذا الصراع الشرس أبناء معقدون يحملون للدنيا وما فيها كراهيه ليس لها حدود

مش عارف يا أستاذ راجي الواحد لما بيسمع مأسي زي دي بيفكر ميت مره قبل ما ياخد أي خطوه لمشروع الجواز...ربنا يستر

تحياتي ليك يا أستاذ راجي وألف تقدير لشخصك الكريم

بنت القمر يقول...

الله الله الله
والنبي نمرة تليفون مرات صاحبك
احب اللعب الحلو... فمازلت اعترض بكتابه ورقه علي الشوفينيرة او اسيطر علي غضبي بارسال ايميل لادم بصيغه احتجاج حتي امنع نفسي من الزنجرة
مازالت وسائلي هبله بدائيه لاتخرج عن التكشيره التي سرعان ما تتبخر اوالانزواء الذي يستميت ادم ليخرجني منه بصنعه لطافه
وغيرها من وسائل الاحتجاج بتاعه بنات الناس المتربيين
جتنا نيله اوي طحن في ام التربيه بتاعتنا اللي جابتنا ورا
ويظل سبب الاختلاف معلقا
دشت له الساعه بالهون
عسسسسل
والنبي النمرة يخليلك ولادك وتفرح بيهم
محتاجه كورس مكثف ولو الاخت بتحب الفلوس شيك مقبول الدفع علي بياض
الحقني بيها
تحياتي

عاشــــــ النقاب ـقــــة"نونو" يقول...

اول زيارة لمدونة حضرتك
القصة دي بيتهيالي قصة فظيييعة جدا وتعتبر حرب في بيت زوجية
بس هما الاتنين ما يتاهلوش غير بعض
بالطبع البخيل على الصعيد المادي قطعا لازم مشاعره كمان تبقى بخيلة ربما دة سبب من اسباب الحرب الدائرة في بيته
وبعدين من اعمالكم سلط عليكم بيتهيالي دة ليهم هما الاتنين
ولو حضرتك امعنت في حياتي بنظرة شمولية شوية اكيد هتلاقيها بعيدة عن الدين وتطبيقه بمعناه الحقيقي والا ما كانش يطلب من زوجته انها تصرف من فلوسها في حاجات من واجبه اصلا
وهي عرفت نقطة ضعفه ولعبت بيها كمان
والله في ازواج من الحنكة انهم يخلوا زوجاتهم يصرفوا من فلوسهم في البيت من غير حتى الزوج ما يشعر احيانا مع كل قرش بتصرفه كمان بتبقى مببسوطة
لكن صاحبك دةتنصحه قبل ما يطلقها انه بيعدل من نفسه واسلوبه في التعامل مع زوجته بداية ويستحمل ويصبر وهي كمان لان التعديل مش هيتعمل على طول لا لازمالتغيير يؤتي ثماره بس واحدة واحدة فوق انها هي كمان تكون عاوزة تتغير علشان الحياة تمشي بينهم
وتاكد انه حتى لو تزوج باخرى يبقى المشكلة ما اتحلتش بلل هتزداد سوءا لانه سيناريو اخر وهيتعاد
تقبل مروري واتمنى التواصل

عين فى الجنة يقول...

ماجد بك
حكاية صاحبى دى استثنائية جدا ولا تتكرر بالطريقة الكوميدية دى الا فى النادر
ولما تنوى الجواز خلص نيتك لله وخلى الزواج بغرض التعفف وبهدف انشاء اسرة تؤمن بالله وبعدين لا تنسى وصية الرسول التى تأمرنا بالعدل مع الزوجة حتى لو لم نحبها
اكرمك الله وزوجك بمن على علم ووعى باصول الدين

عين فى الجنة يقول...

