الأحد، أكتوبر 05، 2008

زيارة


 فى زيارة لقريبتى الارملة ،جلست اعبث فى الكرافات و كنت الرجل الوحيد بين نساء  وفتيات عدة بينهن التى لم تتزوج والتى رحل زوجها وراء ريالات النفط وترك لها بناتها والاخريات المتزوجات المنقبة والمحجبة والسافرة 
وبينما  امتدت الايدى الى اطباق الكعك والحلوى توجهت الانظار تلقاء الفتاة التى تعمل فى اوروبا وقد انهمرت عليها الاسئلة التى تلونت بالفضول وقد استمتعت بالرد على النساء اللاتى سلقنها بنظراتهن التى تخترق الظاهر الى الباطن وتترجم ما تحتوى الكلمات من معانى خافية واسقاطات وظلال فى عقول مدربة على القتل البارد ولكنها صمدت وابدت روحا شفافة نقية فهى لا ترغب فى الاستمرار فى الغربة القاسية 
ثم انطلقت المنقبة فى شرح وجهة نظرها التى يلفها الغموض عن العلاقة المثالية بين الزوجة المؤمنة واسرتها  فى اطار السعى الى التقرب من الله وصرحت بأن تلك العلاقة يجب ان تكون مجرد اداء للواجبات الشرعية فقط من ارضاء للزوج واطعام الابناء ليس اكثر من هذا وان مجهودها كله يجب ان ينصرف للعبادة والتقوى
وفشلت تماما فى الدفاع عن نفسها امام الهجوم الكاسح التى فوجئت به من النساء الاخريات اللاتى اتهمنها بعدم فهم جوهر الدين 
ثم انتقل محور الحديث الى حلقات معز مسعود فقالت السيدة ام البنات " ده امور خالص " ثم بدأت المقارنة الدامية بين عمرو خالد ومعز مسعود التى انبرت فيها الفتيات الصغيرات فى الدفاع عن عمرو خالد بينما اختارت السيدات الانحياز الى الداعية الاخر 
شاركت بالابتسام حينا وبهز الرأس احيانا وبالغمغمة بكلامات غير مفهومة معظم الوقت 
تحدثت السافرة عن الافلام الامريكية التى تعشقها وكيف انها شاهدت فى احد الافلام فتاتين ذوتا بشرة بيضاء شديدة البياض وقد ارتدت واحدة فستانا بمبى اللون والاخرى فستانا بلون السماء الزرقاء فقالت المنقبة انها لا تشاهد تلك الافلام الا لرؤية الديكورات الجميلة فى البيوت فقالت السافرة انها حولت السارى الهندى الذى اهدته لها استاذة الجامعة الى ستارة جميلة فقالت لها الاستاذة انه باهظ الثمن فردت السافرة انها على استعداد لدفع ثمنه فى الحال فقالت الاخرى انها فكرة جميلة ومبتكرة على اى حال ثم صمتت فى حزن
انقذتنى الفتاة قوية الملاحظة عندما دعتنى لتجربة اللاب توب الجديد الذى اشترته امها لها هدية النجاح فى الثانوية العامة والتحاقها بالجامعة الالمانية نفضت السكر البودرة من على الكرافت وعندما انتقلت الى الغرفة الاخرى تنفست الصعداء واصوات النساء وقد احتدم بينهن النقاش تترامى الى مسامعى 
 



هناك 40 تعليقًا:

قوس قزح يقول...

لو رجل تانى غيرك
كان شافها فرصة يعرف جلسات السيدات بيتقال فيها ايه

و لو انا مكانك
كنت احب اشارك فى الحوار ده اوى لانه ممتع :))

سبحان الله يمكن نفس الموضوعات تتناقش بين الرجال ايضا لكن بطريقة مختلفة و تجعل ايضا النساء تنفر منها

تحياتى و كل عيد و انت طيب

أحمد كمال يقول...

المواقف اللي زي كده بتبقى سخيفة جدا ، حضرتك فكرتني بمرة لقيت نفسي في وسط جلسة نسائية مشابهة ، و لكن الذي أنقذني طفل أصغر من سن الجامعة بكثير :)

على فكرة أنا كنت جاي أقول كل سنة و انت طيب :) و مش عارف رمضان عندك كان بعد مارينا و لا إيه ؟

نعكشة يقول...

