الأحد، مارس 09، 2008

كلمة حق يراد بها باطل







فكرت كثيرا فى مبادرة المصالحة والمصارحة التى اطلقها بعض المدونيين للتعايش السلمى بين المسلمين والمسيحيين على ارض هذا الوطن تحت عنوان
معا امام الله
وهى دعوة للمشاركة عبر استبيانان للرأى احدهما خاص بالمسلمين والاخر خاص بالمسيحيين ، لم اقرأ الاستبيان الخاص بالمسيحيين اما استبيان الرأى الخاص بالمسلمين فهو محشو بما لذ وطاب من الاسئلة الخبيثة والفخاخ التى يتم استدراج المشاركين اليها
الاستبيان تم تصميمه بذكاء بحيث يتم التغاضى عن شخصية المشارك وهذا فخ نصب لاتاحة الحرية امام المشارك ليسب ويلعن على راحته لانه يشارك كمجهول الهوية فيمكن لمسيحى مثلا ان ينتحل شخصية احد المسلمين والعكس صحيح ويكتب ما يثير الحقد والضغائن ، كما يمكن لكل شخص ان يشارك اكثر من مرة وكل مرة يكتب اجابات جديدة مختلفة والشاهد ان هذا الاستبيان فاسد وملعوب فى اساسه
ونتيجة الاستبيان يلفها الغموض ، فكيف يتم تفريغ الاجابات ؟ وبأى منهج علمى او احصائى يتم ذلك العمل ؟ ومن هم الموكل اليهم تفريغ الاجابات ؟ ومن هم القائمين على تحليل تلك الاجابات وبأى مقياس ومنهج ؟ وهل سيتم نشر نتائج تفريغ وتحليل الاجابات ؟ واين ؟ هل هناك جهات امنية او اجنبية او اعلامية سيتم تقديم تلك النتائج لها؟ مئات الاسئلة التى بدون اجابات ، وكان فى رايى المتواضع انه من الافضل ان يشترط على المشارك كتابة اسمه وعنوانه الالكترونى حتى يشارك مرة واحده فقط وكان يجب تقديم ضمانات للمشاركين بعدم استخدام الاستبيان ونتائجه لتحقيق اغراض معينة او نشر نتائجه فى اى من الوسائط الاعلامية بدون موافقة المشارك وهكذا تكون الامور اكثر شفافية
ثم دعونا نتكلم بصراحة عن العلاقة المطلوبة بين المسلمين والمسيحيين فى مصر ولنتفق على الاساسيات وانا كمسلم اعرف قدرا كافيا عن دينى ، ازعم انه من واجبى البر والتعامل بالحسنى مع من يخالفنى فى الدين طالما انه مسالم ولا يعتدى على ولا يجاهر بالسخرية من دينى ومعتقداتى
ولكن ذلك لا ينتقص من دينى شيئا ولن امتنع مثلا عن قراءة القرآن الكريم واياته التى تكفر الذى يعتقد ان الله ثالث ثلاثه وتكفر من يعتقد ان لله ولد سبحانه وتعالى علوا كبيرا ولن اتوقف عن رفع الاذان للصلاة والمجاهرة بصوت عال انه لا الله الا الله وان محمدا رسول الله ، ولن اداهن فى معتقداتى او احاول التخفيف من تلك الاحكام لمحاباة اى شخص مهما كان ، وفى المقابل لن اطالب اى شخص لا يعتنق الاسلام ان يغير من معتقداته بهدف اكتساب صداقتى او محبتى وهو حر فى اقامة شعائر وطقوس دينه
كما ازعم اننا فى بلد له تركيبة سكانية موزعة بين اغلبية مسلمة واقلية مسيحية وهذا الوضع الديموغرافى ينعكس على كل مناحى الحياة ، وكما هو حادث فعلا فى كل البلدان التى تتعايش فيها اقليات سواء عرقية او دينية فأن تلك الاقليات تخضع للقوانين التى تنظم الحياة فى اطار الوطن وتكون مصبوغة عادة بالخلفية الثقافية للاغلبية وهذا ما يجب علينا مراعاته كحقيقة على الارض
وازعم ان دعاوى اضطهاد المسيحيين هى دعاوى باطلة ومبالغ فيها وازعم كذلك ان هناك ظلم فى المجتمع وهو موجود بالطبع ويعانى منه كل المواطنين المطحونين بدون تفرقة على اساس الدين او الجنس
على هذا الاساس فانا ادعو المسلمين والاخوه المسيحيين فى مصروادعو نفسى الى تأمل القيم الاخلاقية والانسانية التى قامت عليها الاديان لتنير لنا طريقنا فى الحياة الدنيا بعيدا عن الفتنة والشقاق

هناك 24 تعليقًا:

Unknown يقول...