قمرة
انا موش عبيط اديكى نمرتها ، اولا لانى باخاف منها ، ثانيا انتى عارفة المواضيع دى بتلف تلف وبعدين ممكن توصل لحرمنا المصون يبقى انا اللى جنيت على نفسى
علاوة على ما تقدم فمن الواضح انك ما تنفعيش فى الحرب دى انتى غير مؤهلة للصراع اللى من النوع ده
بعد النصايح الغالية دى ممكن بقى الشيك يبقى باسمى؟

عين فى الجنة يقول...

نونويم
اهلا بيكى فى المدونة منورة
على فكرة هما الاتنين خلاص وصلوا لحالة من الاستقرار بس كل شهر كده تقوم حرب صغيرة بينهم وتنتهى بخسارة لاحد الطرفين والخسران ينتظر المعركة المقبلة ويحاول الانتصار ، فبقى ده الوضع الطبيعى للبيت عندهم
اشكرك مرة اخرى

انا من اهوى ومن اهوى انا يقول...

راجى :

تحياتى على السرد الرائع دا قمة المأساةبسرد كوميدى لاذع

بس اولا واخيرا الزواج شر لابد منه

احب اسيب تهنئتى لنفسى قبل ما اسيبها ليك على اكتشافى لمدونتك الجميله ودايما للأحسن

تحياتى

محمد فوزى

Cleo يقول...

أستطيع أن أفهم تقبلخ لهذا الوضع بسبب صعوبة الطلاق وكذلك صعوبة الزواج باخرى خاصة من ناحية التاكليف.. بالإضافة إلى ان الرجل البخيل فى بيته هو بكل تأكيد رجل مولود بمرض نقص الكرامة المكتسبةولذلك فإنه لا يجد إهانة فى تصرفات زوجته...

الغريب فى الموضوع موقفها هى واصرارها على مواصلة الحياة معه.. خاصة وأنه من المعروف أن بخيل الجيب بخيل القلب.. طب راضية بكدة على ايه!!!

مي بهاء الدين يقول...

صعب أوي العيشة كده

هوه الإنسان إمتى هايفهم إن حياته هايعيشها مرة واحدة بس..ومافيش فيها وقت للنكد اللي عمال على بطال
معلش لو الحياة بينهم بجد كده ولسة عايشين مع بعض يبقوا يستاهلوا اللي يجرالهم....وكل واحد ذنبه على جنبه

دي عيشة ايه دي؟

تحياتي يا استاذ راجي
:)

S H A H يقول...

انت كارثة في طريقة سردك يا مسيو راجي

بس تعرف اكبر كارثة للبنت, انها تتجوز الراجل البخيل, كل المشاكل دي كانت توابع بخله

ربنا يعينها على ما ابتلاها

تحياتي

loumi يقول...

العزيز راجي

صاحبك ومراته
دول تحفه

إيه العيشه النكد دي؟


بس في ناس بتحب تعيش بالطريقه دي

تحياتي

أبوشنب يقول...

والله صاحبك ده ومراته مية مية

على فكرة بس هقولك حاجة

الاتنين دول بيحبو بعض

اصل القصصص والافلام فهمتنا ان الحب

صو صو صو نو نو نو

لا صدقني الحب فيه منه اشكال وانواع

وده الحب البراطيشي

يعني لما الحب ينغزهم في القلب

يحدفو بعض بالبراطيش

طيب اراهنك ان صاحبك ده لا يمكن يفكر يخون مراته ولا يتجوز عليها

مش عشان بخيل

لا بالعكس عشان هو عارف انه بيحبها

حتى التكسير والهبل ده كله

ما تأخذنيش هو لو مفيش فلوس هيقدرو يعملو ده كله

انا اعرف واحدة ست كانت قاعدة بتشكي لصاحبتها

بتقولها جوزي ما عدش بيحبني زي الاول

ليه يا اختي كفى الله الشر؟

قالت لها ما عدش يديني العلقة بتاعتي

كنت اول ما اغلط يديني علقة

دلوقتي مهم اعمل ولا بيمد ايده عليا

Unknown يقول...

ياخبر
هيه دي اخرة اللي بيجوزوا
لا دا كده العزوبيه جنه
لن اتركها بعد اليوم..
احيك على السرد الواقعي
فهو لو لم يكن وقع بالفعل فهو واقع الان

عين فى الجنة يقول...