:D

اوحش حاجة ان يبقي فية راجل قاعد لوحدة كدة وسط الستات
ههههههههههه

انا عن نفسي بحب اقعد وسط بابا و اعمامي
بحس انهم بيتكلموا في مواضييع احلي من مواضييع الستات اللي عندنا
البطاطس و التوم وا لفجل
و في الاخر بطل بنت مش كويسة وبتبهدل
مالهم الرجالة

.....

في النص بقة

انا بحب المنتقبات جداً بس مش اي واحدة تنتقب تبقي منتقبة
يعني مثلا اللي حضرتك بتتكلم عنها هيا مش فاهمة الدين بالظبط
وبعدين حلوةةةةةةةة قوي حكاية بتفرج علاافلام الاجنبية ( اللي كلها ناس معرفش بيعملوا اية) و بعدين ايدة في ايدها و لابسين فوق الركبة المهم يعني
آل اية بتتفرج عليها عشان الديكورات
طيب يا سيدتي تشرفنا

مبحبش برضو النقيض

انا بحب الاعتدال صراحة

الموضوع التاني بتاع الداعية مش عارفة لية الناس بتبص للداعية كشخص او كلحم و دم و صفات مش ككلام
وحديث بيخرج منه
مش كأفكار
يعني دة ممكن اكتر يكون في الحديث عن ممثلين ولا مغنين انما دعاة

......... لا تعليق!

بس بقة طولت علي حضرتك

كل سنة و حضرتك طيب
بمناسبة الكحك ابو سكر بودرة
:D

سلام عليكم

راجى يقول...

قوس قزح
فعلا الموضوعات التى اثيرت فى الحوار ممتعة ولكن اذا كان اطراف الحوار ملتزمون باصول الخلاف فى الرأى
اشكرك يا صديقتى وكل عيد وانتى طيبة

راجى يقول...

احمد بك
فى الجلسات المشابهة نبحث عن قشة الانقاذ ولو عند طفل صغير
اهلا بك يا صديقى وكل عام وحضرتك بخير
وعلى فكرة احنا رجعنا من مارينا قبل رمضان بايام قليلة

راجى يقول...

نعكشة العزيزة ، ازيك وحشتينى جدا والله
ارجو ان تكونى بخير وسلام وكل عام وانتى طيبة
وبخصوص شكل الدعاة فهو مهم جدا ان يحوز القبول ، لاننا سوف ننفر من اى داعية غير مقبول الشكل حتى قبل ان يحاول الكلام

norahaty يقول...

السلام عليكم ورحمة الله وبركاته
هى صورة مصغرة لحالنا استاذ راجى
فثلما موقعنا الجغرافى على ملتقى الثلاث قارات فكذلك اهماماتنا واحوالنا خليط من اشياء كثيرة ليس لهذاعلاقة انك جلست وسط نساءاو رجال. لا لا لم نجتمع نحن يامصريين على شىء الا
وفيمااعتقد الاوقت الحروب والازمات !!!
هذارايى وارجو ان اكون مخطئة!!!
كل سنة وانت بالف خير
فين الكحك؟طيب فين
القراقيش حتى بس؟؟
نهارك ابيض

Sherif يقول...

راجى باشا

كل سنة وانت طيب .. ربما كان اعتكافك وتركيزك سببا لغيبتك فترة عن الكتابة

أنا اعتير انك رفيق الاناقة .. متدين باعتدال .. وهذا مايريحنى فى احاديثك .. فلا هو تفريط فى دين جميل قيم كقول الله سبحانه وتعالى .. ولاهو عود الى الناقة والواحة وفكر الصحراء الجاف الذى يصيب بجفافه النفس والعقل معا..

يقول المولى فى خطابه للرسول شخصيافى سورة الاحزاب
"لا يحل لك النساء من بعد ولا ان تبدل بهن من ازواج ولو اعجبك حسنهن "

فبالله عليك كيف يعجب الرسول حسنهن ان كن منقبات؟

شئ غريب ان يزايد احد على الرسول شخصيا .. حتى وان صدقت النيات فى التقرب لله .. أقول لمن يريد لاتفرض رأيك على غيرك .. وافعل مايحلو لك

الاعتدال جميل دائما .. وربما أثرت موضوعا يطول .. لايسعه المكان عندك

احببت أن اهنئك بالعيد .. واقول لك اننى احب كتاباتك .. وانها اوحشتنى فعلا

محمد الجرايحى يقول...