انا بصراحة شايفة ان الدعاوى دى هى بتتيح مجال للفتنة الطائفية ما احنا طول عمرنا عايشين مع بعض عادى و كلنا اهل كتاب ... مش فاهمة فيه ايه

Empress appy يقول...

يا استاذى هى وقفه على دى بجد انا بقيت اشوف حاجات كمان بتحصل بين المدونين تخلى الواحد عاوز يسيب التدوين ده خالص
وبعدين ما مصر اتفككت فى كل حاجه
ربنا يهدى الجميع بجد

Cleo يقول...

فعلا .. أنا موافقة إن فيه لعب جامد بيتلعب فى البلد وتسخين ونفخ فى شرار صغير...

مثلا محمد حجازى اللى أعلن انه اعتنق المسيحية كان حسب تقرير برنامج العاشرة مساء من فترة قليلةقبل قضيته يخرج فى مظاهرات ضد الصحف الدنماركية الميئة للرسول... ومظاهرات كفاية...إلخ.. يعنى الشخص ده مشبوه وبيستخدم كأداة لإشعال الحرائق والقضايا الفالصو...

اللى خايف على مصلحة لابلد دى سواء مسلم أو مسيحى أو شيوعى أو لادينى لازم يكون حريص جدا ويشغل مخه...

إحنا فى عصر الاتصالات عن بعد.. وأى حاجة عن بعد محدش يقدر يجزم بصحتها من عدمه... يعنى أهى صور بنتفرج عليها وخلاص.. وأخبار يمكن تكون إشاعات بنسمعها وخلاص.. الحقيقة الوحيدة إن فيه قلقلة فى البلد وفيه شرخ حاصل.. نحاول نلمه بدال ما نحاول نوسعه..

أما بالنسبة لدعاوى الاضطهاد الدينى للمسيحيين... أى مسيحى محايد وغير مشحون مش هيقر برضه إن المسلمين كمان مضطهدين دينيا؟؟ الشاب اللى يطلق لحيته ويلتزم بالصلاة فى المسجد بيكون ملاحق من أمن الدولة (ده لو ما اتجرجرش على المباحث واتبهدل) حتى لو مكانش له أى نشاط سياسى.. وللعلم أنا أعرف أكتر من حد كدة وهؤلاء الأشخاص لا نشاط سياسى لديهم ولا لهم فى البطيخ أصلا..

أما مسألة الاضطهاد الدينى للمسيحيين فى مصر فقد أصبح أشبه بتهمة معاداة السامية لليهود.. كذبة تستخدم للى ذراع الطرف الأخر وفرض النفوذ والسيطرة ولا أساس لها من الحقيقة

عين فى الجنة يقول...

عاليا العزيزة
والمشكلة انه يوم بعد يوم المشكلة بتتفاقم
لكن كنت عاوز اعرف رأيك ايه فى الاستبيان
ولكى الشكر

عين فى الجنة يقول...

appy
ادعو معاكى ربنا يهدينا لسواء السبيل
وياريت تقولى رايك فى الاستبيان
ولكى جزيل الشكر

عين فى الجنة يقول...

كليو
متفقين تماما ، وياريت تلقى نظرة على الاستبيان بتاع المبادرة وتكتبى لى رايك
جزاك الله خيرا

mohandsmasry يقول...