محمد بك فوزى
انا سعيد جدا لمرورك على المدونة
نورت ياباشا

عين فى الجنة يقول...

cleo
اولا انا لست ادرى هل انت انسة مازلت ام متزوجة ، فالزوجات يحسبن الحياة بطريقة مختلفة عن المنطق والعقل خصوصا فى وجود الاطفال
المشكلة تكمن فى التغيير الذى يصيبناداخل اطار الزواج فالامور تتعقدبشكل لا نتصوره قبل الزواج وتدور العجلة سواء رضينا او ابينا
هل تتحيلى اننى اصبحت لا اجد راحتى فى البيت الذى ولدت فيه وعشت لمدة ثلاثين سنة واجدها فى بيتى الخاص ، الحكاية معقدة وليس هناك حلول جاهزة لاى شيء
اى حل بمثابة كم رهيب من الآلم والمعاناة
بس احنا بنحب صاحبنا وهو كده واعتقد انه لو تغير فسوف نشعر بالخسارة يالها من انانية

عين فى الجنة يقول...

مى العزيزة
اعتقد ان الباشمهندس محمد ابو شنب عنده رؤيه جميلة للموضوع ارجو قراءة تعليقه
اشكرك ولكى كل التقدير

عين فى الجنة يقول...

السيد شاهنشاة المبجل
طبعا عندك حق ف بخل صديقى من النوع الدكر الذى يضرب به المثل ، بس هو والله شخص لذيذ و شخصيتة فى الجوانب الاخرى من اجمل ما يكون، وزى ما حكيت لكم هو عنده سيارة مرسيدس اخر طراز وعنده فيلا وبيلبس اخر شياكة
لك التحية يا صديقى العزيز شاه وارجو مداوم الزيارات الجميلة

عين فى الجنة يقول...

لمى العزيزة
فينك ياجميل من زمان؟ ارجو ان تكونى بخير
وارجو منك قراءة تعليق الباشمهندس ابو شنب الظريف
وعاوزين نشوف بوستات جديدة جميلة عندك

عين فى الجنة يقول...

عزيزى باشمهندس محمد بك ابو شنب
تعليقك ظريف ووتحليلك يقترب جدا من الواقع
هو فعلا بيقسم انه لم يخونها فى يوم منالايام رغم تعرضه للفتنة بصفة مستمرة 24/7 يعنى على مدار الساعة
وهو بيقسم كمان انها سيدة شريفة عفيفة رغم تعرضها للفتنة ايضا فى نطاق عملها
والحتة الاخيرة الخاصة بالست اللى جوزها بطل يضربها فى الجون وواقعية تماما
عاوزين نشوفك ياباشا لما تنزل اجازة
واى خدمة فى موضوع صب السقف احنا ماسكين خط الصعيد من اول الجيزة لغاية اسوان

عين فى الجنة يقول...

دمعاتى
اهلا بيك ياباشا فينك من زمان
وعلى فكرة حكاية صاحبى دى استثنائية دا وانوى كده الجواز وانت ربنا يوفقك انشاء الله
تحياتى لحضرتك

Unknown يقول...

راجى

اية اخبارك يارب تكون كويس

يا خبر اسود دة اية كل دة

معقول الكلام دة حقيقى

دة مش جواز دة عذاب

وهو اية اللى مصبرة على كدة

وهيا كمان اية اللى مصبرها على كدة

بس انا عايزة اسال سوال

الشغل فعلا بيلهى عن الحياة الزوجية

يعنى اللى بيكون غير موفق فى جوازة ممكن حياتة العملية تلهية عن الجواز ومشاكلة؟

مش عارفة حاسة ان لازم الواحد يستقر فى حياتة الاجتماعية الاول وبعد كدة هينجح فى حياتة العملية

مش حاسة ان الشغل ممكن يلهى عن المشاكل الزوجية

دومت بالف خير يا راجى

نوراى

Unknown يقول...