الأخ الفاضل: راجى
السلام عليكم ورحمة الله وبركاته
لاأعرف إذا كانت هذه الجلسة حقيقية أم مجرد مدخل لتوضيح آراء وأفكار خاصة من الكاتب تخير لها هذا الإطار..
وعموماً هى جلسة جمعت بين كل المتناقضات فى صورة تمثل واقعنا الحالى الذى يجمع كل تناقضات الحياة من فكر وثقافات مختلفة
تعبر عن مدى التخبط الذى يسير فيه المجتمع الذى أصبح لاهو إسلامى ولاهو علمانى إنما خليط مائع من كل هذا....

!!! عارفة ... مش عارف ليه يقول...

عرضك رائع لصراع الثقافات الدائر بينهن
وتعصب كل فريق لوجهة نظره
وهذا ما يؤخذ علينا دوماً

أذهلني إهتمامك بالتفاصيل
وأمتعني كثيراً


دومت دوماً مبدعاً
وليد

إنـســـانـة يقول...

اولا كل سنة وحضرتك طيب

ثانيا احيييك بجد على اسلوبك الجميل فى الكتابة .. عجبنى جدا وشدنى ما شاء الله

ثالثا زى ما قالت قوس قزح الستات ليها مواضيع للكلام وغالبا الرجالة بتنفر منها وبردو الشباب والرجال ليهم مواضيع للكلام بعض الستات بتنفر منها

انا عن نفسى فعلا بحب الحديث حسب اللى بيتقال .. بعض الاحاديث النسائية بتكون نميمة وغيبة ومواضيع لا يليق الكلام فيها امام آنسات والامر ما يخلاش من بعض الشتايم والالفاظ البذيئة احيانا

وبردو الاحاديث الرجالية كتير بردو بلاحظ فيها نفس الموضوع بس بشكل فظ اكتر وإن كانت تخلوا من النميمة والغيبة

إنما بردو فى احاديث نسائية مفيدة جدا بنسبة ليا كبنت .. الكلام عن الطبيخ والاكل والعيال والبيت والدنيا .. الاول كنت مش بحب كدة خاااااالص بس مع الوقت والسن والمسؤليات بحتاج اسمع كلام زى ده كتير

اما الاحاديث الرجالية بقا بصراحة لو خلت من عيوبها بتبقى جميلة جدا وبتجذبنى اكتر .. خصوصا لو الكلام عن الثقافة او الدين الاقتصاد او السياسة او العربيات او الموبايلات او الشغل او او او او


فحسب احنا مع مين وبنسمع ايه ومحور كلامنا ايه

خالص تحياتى يا استاذى

سلام عليكم

¨¨¨°~*§¦§ Appyplanet §¦§*~°¨¨¨ يقول...

مع ان كلمه السافره دي مش حساها بتاعتك بس ضايقتنى
مش هتطرق لتعريفها وليه اتقالت خلاص بقى علشان مش اخد موقف ملوش لازمه
المهم كل سنه وانت طيب
ويا طوله بالك فى قعدتك انا لو فيها كنت قلبت الترابيزه من بدري
احنا شعب بيتفنن فى الدفاع المستميت عن وجهه نظره حتى لو غلط وساعتها بنحط قطن فى ودنا بس يا ريت نحطه فى بقينا كان يبقى احلى
كل مره وانت طيب بقى

بنت القمر يقول...

اولا عاجبني تعليق ابي
يا ريت نحط القطن في بقنا
2_ كلمه سافرة تحمل قدر من العدوانيه
3_ من اللي نفض السكر البودرة من الكرافته صاحبه الللاب توب!!! الصغننه؟؟
وام البنين كانت فين
؟؟
اخيرا
عاجبني تعليق محمد الجرايحي هو بالضبط اللي عاوزة اعلق واقوله
5_ طول عمري محبتش عمر خالد بحسه داعيه للراهقين افضل المخضرمين زي محمد هدايه
راجل يملا الدماغ بجد
وعلي الصعيد النسائي امنه نصير
معز مسعود زوق المدامات غريبه
عشان كده بيعجبني
هيهيهيهيهي
اعتقد انه افضل واقوي م عمر خالد
كمان مش بحب بتوع العياط
بحب الداعيه الداهيه المتمكن من ادواتهة مش اللي بيخاطب العواطف
7_ كل سنه وانت بالف خير انت واسرتك

عدى النهار يقول...

كل سنة وإنت طيب وبخير وإنشاء الله تكون تعافيت من تلك الزيارة
:)

حسن ارابيسك يقول...