مهندسنا العزيز انا شفت الموضوع ده واشتركت بردو بابداء الرأى لكن انا عاوز اقول رأى من وجهة نظرى الشخصية ويمكن كمان بحكم سكنى فى محافظة يقطنها نسبة عالية من المسيحيين عاوز اقول الموضوع مبالغ فيه لدرجة كبيرة جدا وكلمة مبادرة او احتقان دى بتوحى ان الامور فى وضع حرج مع انى من تعاملاتى وصداقاتى وجوارى للكثير من الاخوة المسيحيين مالمستش ده ابدا ده بالعكس يمكن تلاقى عندنا اغلب الحضور فى المناسبات خاصة الحزينة منها للاخوة المسيحيين من المسلمين !!!!! الفكرة فى حد ذاتها حلوة لكن دى مش هى المعضلة اللى مفروض الناس تناقشها وتدرسها وبتاء عليه نحدد الاسباب ونحاول اصلاحها بالطبع .لو رجعنا 50 او 60 سنة للخلف هل كانت فيه حاجة زى دى موجودة ماهو لازم نكشف الاساس ونشوف الخلل جه منين ( معلهش المهنة بتحكم ههههه) ؟؟؟ طب ايه المستجدات اللى حصلت فى خلال السنين دى ووصلت بينا للوضع ده بيتهيألى بداية ظهور الجماعات الاسلامية والتيار السلفى والوهابى فى مصر هو اصل المشكلة مع ظهور اعتداءات على بعض الاخوة المسيحيين وسرقة محلات الدهب الخاصة بيهم وما تلاها من احداث وماتنساش حضرتك الوازع الدينى موجود عندنا كلنا اى حد بيتك على النقطة دى بتلاقى استجابة فورية لا شعورية عندنا كلنا يمكن ده خلق مساحة تسمح لدعاة الفتنة والمغرضين بالنفوذ للعقول وما تنساش حضرتك القبلية والعصبية والعنصرية الموجودة بتلاقيها كتير اوى خصوصا بعيدا عن المدينة ده طبعا مع التدهور فى الاخلاقبات والانحدار الثقافى الموجود حاليا دول يمكن بعض العوامل اللى مفروض تدرس مش نسأل اسئلة ساذجة زى تشترى من المسلم ولا المسيحى ده بالعكس اغلب زباين التجار المسيحيين بينما العكس يندر تلاقى واحد مسيحى يشترى حاجة من مسلم او مشغل واحد مسلم عنده هههههههه يمكن دى راجعة لحبهم لبعض اكتر مننا او نوع من التكافل او يمكن العنصرية اللى بنقول عليها والموجودة مش عندنا بس دى فى اغلب الدول الاوربية وامريكا اسف للاطالة تحياتى

عين فى الجنة يقول...

مهندس مصرى
اشكرك يا هندسة على التعليق السوبر لوكس :))) ياباشا انت عندك موهبة الكتابة وراجل مطلع وعندك اراء جميلة بس اوعى تبطل هندسة ، وياريت يا باشمهندس تقول لى رأيك بتفصيل عن الاستبيان
اشكرك ولك التحية

همس الليل يقول...

السلام عليكم
اولا بحب اكرر اسفى هنا عندك بخصوص الكلام السخيف اللى مدون مجهول كتبه فى مدونتى يخصك
ويارب متكونش اصلا قريته
ثانيا
بحب اعبر عن مدى اعجابى باختيارك لمواضيع حساسه وحساسيتها هنا ناشئه من عقول الناس اللى سعات بتتعصب لرأيها سواء من الجانب المسلم او المسيحى
اما بالنسبه لرأى فى الاستبيان انا بصراحه اول مره اسمع عنه من خلال ما كتبت حضرتك
لكن على اى حال وانا كنت كتبت عند مدون يدعى الاضطهاد للمسيحيين فى مصر وخصوصا الاسكندريه بعد الاحداث الاخيره اللى حصلت واللى اصلا كانت احداث مسيسه قبل الانتخابات
كنت رديت ان الاضطهاد بئا للشعب المصرى كله مسيحى او مسلم
وان الموضوع كله هو لعب مقصود من قِبل أقباط المهجر المتعصبين لتحقيق مكاسب سياسيه
وان معظم رجال الاعمال الاقباط فى مصر دلوقتى بيلعبوا نفس اللعبه كمثال نجيب ساويرس اللى بيلعب نفس اللعبه لاظهار الاضطهاد من الحكومه لمشاريعه واعماله لتحقيق مكاسب ماديه لشركته وتقديم الدعم
فى حين لو وجدنا هنلاقى ان نفوذ الشخص دا حاليا بيفوق اى رجل اعمال مسلم
فللأسف الموضوع بئا متاجره بالدين لصالح كبار رجال الاعمال والسياسه
وهيا لعبه مقصوده يزج فيها البسطاء وهم لا يعلمون ان الموضوع كله اساسه بيزنس
معرفتى بمسحيين كتير منهم المتعقلين جدااااا والمحترمين جدا
عرفتنى ان الموضوع سياسى بحت وان كل ما تسال واحد مسيحى تلاقيه بيقول ان الموضوع سياسى
وان لما نبص حوالينا ومش كلام نلاقى تعاملنا مع المسحيين عميق جدا
يبقى فين الاضطهاد دا ومين اللى مضطهد اصلا
تقريبا هو الشعب المصرى مضطهد
اسفه على طول تعليقى بس موضوعك دسم جدا ويحمل فى طياته الكثير من الاسئله التى تحمل اجابتها وتحمل ايضا الالغاز
وبكرر اسفى مره تانيه عن الهرتله اللى حصلت على صفحتى من شخص مجهول
لك منى كل الاحترام