استاذ راجي
شكرا على سؤالك واعتذر عن التقصير..
بالنسبه للزواج فهو خطوه مؤجله ليس لموضوعك دخل في تاجيلها.. فنم مطمئن البال :)
نجوز ايه بس.. ما انا فتحت المدونه عشان اسلي نفسي..مش عاوزين اكتر من كدة

عين فى الجنة يقول...

نوراى
طبعا الانغماس فى العمل ممكن يحطم الحياة الزوجية وليس العكس صحيح
وانا اعتقد ان الصراع بينهما لن يصل الى درجة الانفصال او الخيانة بسبب الاطفال
اشكرك بشدة على زيارتك وارجو لكى كل الخير

عين فى الجنة يقول...

دمعاتى
قال رسول الله
خير متاع الدنيا المرأة الصالحة
رزقك الله بزوجة صالحة وزرية مباركة ان شاء الله

سلوى يقول...

طيب يتجوز ليه عليها
أو يطلقها ليه

اسمح لي هو لا يختلف عنها كثيرا

يا أستاذي الطيبون للطيبات
وإذا صدقت النوايا عند الزواج
لكان السكن والود والرحمه

عموما ربنا يهديهم

بس طريقتك في عرض الموضوع مميزه كالعاده

تحياااااااتي

mohandsmasry يقول...

باشمهندس راجى مش قادر اصدق عينى بجد قمة السعادة علشان بأكتشف وجودك هنا وباكتشف الجديد والثرى جدا فى شخصية اكن لها كل الحب والتقدير اضافة لقمة فى العلم والتواضع والخلق ياااه يا باشمهندس انا مش عارف انا اتعميت ازاى ومش شفت مدونتك دى من زمان رغم انى بدخل اغلب المدونات اللى لينكاتها عندك دى بصفة مستمرة وحاططها عندى فالمفضلات حتى اللى بيعلقوا فيها باتابعهم بردو يااااه على الصدفة الجميلة والسعيدة دى

عين فى الجنة يقول...

الاخت سلوى العزيزة

نصيحتنا له بالزواج مرة اخرى حتى تحدث الفوضى الخلاقة على الطريقة الامريكية وسوف يقف كل طرف ليفكر فى الامر مضطرا وعادة تكون مصلحة الاطفال مقدمة على الكرامة المزيفة لكل منهما فقد يحدث بينهما الوفاق وفى نفس الوقت نكون قد ساهمنا فى حل مشكلة امرأة اخرى قد تكون مطلقة او ارملة
واكيد صدق الله العظيم الطيبون للطيبات
لكى تحية مباركة طيبة

عين فى الجنة يقول...

مهندس مصرى
ازيك كده ايه اخبارك ؟
شكرا على المفاجأة الجميلة

بنت القمر يقول...

هو ايه الي حصل في الحزب حفصه بعتت لي ميل مقلق
هو مين استجرا وعمل ايه؟؟
هو احنا حتي مش عارفين نهزر؟مفهمتش حاجه من حفصه
منتظرة ميلها او حضرتك تفهمني
ها امر تاني يا ريت تسيب لي توضيح هنا

عين فى الجنة يقول...

بنت القمر
الموضوع بسيط
ومنعا لنشر الخلافات بين الاصدقاء على الملأ ، ارجو طلب التوضيح من حفصة
اشكرك على الاهتمام

Empress appy يقول...

بين الطرفين والضرب تحت الحزام ومثالا على التماسك الاسرى المزيف الذى تحرص الطبقة المتوسطة على ان تعلقه على حائط الصالون امام الناس مع صورة الزفاف التقليدية بالابتسامات المفتعلة على الشفاه

عجبتنى قوى دى عارف ليه حضرتك لانى بسمى التزييف اللى فى الجواز او الجواز التقليدى الطلاق الصامت بجد

عين فى الجنة يقول...

ابى
فعلا ملاحظتك واقعية جدا
منورة المدونة