أنا خت بالي من حاجه انك انت الوحيد اللي كنت عمال شغال بتاكل في الكحك والظاهر من كتر انشغالك بحديثهن اللي يشبه السلطة في تنوعها وألوانها
الحقيقة لاتأخذ بحديثهن فمعظمهن او كل واحدة منهن لاتدلي بدلوها هي وأنما كل واحدة سامعت كلمة من هنا وكلمة من هناك ترددها زي البغبغان وترمي أحيانا الكلمة ولاتعرف معناها ومدلولها وده كله ناتج كثرة الدعاء وتلونهم فمنهم الصادق ومنهم غير ذلك وبناءً عليه كل واحدة أحيانا تقولك أنا قرأت أنا شاهدت..وهكذا
على فكرة انت نسيت تقولنا هو الكحك كان طعمه ايه..؟
تحياتي
حسن أرابيسك

blackcairorose يقول...

راجى

معلش بس لفظ سافرة فيه حكم اخلاقى ضمنى

بصراحة مبحبوش لانه حكم فيه رأى ومش توصيفى

بعكس كلمة محجبة او منقبة دى الفاظ توصيفية فقط

هتسالنى طيب تقول ايه؟

اقولك معرفش

يمكن كلمة غير محجبة وصفيه ومحايدة اكتر

واطيب تحية

رحــــيـل يقول...

هههه
يااستاذ راجي ده اان بنت واول لما احس ان قعده البنات هتبدا كده بجرى اهرب منها

هههه نصيحه بنت مجربه اياك اياك وجلسات الحريم ههههه اهرب منها على طووول وشوفلك اى منفذ

كل عيد وانت طيب

راجى يقول...

norahaty
جميل ربط الجغرافيا بالحالة المتردية للمجتمع ، وهذه وجهة نظر احب ان اتأملها بهدوء
ولكن الاختلاف بين الناس يعتبر امر طبيعى ولا يدعو للعجب ولكن الملل يزحف الى النفس عندما لا اجد اى مساحة فى الحوار الدائر من حولى تبشر بالخير
وبعدين يا اختاه الكعك غالى جدا السنة دى ممكن اعزمك على ايس كريم :)))

norahaty يقول...

السلام عليكم ورحمة الله وبركاته
مفيش مانع استاذ راجى
بس شوكولاته ماجنوم لوسمحت
وبسرررررررررررررررررررررعة
من فضلك .هههههههههههههههههه
شكررررررررررررررررررررررررررآ

راجى يقول...

شريف باشا
صديقى العزيز لقد اسعدنى كلامك الرقيق ومجاملتك الكريمة
ولست ادرى الى اين تمضى بنا الايام القادمة حيث التشدد من ناحية والتفريط من ناحية اخرى يؤدى الى تمزيق اوصال المجتمع
وادعو الله ان يصرف عنا الشر وييسر لنا الخير
واحب انا ايضا ان اعبر عن اعجابى بكتاباتك وزوقك الرفيع

راجى يقول...

norahaty
تحت امرك اطلبى الدليفرى وابعتى لى الفاتورة على الايميل :))

راجى يقول...

محمد الجرايحى
اولا احب ارحب بحضرتك فى المدونة
واشكرك على التعليق الذى يشف عن ثقافة وعمق
وهى جلسة حقيقية ولكنى فى مواقف مشابهة احب ان اسجل فى ذاكرتى لمحات و انطباعات اعود اليها فيما بعد واتأملها على مهل وهذه عملية لا ارادية بل هى اتوماتيكية فى اللاشعور
اشكرك مرة اخرى والى لقاءات جديدة

راجى يقول...

عارفة موش عارف ليه
اشكرك يا صديقى العزيز
ولكنها الشيخوخة التى تستعيض عن حيوية الجسد بمتعة التأمل والتحليل
دمت بكل ود

راجى يقول...

انسانة
والله انتى انسانة ظريفة بجد ، ربنا يخليكى على الاطراء والمجاملة وانا زرت مدونتك واعجبت بها فعلا
دمتى بكل ود وادعو الله ان يغمرك بالخير

راجى يقول...

ابى
فكرة جميلة ان يكون فى جيبى كيس قطن للمواقف الطارئة واعندها ارسم ابتسامة على شفتاى و لا من شاف ولا من درى
وبخصوص استخدام كلمة سافرة فهى مرققة بدلا من متبرجة :))))
تحياتى لسيادتكم

راجى يقول...