عين فى الجنة يقول...

نورا
انا الحقيقة زعلت علشان خاطرك انتى ومكنتش متصور ان فى واحد قليل الادب بالشكل ده ولا ممكن يكون فى شخص بليد الاحساس زى المعلق المجهول اياه
وانا اشكرك والله على مشاعرك الرقيقةوعلى ذكائك واخلاقك العالية لانك لم تعطيه الفرصة ليستدرجك الى المهاترات
وكمان باشكرك على التعليق الحصيف اللى ب اعتز به جدا جدا
اشكرك ولكى تحية من القلب

mohandsmasry يقول...

باشمهندس صيلح الخير واسف لتأخير الرد لعطل الكومبيوتر والراوتر !! بالنسبة للاستبيان اتفق مع رأى حضرتك واضيف انه بيتجاوز ابسط القواعد المعروفة وهى عشوائية الاختيار للمشاركين لانه اولا موجه لشريحة صغيرة جدا مفروض انها تنتمى لطبقة المثقفين والمفروض فى قياس الرأى انه بيكون المشاركين خليط من جميع الطبقات تانى حاجة الاسئلة مش موحدة بدليل اختلاف عددها كان لازم تبقى اسئلة موحدة وكل من الطرفين يجيب حسب حالته ختى اللى واضعين الاسئلة مختلفين يعنى المسيحى حاطط اسئلة يجيب عليها المسلم والعكس الخلاصة ده ينطبق عليه التعبير المشهور اللى بيستعملوه القضاة فساد فى الاستدلال كدا ايا كانت نتايجه فهى غير صحيحة وغير منطقية ولا تمثل اى واقع تحياتى لسيادتك

Carol يقول...

أتفق معك في الرأي كليا بكل حرف قلته فأنا لم يعجبني بتاتا تلك المبادرة و لم أحاول المشاركة حتى بتعليق فتلك التدوينات أثارت غضبي و اشمئزازي لا أعرف لماذا ربما لأنها تفتح أبواب للقيل و القال في مكان من السهل فيه الغش و الخداع

غير معرف يقول...

تعرف يا حضرة المهندس؟

نازك الملائكة -الله يرحمها- كانت لها عمّتان اسمهما: عائشة وبتول!

هذا مع العلم أن نازك من بيت شيعيّ... وأنت تعلم ما يروّج اليومّ في حق أمّنا عائشة -رضي الله عنها-!

حقًّا هي حرب مدروسة... خطّة... وإلا فليس من المعقول أبدًا أن تثب كل الطوائف بعضهاعلى بعض في نفس الوقت... سنة شيعة... مسلم نصراني... حتى إخوان وسلفية!

غير معرف يقول...

انت شخص موتور

غير معرف يقول...

راجى،

أشكر الصدف السعيدة اللى عرفتنى على مدونتك من خلال البوست ده اللى بيتكلم عن مبادرة مصارحة ومصالحة واللى أتشرف إنى أكون واحد من الناس المشتركين فيها.

مبدئياً، أعتقد إنك تسرعت كثيراً وحكمت علينا بسرعة بالعمالة وبزرع الفتن وباستخدام أسئلة خبيثة لصالح جهات غير معروفة والكلام الكبير ده.

بس من ناحية تانية، ممكن أتفهم تخوفك وتخوفنا كلنا وعدم ثقتنا فى أى حاجة بتتعمل أساساً. أنا كمان بعمل زيك كده، برمى أحكام مسبقة بدون ما أجرب أو أسئل. يعنى أساسى ممكن أقول إن أى حزب أو حركة وطنية مهما كانت، الغرض منها لمّ فلوس والناس اللى منظمنها عايزين يوصلوا على كتاف أحلام البسطاء. ولو قعدت تغنى من النهارده للسنة اللى جاية، مش هأصدق إن أى حاجة من دى، الغرض منها هو نفسه الغرض المعلن، لازم يكون فيه أغرض باطنة وخفية.

وطبعاً لأنى فى المبادرة هأقولك إحنا معندناش أجندة خفية ومش عملاء لجهات أجنبية والكلام ده، ممكن تصدق وممكن مصدقش بس دى حاجة ترجعلك، أنا بوضح الصورة مش أكتر.

على فكرة كمان، الموضوع ملوش علاقة بالتدوين أوى. إحنا صحيح علاقتنا ببعض بدأت عن طريق التدوين لكن دى مش حركة عن مدونين. دى حاجة عملناها عشان إحنا بتى آدميين ومصريين فى الأساس وشوفنا إن إحنا عايزين على الأقل نخلق حوار مع نفسنا ومع الآخر غير الحوار الهجومى التكفيرى ذو الأحكام المسبقة اللى موجود دلوقت فى بعض وسائل الإعلام وفى بعض الجوامع وفى بعض الكنايس.

أخيراً، لى تسائل؟ ممكن ننشر تدوينتك عندنا فى موقع معاً أمام الله. إحنا بنجمع حالياً كل اللى إتقال عننا وهو فى الغالب إيجابى بس كمان عايزين نحط رأيك وإن كان هجومى

عين فى الجنة يقول...

مهندس مصرى
اشكرك على التوضيح ، والحقيقة ان الاستبيانات لها اصول وفرز الاجابات وتحليلها يجب ان يتم بشفافيه تامه
واشكرك مره اخرى ولك التحية

عين فى الجنة يقول...

كارول
اولا ارحب بيكى فى المدونة واشكرك على التعليق واتفق معاكى فى ضرورة الشفافية لعدم اثارة الفتن
اشكرك مره اخرى واسجل اعجابى بمدونتك المميزة

عين فى الجنة يقول...

ابودواة
اشكرك يا اخى على التعليق ، وواضح ان حضرتك شاعر تحب الشعر ومدونتك جميلة وارجو ل التوفيق

عين فى الجنة يقول...

ikhnaton2
عزيزى الفاضل
احب اعبر عن سعادتى بتشريفك لمدونتى المتواضعة واشكر لك التعليق المتزن الوقور وازعم ان الاتزان والوقار يبدو واضحا تماما فى مدونتك التى تشرفت بزيارتها قبل ان اكتب ردى على حضرتك

**********

اتمنى يا سيدى العزيز ان تعيد قراءة الموضوع مرة اخرى وسوف تجد انى قد هاجمت الاستبيان من الناحية الفنية طبقا للاسئلة التى اوردتها فى البوست واتمنى ان تكون هناك اجابات عليها
وقد ترى اننى لم اهاجم فكرة العمل من اجل التعايش السلمى بين عنصرى الامة وقد يكون ذلك واضحا فى البوستات السابقة التى وردت فى هذه المدونة
واحب اقول لحضرتك انه ليس لدى اى مانع بل اكون سعيد لو نشرت مدونتى معكم فى موقع معا امام الله

ولك جزيل الشكر

سمراء يقول...