بنت القمر
لستة من سبع بنود كل بند انقح من اللى قبله
انا والله اللى نفضت السكر والصغننة بتقول لى يا خالى فأم البنين معندهاش مشكلة:)))
اشكرك وتحياتى لكى وللاسرة

راجى يقول...

عدى النهار
الحمد لله
شكرا

راجى يقول...

الفنان حسن ارابيسك
الكعك كان جميل جدا والغريبة هايلة ودى احسن حاجة فى الزيارات دى
:))

راجى يقول...

blackcairorose
لفظ سافرة فى اللغة العربية يعنى التى تكشف عن وجهها بالنسبة للنساء ولقد استخدمت اللفظ لانه مرقق عن اللفظ المستخدم للتى تكشف شعرها عند الجماعة المتشددين وهو لفظ متبرجة وانا لا احب هذا اللفظ لانه قاسى جدا
لان التبرج فى الحقيقة مرتبط بالجاهلية ولكن السفور له معنى ايجابى فنقول اسفرت الشمس بمعنى اشرقت
كما ارجو التنويه الى ان كل الحاضرات فى الزيارة كن من السيدات الفضليات وانا مستحيل اصف اى منهن بوصف يحط من قدرها
ارجو ان قد بينت
واشكرك على التعليق الظريف الرقيق

راجى يقول...

سارة
كل عام وانتى طيبة وبخير
اشكرك على مرورك الكريم

نعكشة يقول...

ماشي بس مش لدرجة إني اقول دة حلو و امور و مسمسم :^)

راجى يقول...

دكتور نعكشة
معلش اصل الستات دول حاجة غريبة جدا

Cleo يقول...

حمدلله على السلامة يا أستاذ راجى..

ياريت تسأل المدامات بعد إذنك الكحك الهايل كان منين.. لأنى السنة دى أخدت فيه مقلب جامد قوى :(

هممم...

أنا معاك إن قعدات السيدات لا تخلو أبدا من الأحاديث الهايفة.. لكن لو حضرنا قعدة رجالة؟؟ مش هتبقى المواضيع كلها كلام فى السياسة (بدون وعى ومجرد ترديد لما تنشره الصحف بدون تعقل) و عربيات وموبايلات وفنانات وأيضا نميمة على خلق الله؟؟

بس الفرق إن القعدات الحريمى مش بيبقى فيها ألفاظ جارحة :p

الهيافة أصبحت سمة حياتنا جميعا رجالا ونساء لأن الأشياء المهمة اللى ممكن ننشغل بيها كلها تغم النفس..

كمان محدش بيشجع المواطن من صغره لحد ما يكبر على أى حاجة مضادة للهيافة.. لا قراءة ولا رياضة ولا عمل جماعى تطوعى.. مستنيين من الناس ايه بقى؟؟

عاليا حليم يقول...

اولا انا مع تعقيب قوس قزح على موقفك

:)

ثانيا ده جزاء الى يتعلم تعليم مستنير مننا

سلوى يقول...

وأخيرا العنايه الإلهيه أنقذتك
بيد تلك الفتاه

:))

على عبدالله يقول...

استاذ راجى ممكن اعلق ؟؟؟
بصراحة انا مش بحب ابدا اجلس وسط السيدات !!! قصدى وحدى يعنى عشان ماحدش يزعل

خالص تحياتى

shasha يقول...

هكذا هن النساء عزيزى لا تستغرب

خمسة فضفضة يقول...

السلام عليكم ورحمة الله وبركاته

كل سنة وانت طيب يا استاذ راجي

المره الجايه ابقي خد واحد صاحبك معاك يمكن تعرفوا تكونوا جبهه رجالي يكون ليها ثقل في القعده

:))))))))

dr.Roufy يقول...

رغم اني بنت على ما يفترض يعني
لكني شخصيا باتخنق من مجالس السيدات دي
:)
لكن المجلس الي نقلته هنا يابشمهندس..حلل شرايح وتغييرات كتير ..موجودة فعلا في الواقع, وبطريقة احترافية أهنئك عليها
:)

راجى يقول...

كليو
عاليا حليم
سلوى
على عبد الله
شاشا
خمسة فضفضة
دكتورة روفيدا

الف الف شكر على الزيارة والتعليق وانا اتفق معكم وابصم بالعشرة
تحياتى لك جميعا