اولا اشكرك على زيارتي
لم اقرأ اي من الاستبيانات الخاصة بدعوة مصارحة ومصالحة ذلك لاني لااهتم بأي دعوة على اساس الفئات او المعتقدات او غيرها وانما اهتم بكل مايخص حقوق الانسان
اما عن روايات بولو كويلو فهي بالفعل غالية الثمن 65 جنيها للرواية وقرات كل رواياتة تقريبا هناك روايتان فقط من دار نشر الهلال الواحدة ب4 جنيهات هم ساحر الصحراء وفرونيكا تقرر أن تموتالا اني عندي تحفظ على الترجمة كما حدث ايضا في القصص القصيرة مكتوب وهي اضعف ما كتب بولو كويلو وهي من دار نشر ميرت واعتقد انها ب20 جنيها
الا اني احترم ترجمة الطبعة العربية
ادعوك فعلا للمجازفة بالمال لقراءة تلك الروايات فهي احدي نقاط التحول في حياتي
اشكرك
سمراء

مروة الزارع يقول...

طب ولية مقرتش أستبيان المسحيين؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟
؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟

عين فى الجنة يقول...

سمراء
اشكرك على المعلومات القيمة عن كويهلو واتمنى ان اغامر قريبا بشراء احد مؤلفاته التى اراها كل يوم تقريبا فى السوبر ماركت الذى اتسوق فيه
اكرر شكرى وتحياتى لشخصك الكريم

عين فى الجنة يقول...

مروة
لانى مؤمن بالتخصص :)))

غير معرف يقول...

راجى،

شكراً على ردك وقد قمت بنشر مقالتك بالفعل كما قلت فى ردى على إيميلك على موقع المبادرة: http://ma3an-eg.org/node/55

أعتقد إنك ممكن تستشف بذكائك الإجابات من ردى السابق فنحن لسنا خبراء إحصاء وليست لنا تجارب سابقة. الاستطلاع فى شكله الحالى ليس علمياً وإحنا متأكدين إن هيكون فيه ناس بتجاوب إجابات علشان تبوظه وناس بتنتحل شخصية غيرها لكن في النهاية هيكون التحليل كيفياً أكثر منه كمياً ولن نستخلص منه أيّة استنتاجات لكن سيساعدنا على عمل استطلاع حقيقي.

لكن خلينى بردوا أجاوب على أسئلتك التى يشوبها الإتهام أكثر من مجرد فضول.

كيف يتم تفريغ الاجابات؟
مع نهاية فترة الاستطلاع فسيتم إيقاف الاستطلاعات وترشيح الإجابات الناقصة والمكررة والتى يشوبها التحايل. ومن ثم سيتم تفريخ الأجوبة بشكل إحصائى كيفى.

وبأى منهج علمى او احصائى يتم ذلك العمل؟
سنجمع الإجابات ونحاول حساب الارتباط بينها، مثلاً:
هل هناك ارتباط بين من له أصدقاء من الدين الآخر وبين أفكار معينة؟
وذلك يمكن عمله باستخدام
Linear Regression analysis
Pearson or Spearman correlation

ومن هم الموكل إليهم تفريغ الاجابات؟
الموكل إليهم هم المسئولون عن تحليل الاستطلاع من داخل أعضاء المبادرة وهم أشخاص عاديين زيى وزيك بس يمكن عندهم صبر أكتر شوية على تحليل أكثر من 1000 إجابة. ربنا يديهم الصحة :)

ومن هم القائمين على تحليل تلك الاجابات وبأى مقياس ومنهج؟
متهيألى واضح الإجابة دلوقت

وهل سيتم نشر نتائج تفريغ وتحليل الاجابات؟ واين؟
سيتم النشر على موقع "معاً أمام الله"

هل هناك جهات امنية او اجنبية او اعلامية سيتم تقديم تلك النتائج لها؟
مفيش جهات أمنية طلبت النتائج ولو طلبوا أكيد مش هنقدر نقولهم لأ :)
إنت فاهم قصدى طبعاً

الاستطلاع كما أوضحت معمول بعفوية شديدة وليست هناك أى جهات ورائه وسيتم نشر نتائجه على الموقع وممكن بقى ساعتها إلى عايز يستخدمه يستخدمه بس زى ما إنت قلت مفيش ولا معلومة بيدخلها اللى بيعمل الاستطلاع تدل من بعيد أو قريب عليه ولذلك هو أمن جداً

أتمنى أن أكون أوضحت كل ما تريد معرفته